［愛情純愛］我地之間嘅友誼純度絕對等於零！！！: 71. 暗自不滿

「咁多謝呀～」潘景諭接過包肉泥，然後放到書包裏，「代襪子多謝你。」

「前兩日你唔係話襪子中意食咩？你又話買唔到⋯」沈心怡行番去自己嘅座位坐低，「我前日去Donki嘅時候見到就買咗，不過琴日唔記得比你。」

「洗唔洗比番錢你？幾錢呀？」潘景諭側一側身，想拎放咗喺褲袋嘅銀包

「唔洗啦～我請襪子食～」沈心怡笑了笑道

「對襪襪咁好呀～」潘景諭請講道，然後伸手托住下巴望向沈心怡，「咁會唔會打算都愛屋及烏，請埋我食嘢？」





「你係貓咩？」沈心怡無奈地反一下白眼講道

「喵。」潘景諭緩緩開口，絲毫唔覺得尷尬地喵咗一聲

「噗⋯」沈心怡比潘景諭嘅一聲「喵」逗笑，潘景諭呢一刻先覺得有啲難為情，紅了耳根微微耷低頭笑了笑，「扮咩可愛呀～」

耷低頭嘅潘景諭抬眼望向沈心怡，本來已經慢慢收起嘅笑容，喺見到沈心怡臉上掛着甜美嘅笑容時，潘景諭都會忍唔住露出笑容

「冇你份呀！我對襪子好㗎咋～」沈心怡笑道，「你就算啦～大把女仔等住對你好啦係唔係？」





「點同？我地小學就識，上到嚟又一直同班，咁我地都算⋯半個青梅竹馬呀。」潘景諭講道

沈心怡聽住同望住潘景諭認真嘅發言同表情，瞬間有啲無言以對

潘景諭嘅說話又⋯唔係完全錯晒，但用「青梅竹馬」呢個詞嚟形容，沈心怡又覺得唔算係

「哦⋯」沈心怡諗唔到要點樣答佢先係，諗咗好一陣之後先緩緩開口：「但我地小學嘅時候都唔係好熟。」

「宜家熟咪得囉～」潘景諭講道，沈心怡無奈地反一下白眼





潘景諭托着下巴，佢偷偷地望沈心怡一眼，佢都冇諗過自己會有中意沈心怡嘅一日，明明以前佢地都唔係真係好熟，但好似突然間就發現自己中意咗沈心怡一樣

「唉～如果我識讀心術就好啦⋯」潘景諭喺收回視線後喺心裏慨嘆道，「可惜我唔識⋯」

沈心怡感覺到有人望住自己，於是抬頭望向佢嘅左邊，一望過去就見到潘景諭望住自己，潘景諭自然地將視線移開

「上次啲馬卡龍好唔好食？」沈心怡忽然提起前幾日佢整嘅馬卡龍，好奇地問道，「食晒未呀？」

「超好食！」潘景諭用力地點頭講道，「嗰晚就食晒啦！你再整呀？」

「冇呀～就係想問下咋嘛～」沈心怡甜甜一笑，聽到潘景諭話馬卡龍好食，沈心怡都係發自內心高興，「好食就好啦～」

「沈心怡，你知唔知今朝Miss Ng叫我地做完就交嘅嗰份嘢交去邊？」一個男同學行到去沈心怡嘅座位旁邊問道，「係交落簿櫃定點？」

男同學嘅出現立刻吸引咗潘景諭嘅注意，潘景諭下意識望過去，明明男同學只係問兩句關於功課上嘅事，但卻令潘景諭不禁提高警覺





「交比科長。」沈心怡回答道，然後周圍望一望，睇下科長喺嗰喺位，「科長喺度，你交比佢啦。」

「好呀唔該。」男同學禮貌地道謝，然後就轉身朝科長嘅位置行去

「朝早冇聽Miss講嘢㗎咩⋯」潘景諭喺心裏細聲地抱怨道

「交比科長呀。」沈心怡見潘景諭望住自己，便對潘景諭講道

「我交咗啦好唔好⋯」潘景諭回神過來，然後無奈地反一下白眼，「我有聽書，知交去邊囉⋯」

「哦，順口提一提你嘛～」沈心怡講道，「對你夠好啦掛～」

「多謝晒～」潘景諭輕輕一笑，臉上掛着虛偽嘅笑容





沈心怡起身，喺書包中拎咗包tissue放入裙袋後行到李逸彤嘅座位，同李逸彤講咗兩句之後，李逸彤起身同沈心怡一齊行出課室；潘景諭喺兩個女仔從課室嘅窗外行過咗之後起身，行到去邱旻顥隔離嘅座位坐低

「你想點？」邱旻顥望一望潘景諭之後又耷低頭睇手機，「佢出咗去喎。」

「我睇到，兩個都出咗去添。」潘景諭面向住邱旻顥坐，「今晚打唔打機？」

「幾點？」邱旻顥問道，「是旦啦，得閒就上線啦⋯」

「要陪女呀？」潘景諭露出意味深長嘅笑容

「我單身㗎⋯」邱旻顥無奈地講道，然後靜咗一秒之後再細聲補多句：「暫時⋯」

「哦～」潘景諭一臉訝異，估唔到邱旻顥會咁樣講，「都未一齊就宣示主權啦？」

「我又冇講同邊個一齊。」邱旻顥嘅嘴角微微上揚着，然後又偷瞄咗潘景諭一眼，「不過你可能要一直單身。」





「唔會囉～」潘景諭回頭望一眼課室門口後先對邱旻顥講道

「咁有信心？」邱旻顥感覺到潘景諭嘅自信，佢望向走廊嗰邊，見到兩個女仔喺課室嘅窗前經過

「其實冇⋯」潘景諭微微耷低頭，收起本來掛喺臉上嘅笑容，「都唔知佢諗咩⋯」

「問下。」邱旻顥朝住兩個女仔嘅方向稍微抬一抬下巴

「問咩呀？」李逸彤嘅雙手放喺背後，沈心怡行喺李逸彤身後拉佢李逸彤嘅手

邱旻顥同潘景諭對望一眼，邱旻顥緩緩抬頭望向沈心怡，沈心怡疑惑地望住邱旻顥，又望一望潘景諭

「嗯？」沈心怡困惑地側着頭





「想問你陣間想食咩啫～」潘景諭若無其事地淺淺一笑對沈心怡講道，就好似啱啱佢冇同邱旻顥講過啲咩一樣




IG Link: https://www.instagram.com/nd_cotttoncandy/?hl=zh-tw