［愛情純愛］我地之間嘅友誼純度絕對等於零！！！: 74. 差一點⋯

「做咩？」潘景諭柔聲問沈心怡

「冇咩⋯」 沈心怡眨一下眼後輕輕搖頭，再專望潘景諭一眼之後隨即將視線移開

望住沈心怡淡紅嘅臉頰，潘景諭更好奇沈心怡對自己嘅感覺

「呀⋯」沈心怡細細聲地叫咗一聲，因為企喺佢身後嘅人唔小心撞咗佢一下

沈心怡向潘景諭行咗一步，直撞上潘景諭，因為怕企唔穩嘅沈心怡，下意識就提手輕輕地扶喺潘景諭嘅腰上，好似攬住佢一樣；潘景諭嘅手就喺沈心怡向佢嘅方向跌撞時，提起放到沈心怡嘅背上





沈心怡臉頰一下子就紅起嚟，潘景諭嘅心跳好似停頓咗一下之後再用力地跳起嚟，心跳強而有力得佢自己都聽到自己嘅心跳聲

「噗噗！噗噗！噗噗！」

沈心怡同潘景諭嘅距離一下子就被推到好近，沈心怡愣住了，佢都唔知道聽到嘅心跳聲係屬於自己定潘景諭

「後面嗰個人係助攻⋯？」潘景諭喺心裏暗自興奮咗一下，「時機都太啱啦掛⋯！」

「呃⋯嚇親⋯」沈心怡回過神後嘅第一個反應，係尷尬地紅着臉頰笑咗一笑，然後向後行咗一小步





沈心怡將視線移開望向其他地方，心臟入面嘅小鹿比啱啱突如其來嘅攻擊嚇到亂跑亂跳，一直撞到牆一樣

「差啲就要穿煲⋯」沈心怡喺心裏緊張地道，啱啱唔小心攬過潘景諭嘅腰嘅手輕輕地捉緊孭帶一下

沈心怡悄悄地抬眼偷望潘景諭，然後又將視線移開，佢幾怕啱啱會令自己嘅小心思會被人察覺

「如果呢個感覺可以一直收起就好⋯」沈心怡喺心裏輕嘆一口氣講道

「到站啦。」潘景諭細聲地提點沈心怡道





「哦好呀。」沈心怡抬頭望一望車門外，列車真係駛入月台，佢地都到站

落車之後，沈心怡頓時行到李逸彤嘅身旁，想當啱啱嘅事冇發生過一樣；但對潘景諭嚟講，卻完全唔一樣⋯

⋯

「其實你都唔洗特登送我番去，好近啫。」沈心怡對潘景諭講道

喺番屋企嘅路上，就剩低沈心怡同潘景諭；邱旻顥同李逸彤一齊番屋企，潘景諭送沈心怡番去，咁就可以有時間同沈心怡獨處一陣

「咁邱旻顥同李逸彤順路番去嘛。」潘景諭用平靜嘅聲線講道

「你同我都唔順路啦⋯」沈心怡喺心裏默默地講道，但最後開口嘅回答係：「哦⋯」

潘景諭偷望沈心怡一眼，有時覺得自己喺沈心怡眼中真係同個普通人一樣，但自己卻期望着自己比其他人有啲特別





「阿諭。」沈心怡忽然間好似諗到啲咩一樣，叫咗潘景諭一聲，但隨即又安靜咗落嚟

「你叫完我又唔講嘢？」潘景諭一臉疑惑

「想去食雪糕⋯」沈心怡吐一吐舌頭，細聲地講道，「突然間好想食⋯」

「咁去囉宜家。」潘景諭停低落嚟，正想轉身嘅時候，沈心怡卻一手拉住潘景諭嘅衫袖，「嗯？」

「都係唔去啦⋯」沈心怡輕輕扁一扁嘴，搖搖頭講道

「點解唔去？你唔係想食雪糕咩？」潘景諭不解地輕皺起眉頭

「好似唔太好⋯呢個時間去食甜品⋯」洗心怡睇一睇手機顯示嘅時間





「唔怕啦，去啦～」潘景諭講道，然後拉住沈心怡嘅手腕就行，「你想去食，我地就去食！」

「但係宜家都就嚟10點啦喎！」沈心怡猶疑地講道，「宜家去食嘅話⋯！」

「唔理係朝早10點定夜晚10點，只要你想食，我地就去食！」潘景諭笑道，佢完全冇打算鬆開沈心怡隻手，畢竟沈心怡比咗個機會自己同佢獨處多一陣

沈心怡比潘景諭嘅說話逗樂，潘景諭完全唔介意陪沈心怡去食宵夜，啱啱嘅說話都唔係淨係用嚟氹沈心怡，基本上就係佢心入面想講嘅嘢嚟

另一邊廂，邱旻顥同李逸彤都已經行到番去屋企樓下

「好飽呀我仲係～」李逸彤嘅雙手放喺肚上，感覺肚裏仍然滿滿的，一定係因為啱啱食得太豐富

「有冇肥到？」邱旻顥偷笑一下之後問道

「嘖⋯」李逸彤瞬間瞪咗邱旻顥一眼，「我好肥咩宜家？」





「都唔係真係好肥嘅。」邱旻顥小心翼翼地回答道，然後比咗個good嘅手勢，「我覺得都Okay啦～標準。」

「Okay，原諒你。」李逸彤聽到邱旻顥嘅回答後，嘴角微微上揚

「知你唔會咁小器。」邱旻顥微微點頭，快行兩步拉開打堂嘅門，等李逸彤先行入去

「咚、咚！」隨着電梯嘅到達提示聲，兩人嘅對話亦被打斷

李逸彤望一望邱旻顥，邱旻顥望向李逸彤，兩人默契地對望，又到咗分開嘅時候⋯

「拜拜～」李逸彤喺電梯門打開之際對邱旻顥揮兩下手

「聽日見。」邱旻顥微微一笑，然後行出電梯








IG Link: https://www.instagram.com/nd_cotttoncandy/?hl=zh-tw