［愛情純愛］我地之間嘅友誼純度絕對等於零！！！: 66. 我喜歡和你一起

「偷笑啲咩呀？」李逸彤眼睛嘅餘光留意到邱旻顥獨自偷笑着

「冇。」邱旻顥下意識回答道

「明明就偷笑，望住我偷笑啲咩呀？」李逸彤滿滿嘅不信任，總覺得邱旻顥一定係諗緊啲咩好笑嘢但唔同佢講

「冇呀！」邱旻顥重複一次佢啱啱嘅回答，畢竟佢都冇可能講比李逸彤知佢諗緊啲咩

「嗯？」李逸彤雙手托着下巴，側着頭望住邱旻顥同時微微一笑





甜美嘅表情令邱旻顥忍唔住笑意，只好將視線移開，睇下糖水到未分散一下注意力，但又不禁偷瞄李逸彤一眼

「做咩呀？」李逸彤發現邱旻顥偷望佢，連忙追問

「糖水到。」邱旻顥當聽唔到李逸彤講嘅嘢，直接轉移話題到嚟到嘅糖水上

李逸彤頓時往旁邊望去，見到阿姨拎住兩碗紅豆沙行過嚟，將紅豆沙小心翼翼地放喺枱上

「唔該！」李逸彤對阿姨禮貌地講道





李逸彤輕吹兩口，然後將紅豆沙送入口中，然後再輕舔一下唇

「好食～」李逸彤細細聲地講道

「十幾歲人仲成個小朋友咁⋯」邱旻顥無奈一笑，低聲地講道

「你講咩呀？」李逸彤聽到邱旻顥嘅話，輕力地踢咗佢一腳，「你話邊個係小朋友呀？」

「你囉～」邱旻顥食咗一啖紅豆沙，抬眼望李逸彤一眼，然後笑咗一笑





李逸彤抬眼望咗邱旻顥一眼，見到邱旻顥笑起嚟，佢都忍唔住嘴角上揚

食完糖水後，兩人一同行出糖水舖，佢地慢慢散步行番屋企，難得可以喺番學以外嘅時間見面，當然要好好珍惜，將呢個見面嘅時間努力延長

今晚天氣好涼，涼風一直吹着，李逸彤將髮絲都繞到耳背，李逸彤嘅步伐輕快，感覺上心情好好一樣

李逸彤隨手影咗張相po喺IG story，只係無聊地講一下自己去咗食糖水，當然佢冇講同邊個一齊，就當係自己去食糖水

「心情好好咁喎～」邱旻顥留意到李逸彤臉上掛着嘅笑容

「日日都好㗎啦～」李逸彤嘅視線從手機嘅螢幕上移開落喺邱旻顥身上，佢輕鬆自在地笑一笑

同邱旻顥一齊，佢覺得好自在，可以做自己，當然都會有想表現出好嘅一面比邱旻顥睇嘅時候，但佢為自己喺邱旻顥面前唔洗刻意地假扮而高興自在

「我呀，真係好中意同你一齊～」李逸彤望住地上嘅影子，自然而然地緩緩講道





邱旻顥頓時一怔，佢冇預料到李逸彤會突然間講出一句剎佢一個措手不及嘅說話

「佢嘅意思⋯係邊種⋯？」邱旻顥腦海中閃出嘅第一個想法，係李逸彤口中嘅「中意」係邊一種中意，係朋友嗰一種？定係愛情嗰一種⋯？

李逸彤清楚地知道自己啱啱講咗啲咩，佢唔係要表白，而只係想將呢個心情、呢種感覺話比邱旻顥知

李逸彤抬頭望向邱旻顥時，同邱旻顥對上視線，因為邱旻顥亦剛好望住李逸彤，兩人嘅視線，永遠都會如此剛好

「嘻⋯」李逸彤對於自己啱啱講嘅嘢，感覺有啲⋯難為情，只好一笑置之，喺心裏道：「反正呢一刻我又唔係期待佢要比啲咩答覆我。」

「我都中意同你一齊。」邱旻顥笑一笑後開口講道，回應李逸彤嘅「中意」

本來微微耷低頭嘅李逸彤聽到邱旻顥嘅回應後抬頭望住邱旻顥，兩人再一次對上視線，然後同時一笑





「唔洗戴住面具做人嘅感覺，好好～」李逸彤抬起頭望住藍黑色嘅天空，今晚只有寥寥可數嘅星星

李逸彤呢一個回覆，就好似為自己剛才所講嘅嘢加上一個解釋一樣；邱旻顥知道，李逸彤啱啱講嘅中意，唔係指緊愛情嘅中意，而係朋友嘅中意，所以佢先可以處之泰然地回答一句佢都中意

兩人好似有共識一樣，知道對方並唔係對自己表白，佢地察覺到對方心中所想，或者係屬於佢地兩人之間嘅默契

「我唔係非佢不可，但心動嘅感覺令我知道，我係中意佢⋯」李逸彤喺心裏對自己講道，「我清楚知道⋯我嘅心動，非佢不可⋯」

「其實宜家咁樣都幾好⋯」邱旻顥喺心裏講道，佢嘅直覺話佢知佢唔需要急住表白，如果唔係，可能會弄巧反拙，「雖然，都會想佢係我女朋友⋯不過好似未到時候⋯」

兩人之間嘅關係就係咁樣，其他人唔明佢地點解唔一齊，但佢地之間卻有份默契，冇打算表白亦冇打算努力地用行動話比對方知自己對佢嘅中意有幾多

喺追求自然嘅同時，有時細微嘅小舉動又會成為佢地之間嘅關係嘅催化劑，確保對方會喺自己身邊，為自己停留

「今晚好涼爽～」邱旻顥伸咗個懶腰





「你凍唔凍呀？洗唔洗比番件外套你？」李逸彤關心地問道，雖然心入面唔太想將外套除落嚟，但又有啲擔心邱旻顥會唔夠衫

「唔洗，你著住先啦～」邱旻顥笑咗一笑，將李逸彤由上而下打量一番後喺心裏甜笑起嚟：「我件衫好似真係有啲太大件！」




IG Link: https://www.instagram.com/nd_cotttoncandy/?hl=zh-tw