［愛情純愛］我地之間嘅友誼純度絕對等於零！！！: 72. 公敵

「點解唔問我？」李逸彤望住潘景諭問道

「因為邱旻顥會問你。」潘景諭講呢句說話嘅時候，完全冇經過大腦思考就直接講出嚟，邱旻顥直接拎起放喺枱上嘅擦膠朝潘景諭扔去

「想死係唔係？」邱旻顥瞪咗潘景諭一眼，潘景諭將擦膠拋番比邱旻顥

「講事實都唔啱？」潘景諭望一望邱旻顥，又望一望李逸彤

潘景諭嘅心裏鬆一口氣，好彩佢瞬間將問題嘅重心拋到去邱旻顥身上，自己先可以避免成為問題嘅中心





潘景諭望向沈心怡，只見沈心怡好似冇察覺到任何事一樣同李逸彤一齊笑着，潘景諭默默地將視線收回，微微耷低頭，佢嘅內心其實都有啲矛盾：想沈心怡知道自己對佢有意思，但亦唔想沈心怡知道自己對佢嘅意思⋯

⋯

Lunch time

四人行樓梯落到三樓，剛好見到邱茗然從樓下上嚟，手上拎住一個飯盒；邱茗然眼睛嘅餘光見到邱旻顥

「哦～哥哥！」邱茗然一見到邱旻顥頓時行到邱旻顥嘅面前，又望一望李逸彤，「你地去食飯呀？」





「係呀～」李逸彤笑了笑講道，目光隨即落喺邱落然手上拎住嘅飯盒上，「你喺學校食飯盒呀今日？」

「嗯嗯！」邱茗然點點頭，然後將目光落喺邱旻顥身上，「冇錢食飯⋯」

「你冇錢食飯咪冇錢，望住我做咩⋯」邱旻顥無奈地講道

「哥哥你都唔心痛下我嘅⋯！」邱茗然可憐巴巴地望住邱旻顥，但邱旻顥卻以一臉睇戲食花生嘅模樣望住邱茗然，「你開心去食飯，你妹妹我就食飯盒⋯你做哥哥嘅唔心痛㗎咩？」

「唔心痛。」邱旻顥淡然地講道，「比完錢你之後，我就真係心痛。」





邱茗然見自己冇得逞，扁一扁嘴之後又靈機一動，抬眼望向李逸彤

「姐姐你睇下佢⋯！」邱茗然一臉委屈地行到李逸彤身旁，拉住李逸彤行到邱旻顥嘅面前，然後伸手指住邱旻顥，「哥哥點可以咁狠心對我㗎⋯！」

李逸彤眼見邱茗然一臉委屈，朝邱旻顥望咗一眼；邱旻顥望住邱茗然，沒好氣地拎出銀包，從銀包中拎咗$50遞比邱茗然

「資助你$50得未呀？」邱旻顥沒好氣地講道

「得！絕對得！」邱茗然用力地點頭，然後接過$50， 「多謝哥哥！」

邱茗然興高采烈地拎住飯盒同$50朝課室行去；李逸彤佢地四人就出去食飯，李逸彤行喺邱旻顥身旁，邱旻顥同李逸彤對望咗一眼

「唉⋯」邱旻顥無奈地嘆一口氣

「邱茗然真係搵啱人幫佢。」行咗喺邱旻顥身後嘅潘景諭幸災樂禍地講道





邱旻顥回頭望向潘景諭，眼神裏除咗係無奈，就係不滿，真係想話比沈心怡知潘景諭中意佢，等潘景諭冇得咁囂張⋯但當然，邱旻顥唔會真係咁做

「潘景諭，係唔係想互相傷害？」邱旻顥面帶微笑問潘景諭

李逸彤同沈心怡同時地望向潘景諭，潘景諭同邱旻顥對望着

「我地係好兄弟嚟㗎嘛～點會想同你互相傷害？」潘景諭行上前搭住邱旻顥嘅膊頭

李逸彤同沈心怡對望咗一眼，兩人一頭霧水完全唔知發生咩事

⋯

18:00





「得你嘅？佢地兩個呢？」企喺月台嘅潘景諭望住行到佢面前嘅沈心怡

「冇見到佢兩個喎⋯」沈心怡回頭望，「佢兩個都應該一齊嚟㗎啦～」

潘景諭將沈心怡由頭到腳打量一遍，佢好少會見到沈心怡著便服嘅樣，因為佢地唔會私下出街

沈心怡今日着咗件白色長袖冷衫，下身着咗條格仔紋嘅淺啡色短裙；今日沈心怡冇梳馬尾，柔軟嘅長髮披喺沈心怡嘅膊頭上

「好唔好睇？」沈心怡抬頭望住潘景諭問道，然後又耷低頭打量自己一番

「好睇。」潘景諭微微點頭

沈心怡抬頭望向潘景諭甜甜一笑，潘景諭嘅心瞬間小鹿亂撞；沈心怡拎起手機，面向住地鐵月台嘅玻璃幕門打算影相，潘景諭見到後朝沈心怡嘅身旁行咗一步

沈心怡用Boomerang影咗張相，潘景諭專心地盯着沈心怡嘅手機螢幕





「佢會po出去定會save低就算⋯？」潘景諭喺心裏問道

沈心怡嘅指尖落喺save嘅圖示上，直接將相save低；沈心怡隨即又舉起手機，雙手拎住手機，稍微朝潘景諭嘅方向靠去

潘景諭嘅心微微顫動咗一下，佢望向沈心怡，悄悄地朝沈心怡行近一步，比啱啱更貼近沈心怡，沈心怡嘅膊頭都已經掂住潘景諭；而沈心怡影完張相之後同啱啱一樣直接save低

「你唔po呀？」潘景諭壓抑着自己嘅期待，當作單純好奇一樣問道

「唔啦，比其他人睇到得我地就唔好啦⋯」沈心怡抬頭望向潘景諭，微微一笑講道，「咁多人中意你，比人睇到嘅話，我真係要變做你啲追求者嘅公敵啦⋯」

「講到宜家唔係咁⋯」潘景諭無奈一笑，微微耷低頭、細細聲地講道

「潘景諭你啱啱講咩話？」沈心怡聽到潘景諭講嘅嘢，微微側着頭望住佢笑問道








IG Link: https://www.instagram.com/nd_cotttoncandy/?hl=zh-tw