［愛情純愛］我地之間嘅友誼純度絕對等於零！！！: 67. 絕對私心
「邱旻顥你笑咩呀！」李逸彤見到邱旻顥笑，好奇心瞬間被撩起，「我又要知！」
「笑你。」邱旻顥直接地講道，然後拉起著喺李逸彤身上嘅外套嘅衫袖，衫袖比李逸彤嘅手長多了，將李逸彤成隻手都遮住，所以一拎起衫袖時，將李逸彤嘅手都拎起嚟，「你隻手收喺入面做咩？要做大戲呀？」
「你件衫咁大件⋯」李逸彤嘅聲線中夾雜着半抱怨半撒嬌嘅意味，「都好正常啫⋯！」
李逸彤用長長嘅衫袖打咗邱旻顥兩下，邱旻顥一下子就捉住咗衫袖，拉住衫袖就行
李逸彤比邱旻顥「捉住手」就行，開心咗一下之後覺得，邱旻顥好似放狗一樣⋯
「放手呀！你估你放狗呀？」李逸彤一下子甩開邱旻顥嘅手，「你要拉長個衫袖啦！」
「乖乖。」邱旻顥摸一摸李逸彤嘅頭
當邱旻顥收回手時，微風吹過，李逸彤柔軟嘅髮絲從邱旻顥嘅手背上滑過，邱旻顥怔了一怔先將手收回
「呼～好飽⋯」李逸彤雙手輕放喺肚子上，感覺宜家成個胃都暖暖的，「邱旻顥又番去打機啦！」
「突然間做咩拉埋打機一齊講⋯」邱旻顥無奈地反一下白眼，然後微微聳肩，「雖然今晚都係會打機⋯」
「你做晒功課未呀～」李逸彤微笑着問道，「聽日會唔會又欠功課～」
「做晒啦～打比你嗰陣係最後一份。」邱旻顥一臉自豪地講道
「仲要係靠我先做完嘅最後一份嘛～」李逸彤更自豪，小跳步行咗兩步，一個轉身望向邱旻顥
「多謝你囉～」邱旻顥笑了笑，敷衍地講道，「我同你一齊食咗糖水啦～當報答咗你㗎啦～」
「咁就當報答咗我㗎啦？」李逸彤沒好氣地望咗邱旻顥一眼
「咁唔係要點呀？以身相許比你好唔好？」邱旻顥開玩笑地問李逸彤
「唔要唔要，我先唔要呀！」李逸彤頓時撇開臉，但又忍唔住偷瞄邱旻顥一眼，留意邱旻顥嘅反應
「咁你想我點多謝你呀？同你食糖水又唔夠嘅話⋯」邱旻顥微微側着頭，望住李逸彤，等待着佢嘅答覆，「定你又想飲奶茶？珍珠奶茶？」
「奶茶又真係幾好飲嘅～不過都唔可以成日飲㗎嘛～好肥㗎！」李逸彤婉轉地拒絕咗飲奶茶嘅方案
「都係嘅，會肥。」邱旻顥順口地講道，但李逸彤卻一臉不滿地望住邱旻顥
「你覺得我肥？」李逸彤輕皺起眉頭，微微鼓起兩泡腮盯着邱旻顥問道
邱旻顥聽到呢道生死題時即刻就沉默咗，因為就算唔洗講都知道，「我肥唔肥？」、「你覺得我係唔係有啲肥？」之類嘅問題完全係女仔嘅地雷區域，一定要小心回答先可以
「都唔係呀，我覺得你⋯身材好標準⋯」邱旻顥諗咗一陣之後，小心翼翼地開口回答道
「哦⋯」李逸彤微微點頭，將視線稍微移開咗一下後又微微側着頭、上身前傾同時抬眼望向邱旻顥，「你又知我身材標準嘅？你偷偷留意我呀？」
面對李逸彤嘅捉弄，邱旻顥有啲無奈，佢中意得李逸彤，自然會留意佢，但呢個唔係宜家可以講出口嘅理由
「咁⋯望落你都唔係好肥啫～」邱旻顥淡定地回答李逸彤，「都Okay呀，我覺得。」
「嘻⋯」聽到邱旻顥回答嘅李逸彤滿意地笑了笑，「咁我其實都唔係真係好肥啫～」
邱旻顥打從心底覺得李逸彤身型都算標準得有餘，畢竟李逸彤喺女仔入面嚟講都叫偏高，所以唔係真係好肥，有少少肉都係好事，如果唔係真係大風啲都會吹走佢⋯
「好凍⋯！」一陣寒風吹過，冰涼嘅感覺瞬間走遍全身，李逸彤用自己嘅雙臂攬住自己，然後朝邱旻顥嘅身後行咗步
「你有啲良心好唔好？外套借咗比你，你仲要搵我擋風⋯」邱旻顥無奈地望向半個人都已經躲到自己身後嘅李逸彤
「啱啱陣風真係好凍嘛⋯！」李逸彤一臉委屈地講道
佢瞄一眼邱旻顥插喺Hoodies嘅雙手，然後抱住絕對嘅私心伸手挽住邱旻顥嘅手臂
「番去啦番去啦！」李逸彤若無其事地望住邱旻顥講道，「免得人地因為借外套比我又幫我擋風而感冒。」
李逸彤嘅舉動自然到極致，完全冇表現出自己嘅私心，呢個舉動自然到好似只係好熟悉、好親密嘅朋友一樣
邱旻顥感受着手臂上嘅重量，佢完全唔會抗拒同李逸彤嘅肢體接觸，畢竟係同自己中意嘅人，抗拒嘅話就即係唔比機會自己接近
「忽然間感覺好溫暖⋯」李逸彤喺心裏默默地講道
本來仲有啲凍嘅感覺，就喺佢伸手挽住邱旻顥嘅手臂後消失了，佢都唔知道呢種溫暖嘅感覺係嚟自邊度
「係佢嘅體溫⋯？定因為我塊面發緊熱⋯？」李逸彤喺心裏道，佢另一隻手輕輕地貼到自己嘅臉頰上，然後偷瞄邱旻顥一眼，「應該⋯兩樣都有⋯」
⋯
喺李逸彤番到屋企之後，佢第一時間向邱旻顥報平安，然後就去沖個熱水涼
熱水灑喺李逸彤嘅身上，直湧而嚟嘅溫暖蔓延到身體嘅每一個角落
「同啱啱嘅感覺唔一樣⋯」李逸彤細聲地自言自語道
熱水帶嚟嘅溫暖，係滲透到皮膚下一樣走遍全身，令人感覺渾身溫暖無比；而啱啱⋯同邱旻顥一齊時嘅溫暖，係一種安全感所帶嚟嘅溫暖⋯溫暖嘅唔係皮膚，而係內心嘅溫暖
「呼⋯」李逸彤輕呼一口氣，佢閉上雙眼感受着熱水涼為佢帶嚟嘅溫暖同舒適，「日久生情⋯」
IG Link: https://www.instagram.com/nd_cotttoncandy/?hl=zh-tw