［愛情純愛］我地之間嘅友誼純度絕對等於零！！！: 50. 搭訕

邱旻顥將手機嘅屏幕鎖上，然後將手機放低喺自己嘅手邊，耷低頭繼續食飯

「同女女傾完計啦？」李逸彤輕輕抿唇後，扮講笑真不滿地問邱旻顥，「可以食飯啦？」

「吓⋯？」邱旻顥聽到李逸彤講嘅嘢後抬起頭望向李逸彤，不禁怔了一怔，完全就係要呷醋嘅節奏，「你呷醋啦？」

邱旻顥笑起嚟問道，心裏對於李逸彤嘅反應都係幾開心嘅

「我、我做咩要呷醋呀⋯？」李逸彤頓時調整心情同表情，一臉冇所謂地反一下白眼講道





「唔係女仔。」邱旻顥邊講邊拎起手機，將手機解鎖，開番WhatsApp嘅版面後將手機遞比李逸彤，「男仔嚟。」

李逸彤半信半疑地接過邱旻顥遞過嚟嘅手機，一望到寫喺上方嘅聯絡人名稱就知道，係班上嘅男同學，就係啱啱喺戲院撞到嘅其中一個男仔

李逸彤睇緊嗰個男仔同邱旻顥嘅對話，內容大概都係問佢兩個係唔係拍緊拖之類，邱旻顥都係話「唔係呀」、「冇拍拖」、「真係冇」之類

「都估到又係問呢啲⋯」李逸彤無奈一笑，將手機遞番比邱旻顥，「慣㗎啦慣㗎啦⋯」

「都知佢地見到之後一定會問㗎啦⋯」邱旻顥將手機放喺手邊，「唉，次次都要解釋⋯」





「唔想解釋嘅話，下次咪唔好解釋囉～」李逸彤微微聳肩，托住下巴講道

「唔⋯費是啦～」邱旻顥抬頭望咗李逸彤一眼後，微微耷低頭無奈地笑道，「費是啲人誤會又亂講嘢。」

李逸彤有啲愕然，心裏頓時有啲不愉快嘅感覺⋯其實李逸彤就唔介意啲人講佢同邱旻顥拍拖之類嘅緋聞，除咗因為習以為常外，當然都係因為佢個人對邱旻顥嘅感情

「咁咪解釋囉～」李逸彤壓抑着自己心裏嘅不愉快，擠出笑容就好似平時一樣講道

苦澀嘅味道喺心裏散開，李逸彤耷低頭安靜地食嘢，冇再講過一句說話⋯心裏就係不是味兒，感覺就係邱旻顥唔想其他人誤會佢同自己之間嘅關係一樣





「不過算啦，唔解釋啦都係⋯」邱旻顥忽然間又講道，「由佢地講啦，都唔係第一日啦～」

「哦⋯」李逸彤表面上若無其事地回答，但心裏卻暗自高興

啱啱嘅唔開心一下子就散去，心情又回復正常

「奇奇怪怪⋯」邱旻顥望住李逸彤，細聲地講咗一句

「你就奇怪！」李逸彤輕輕地踢咗邱旻顥一下

食完飯準備比錢嘅時候，李逸彤拎紙巾抹嘴，然後從袋中拎出潤唇膏搽到唇上，佢輕輕抿一下唇

邱旻顥望住李逸彤搽潤唇膏，腦海中又再一次浮現出嗰個令佢怕醜尷尬嘅夢嘅場景，邱旻顥頓時紅着耳根地將視線移開

「Okay～」李逸彤將錢放到枱上，平日佢同邱旻顥出街食飯都係AA制





李逸彤喺餐廳門口等邱旻顥比完錢後出嚟，佢望一望周圍，然後乖乖地企喺原位等待邱旻顥

「嗨～」忽然間兩個陌生男仔行過嚟對李逸彤打招呼

「搭訕⋯？」李逸彤心裏第一下嘅反應，佢望一望眼前嘅男仔，應該係大學生嚟

「介唔介意識個朋友？」企左邊著住Hoodies嘅男仔講道，「有冇IG？」

「你係中學生呀？生得好好睇。」企右邊著住牛仔外套嘅男仔講道

「呃⋯」李逸彤覺得有啲尷尬，佢連忙望向餐廳入面睇下邱旻顥搞掂未

「你等人呀？」企左邊嘅男仔微微側身擋住李逸彤嘅視線





「有冇IG呀？我地交換IG呀～」企右邊嘅男仔拎住手機問道

「唔好意思，有男朋友⋯」李逸彤講道

「你男朋友都唔喺度～當識多個朋友咋嘛～」企右邊嘅男仔微笑道

「邱旻顥搞掂未呀？」李逸彤喺心裏焦急地講道

企喺收銀處嘅邱旻顥剛好拎起店員找比佢嘅錢，佢一望向外面就見到李逸彤比兩個男仔搭訕

邱旻顥二話不說將找番嚟嘅錢都先塞晒入褲袋中，連忙行出餐廳

「冇IG嘅話手機號碼都可以～」企左邊嘅男仔講道

「有男朋友啦⋯！」李逸彤見到邱旻顥從餐廳行出嚟，連忙小跑去邱旻顥嘅身旁，一下子挽住邱旻顥嘅手臂





邱旻顥朝兩個搭訕嘅男仔瞪咗一眼，然後就同李逸彤離開

「呼⋯」過咗轉角位後，李逸彤鬆一口氣同時鬆開邱旻顥隻手，「尷尬真係⋯」

「我冇利用價值啦？」邱旻顥笑了笑講道，雖然心裏唔想李逸彤鬆手，但佢都只可以用開玩笑嘅方法問出口

「冇啦～扮我男朋友嘅任務完成啦～」李逸彤自然地露出笑容講道，「係喎，找番嚟嘅錢呢？」

「哦，喺度。」邱旻顥從褲袋中拎出錢，然後將李逸彤嘅嗰份比番佢

「Okay～呢度比你啦～」李逸彤拎咗個$2硬幣放到邱旻顥嘅手中，「係任務費。」








IG Link: https://www.instagram.com/nd_cotttoncandy/?hl=zh-tw