［愛情純愛］我地之間嘅友誼純度絕對等於零！！！: 68. 情竇初開

李逸彤忽然間細聲地講道，喺李逸彤啱啱對邱旻顥產生好感時，沈心怡曾經問過李逸彤中意邱旻顥啲咩，當時李逸彤都冇回答到呢個問顥

「中意佢對我嘅溫柔，中意佢對我嘅細心同體貼，中意佢嘅笑容同性格⋯」李逸彤喺心裏回想起邱旻顥對佢嘅一舉一動

喺佢見到佢凍嘅時候，第一時間起身去閂風扇；覺得佢著唔夠衫怕佢凍，會將自己嘅外套除落嚟比佢；每次出街睇戲時，邱旻顥都會帶定一件外套以防萬一⋯

所有看似平凡到冇得再平凡嘅小事，都係令李逸彤心動嘅原因，全都成為李逸彤中意邱旻顥嘅理由

「好想快啲到聽日⋯」李逸彤微微耷低頭，甜甜嘅感覺從微微上揚嘅嘴角滲出嚟





邱旻顥剛沖完涼，手拎住搭喺頸上嘅毛巾嘅一端擦乾頭髮，行番入房後伸手將啱啱隨手放咗喺上格床嘅外套拎落嚟

「今日冇香水味⋯」邱旻顥喺心裏道，佢用衣架將外套掛喺衣櫃嘅把手上

邱旻顥坐喺下格床，伸手拎起放喺枱上嘅手機

李逸彤：我宜家好飽

邱旻顥笑咗一笑同時邱茗然推開房門，見到邱旻顥正望住手機笑





「哥哥你唔好咁變態啦⋯」邱茗然一臉嫌棄地講道，「望住手機自己喺度笑⋯」

「笑都變態呀⋯」邱旻顥反一下白眼講道

「你啱啱先見完人就掛住人地啦？」邱茗然一眼睇穿邱旻顥想法嘅表情，然後坐到床上，踢咗邱旻顥兩腳

「講緊咩？」邱旻顥起身行兩步到書枱前坐低，將頸上搭住嘅毛巾拉咗落嚟，隨意搭喺櫈背上

「你唔好扮啦～你唔係中意姐姐咩？」邱茗然輕輕一笑，爬到去床尾近書枱嘅位置，「唔係咩～」





「細路女識咩呀。」邱旻顥望住邱茗然淡然地講道

「你話我知嘛～你係唔係中意佢呀？」邱茗然一臉好奇地問道

邱茗然作為邱旻顥嘅親妹，當然對哥哥有一定程度嘅了解，佢總會喺邱旻顥同李逸彤WhatsApp時偷瞄一眼，佢知道佢嘅哥哥大概有中意嘅人了

「咩佢？邊個佢？」邱旻顥繼續扮唔知，「你講緊咩？」

「講緊邊個？講緊平時同你一齊番學嗰個呀！」邱茗然沒好氣地講道，「住我地呢幢樓嗰個呀！李逸彤呀嘛！」

「你八卦咁多做咩呀？」邱旻顥既不承認亦冇否認，默默地迴避開呢個問題

「咁即係係定唔係？」邱茗然窮追不捨地問道，佢就係想知道邱旻顥係唔係中意李逸彤

「唔知喎～」邱旻顥微微聳肩，比出一個模棱兩可嘅答案，「我做咩要話你知，又唔見你同我分享下你有冇中意邊個男仔？」





邱茗然瞬間安靜咗落嚟，輕輕抿一抿唇，將視線移開；邱旻顥將邱茗然嘅舉動都睇喺眼中，佢冇特別大反應，畢竟喺呢個年紀，邱茗然有中意嘅男同學都唔奇怪

「我冇呀～」邱茗然喺兩秒後先開口講道

「哦係咩？」邱旻顥微微一笑，心裏道：「原來有中意嘅人～」

邱旻顥冇講出嚟嘅打算，反正對佢嚟講，邱茗然中意邊個都好，都係佢冇辦法干涉嘅事，只要佢唔係中意李逸彤，中意邊個都冇所謂

邱旻顥望住邱茗然臉上情竇初開嘅笑容，都知道邱茗然有自己嘅少女心事

「咁到底係唔係？」邱茗然忽然間提問，將問題嘅重點又拋番去邱旻顥身上

「你知嚟做咩？」邱旻顥感覺有啲哭笑不得





明明都係啲無關痛癢嘅事，但一比女人聽到，就會瞬間勾起佢地嘅好奇心，就會拎出佢地嘅毅力：一直問你問到你講為止

「咁我都只係好奇一下啫～」邱茗然嘻嘻一笑，但佢臉上已經刻住「我想八卦下」幾個大字，「作為妹妹都想關心下哥哥㗎嘛～」

「多謝你嘅關心，你哥哥我心領啦。」邱旻顥先唔會咁容易將自己嘅小秘密講出嚟，只係微笑着搖搖頭

「呿⋯」邱茗然見邱旻顥冇打算講便放棄，灘番低喺床上

邱旻顥望咗邱茗然一眼後，目光再次落喺手機嘅螢幕上

李逸彤：唉，聽日又要番學，好攰呀⋯

李逸彤：好想日日都可以瞓到晏一晏先起身

「咁聽日唔好番喺屋企瞓囉」邱旻顥笑了笑，無奈地回覆道，「今晚早啲瞓咪唔攰」





李逸彤：你瞓未呀？

「？」邱旻顥不禁喺度諗，李逸彤係唔係想同佢喺差唔多時間瞓所以先咁問，「未」

李逸彤：打機？

「一陣啦，打一陣就瞓應該」邱旻顥回覆道

李逸彤：Okay～

邱旻顥同李逸彤講咗一聲晚安之後就放低手機喺枱上，然後開電腦打機








IG Link: https://www.instagram.com/nd_cotttoncandy/?hl=zh-tw