［愛情純愛］我地之間嘅友誼純度絕對等於零！！！: 73. 分散

「冇講咩～」潘景諭笑一笑講道，「我冇特別講啲咩，不過嗰兩張相drop番比我。」

此時李逸彤同邱旻顥落到嚟月台，李逸彤小跑到沈心怡嘅面前

「你地咁早嘅？」李逸彤拉住沈心怡嘅手，佢望到沈手怡望住手機螢幕，send緊啲咩比潘景諭一樣，「send啲咩比潘景諭呀？」

「啱啱影嗰兩張相，佢叫我send番比佢。」沈心怡send出去之後望一望潘景諭嘅手機，見到潘景諭收到之後先望向李逸彤

李逸彤一臉好奇地望住沈心怡嘅手機螢幕，見到兩人影嘅相時心裏冒出一個想法，頓時一笑：「好似係你地兩個嘅約會咁⋯」





一直冇出聲嘅邱旻顥頓時將目光默默地落喺潘景諭身上，潘景諭怔了一怔，沈心怡若無其事地笑咗一笑

「咁你地啱啱唔喺度嘛～」沈心怡平靜地微笑道，「你地喺度我地再影多次囉～」

但喺潘景諭嘅耳中，聽起嚟就好似沈心怡撇清緊兩人嘅關係，怕人地誤會啲咩一樣，令潘景諭嘅心裏有啲不是味兒⋯雖然喺李逸彤同沈心怡影相時，佢同邱旻顥一樣都有靠過去一齊影，但潘景諭都係有啲在意啱啱沈心怡嘅澄清

「你@我呀，我repost。」沈心怡對李逸彤講道

「我drop番比你呀～」李逸彤轉身對企喺佢左邊嘅邱旻顥講道，同邱旻顥講嘅嘢時候都會下意識朝邱旻顥嘅方向靠，「開咗air drop未？」





李逸彤同邱旻顥之間嘅距離好近，兩人靠得好近，兩人嘅手臂都已經掂到對方；潘景諭留意到佢地兩人之間嘅距離，再望一望自己同沈心怡之間嘅距離，佢地之間永遠都會留有一隻手臂嘅位置一樣，總會留一絲空間⋯

一直都因為有好睇嘅外表、良好嘅性格而受女仔歡迎嘅潘景諭，每一次都係比人追求嘅一方，佢反而好少，什至幾乎冇主動去追過一個人

不過今次，潘景諭卻遇到難題，佢曾經以為女仔好容易就會心動，但沈心怡卻好似一道水泥牆一樣難以打破，搞到佢都唔知要點樣追先啱

潘景諭拎出手機，打開IG嘅相機，將鏡頭轉成自拍鏡頭同轉做Boomerang模式，喺㩒下影相嘅白色圓點後，將手機向沈心怡嘅方向側一側；潘景諭唔同沈心怡嘅係，佢有勇氣將呢段Boomerang放上story，仲要係public story，再加上佢@咗沈心怡：「睇緊啲咩咁專心？」

「你偷影我？」沈心怡嘅手機就喺潘景諭po咗story後收到通知，「仲要po喺public story？我真係會變眾矢之的㗎⋯！」





「唔會啦，係變都一早變咗啦～」潘景諭冇絲毫嘅擔心，亦冇刪story嘅打算

「潘景諭你係唔係唔知自己幾多女仔追⋯」沈心怡無奈地抬眼望住潘景諭講道

「點解你叫我全名嘅時候，感覺咁唔友好⋯」潘景諭感覺怪怪的，或者因為聽慣沈心怡用暱稱叫佢

「你啲追求者一定喺心入面超討厭心怡，但又好羨慕佢～」李逸彤喺一旁偷笑着講道，沈心怡無言地望一眼李逸彤，又抬頭望向潘景諭

「應該係妒忌加討厭嘅多啲囉⋯」沈心怡望住潘景諭講道，潘景諭只係聳聳肩

「是旦啦，反正我又唔會介意有冇人追呢個問題。」潘景諭毫不在意地講道

沈心怡同李逸彤都望向潘景諭，但喺潘景諭嘅視線裏就只容得下沈心怡一人一樣，潘景諭頓了一頓

「馨馨唔係追緊你咩？」沈心怡直接問道，「昕婷唔係中意你咩？」





「我又冇話我中意佢地。」潘景諭一臉認真地回答沈心怡嘅問題

「馨馨上次送晒曲奇咁喎～」李逸彤頓時笑着伸手拍咗潘景諭嘅手臂兩下，沈心怡頓時掩着嘴偷笑，「你啲桃花，我地都知嘅～」

「我又冇收！我唔收女仔嘅嘢㗎～」潘景諭講道

「咁我下次整嘢食，係唔係唔洗比你啦？」沈心問頓時開玩笑問道

「唔係！除咗你之外，其他人嘅嘢我都唔收㗎啦！」潘景諭對沈心怡講道

沈心怡聽到潘景諭嘅說話，雖然知道只係潘景諭口甜舌滑氹下佢，但沈心怡嘅內心都係好開心

「哦～」李逸彤同邱旻顥第一時間笑着起哄，「好sweet呀潘景諭～」





潘景諭望住兩人起哄，不禁紅了耳根，心臟一直用力地跳動着；潘景諭悄悄地留意着沈心怡嘅反應，佢想從沈心怡嘅微表情中搵到一絲破綻

「大家咁熟，明嘅～」沈心怡甜甜地笑起嚟，伸手輕輕地拍咗潘景諭嘅膊頭兩下，「我以後整甜品都會分你一份嘅～」

因為啱啱好係放工時間，一群人啱啱收工嘅上班族行入車廂，本來企喺中間位置嘅四人自然地向後行入去

李逸彤小心地挪動騰出空間比其他人企時，邱旻顥默默地提手放喺李逸彤腰後嘅位置，佢嘅手同李逸彤嘅後腰留有少少嘅距離，避免李逸彤會撞到其他人同時，亦避免其他人撞到李逸彤；沈心怡挪動位置時下意識地朝潘景諭嘅方向靠近，潘景諭怕人群會將沈心怡擠開，於是試探般朝沈心怡伸手

「小心⋯」潘景諭柔聲地對沈心怡講嘅同時，伸手輕輕地捉住沈心怡嘅手

潘景諭嘅手蓋喺沈心怡嘅手背上，沈心怡冇將潘景諭嘅手甩開，只係帶着少許訝異嘅眼神望向潘景諭

「彤彤同邱旻顥呢？」沈心怡細聲地問潘景諭

「嗰邊。」潘景諭望向另一邊嘅扶手，佢地四人分散咗喺車門兩邊嘅位置





潘景諭側着身，左手捉住扶手；沈心怡面向住潘景諭企，右手捉住扶手，左手捉住斜孭袋嘅孭帶

沈心怡微微抬起頭定睛地望住潘景諭，潘景諭感覺自己嘅呼吸變得有啲重，因為心臟用力收縮一下而令佢嘅呼吸重咗一下




IG Link: https://www.instagram.com/nd_cotttoncandy/?hl=zh-tw