［愛情純愛］我地之間嘅友誼純度絕對等於零！！！: 69. 對望

「你今日做咩同我一齊出門口？」邱旻顥望住行喺自己身旁嘅邱茗然問道

「有份功課漏咗喺locker，要番去做。」邱茗然講道

兩兄妹企喺電梯口等電梯落嚟，邱旻顥抬起頭望住樓層顯示器，然後從褲袋中拎出手機望一望螢幕睇時間

「呢個時間點，應該會見到李逸彤⋯」邱旻顯喺心裏默默地講道，有啲期待陣間電梯門打開時會見到李逸彤

「咚、咚！」電梯停落嚟，然後緩緩地打開門，兩邊嘅門一打開，邱旻顥就見到李逸彤企喺門嘅左邊





今日嘅電梯出奇地冇咩人，當電梯門打開時，電梯內只有李逸彤同另一個學生

「早晨。」「早。」

李逸彤同邱旻顥自然地打聲招呼，邱茗然跟喺邱旻顥身後行入電梯

「姐姐早晨！」邱茗然乖巧地對李逸彤講道

「早晨，你今日同邱旻顥一齊出門口呀？」李逸彤對於朝早會見到佢地兩兄妹一齊出門口感到有啲意外，「好少見你同佢一齊番學。」





「唔係呀～只係宜家哥哥早咗出門口咋嘛～以前我都同哥哥一齊出門口。」邱茗然笑笑口講道

「你幾時有同我一齊出門口？」邱旻顥感覺不對勁，即望住邱茗然問道，想中止呢個話題，「我都唔覺以前你有同我一齊出門口。」

「吓？有呀～以前成日都差唔多時間出門口，只係你宜家早咗出門口咋嘛～」邱茗然望住邱旻顥一臉得意地講道，邱旻顥就知道，佢係故意咁講

兩兄妹對望着，邱旻顥盯着邱茗然，用眼神叫佢唔好再亂講嘢；邱茗然則一副洋洋得意嘅模樣，好似捉到邱旻顥嘅把柄一樣

當三人離開大堂行到外面時，邱茗然感覺自己實在太似電燈膽，感到渾身唔自在





「哥哥我行先啦～唔阻你啦～」邱茗然抬頭望住邱旻顥講道，唔等邱旻顥講啲咩就向前小跑起嚟

李逸彤望一望邱旻顥，邱旻顥無奈地搖搖頭，邱茗然都唔知係唔係特登，應該都係，邱茗然用自己嘅方法試探邱旻顥

「你以前同茗然一齊番學？」李逸彤好奇地問道，「估唔到你地會一齊番學喎～」

「佢隨口作出嚟㗎咋⋯」邱旻顥淡然地講道，聲線裏盡是無奈，「我同佢一直都唔會一齊番學⋯」

李逸彤冇再提問，反而喺心裏打咗個問號；邱旻顥真係服咗邱茗然

「佢早咗出門口呀原來⋯」李逸彤獨自喺心裏喃喃自語道，「會唔會因為我⋯？」

李逸彤自己諗完之後甜甜一笑，但又覺得好似好有啲自作多情；李逸彤微微側着頭，笑而不語地望住邱旻顥

「諗緊啲咩？笑咩？」邱旻顥問道





「諗緊你點緊會早咗出門口囉～」李逸彤笑了笑講道，對自己刻意嘅提問，李逸彤自己都覺得自己八卦

「因為⋯」邱旻顥有啲意外李逸彤會問一個咁樣嘅問題，佢隨便地講咗個理由：「因為我早咗起身。」

「哦。」李逸彤若有所思地哦咗一聲

地鐵車門打開，李逸彤一上車就行到車門旁邊嘅位置，背靠着玻璃企

邱旻顥同李逸彤對着企，一捉住扶手之後，邱旻顥微微耷低頭小睡片刻

「好攰？」李逸彤定睛地望住閉起雙眼嘅邱旻顥問道

「嗯⋯」邱旻顥輕聲回答，佢嘅聲線裏夾雜着滿滿嘅倦意





「琴晚好夜瞓呀？」李逸彤柔聲問道，「打機打到好夜？」

「唔係呀⋯瞓唔著呀～」邱旻顥將雙眼睜開一條縫，輕輕一笑道

邱旻顥捉住扶手嘅手放喺比李逸彤高嘅位置，邱旻顥下意識地將頭往自己嘅手臂上靠，李逸彤放喺身前嘅雙手頓時輕輕地握咗一下

「嚇、嚇死我⋯」李逸彤喺心裏講道，佢嘅臉頰泛起淡淡嘅紅霞，啱啱邱旻顥嘅舉動令李逸彤嘅心臟緊縮咗一下

李逸彤微微抬起頭定睛地望住邱旻顥，邱旻顥就喺離佢好近嘅距離，只有喺邱旻顥睇唔到嘅時候，李逸彤先敢將目光所及嘅位置都留比佢

「邱旻顥，我中意⋯」李逸彤將呢句說話喺心中講到一半嘅同時，邱旻顥緩緩地睜開眼

邱旻顥同李逸彤四目交投，李逸彤呆咗一下，一時三刻間比唔到反應，仍然定睛地望住邱旻顥

邱旻顥因為察覺到李逸彤望住自己所以先睜開眼，但冇諗到一睜開眼，見到李逸彤專注地望住自己冇將視線移開





「咳⋯」邱旻顥先一步回神，尷尬地乾咳一聲同時企番好

地鐵車門閂上然後開出，車廂喺整架列車開出之際晃咁一下，邱旻顥重心不穩，朝李逸彤嘅方向行咗一小步；李逸彤下意識地提手，指尖輕輕地掂到邱旻顥嘅腰；邱旻顥成個人都醒晒，倦意全消，即刻向後行咗兩小步

「醒晒⋯」邱旻顥喺心裏講道同時偷瞄咗李逸彤一眼

李逸彤紅着臉移開視線，心臟裏嘅小鹿亂衝，差啲就要直接撞開心房跳出嚟；李逸彤忍唔住偷偷望邱旻顥一眼，只見邱旻顥撇開臉望住另一邊，耳根紅透了

「嚇死差啲⋯」李逸彤喺心裏講道，心臟強烈嘅跳動，就好似時間仍然停留喺啱啱嘅一刻一樣




IG Link: https://www.instagram.com/nd_cotttoncandy/?hl=zh-tw