［愛情純愛］我地之間嘅友誼純度絕對等於零！！！: 76. 可愛什麼？
「點解？」潘景諭回覆邱旻顥道
邱旻顥拎起手機望一眼，見到潘景諭嘅提問，於是輸入道：「因為佢唔想喺我同李逸彤中間做電燈膽（笑喊）」
正當潘景諭打算直接已讀邱旻顥嘅message鎖上手機螢幕嘅時候，手機彈咗一個通知出嚟
沈心怡：我好似一個大大嘅電燈膽
沈心怡：你喺度就好啦⋯至少唔係得我一個做電燈膽⋯
潘景諭見到係沈心怡嘅message，心裏有啲開心，因為沈心怡好少會主動搵佢
潘景諭啱啱經過地鐵站，佢停低落嚟企喺出口；搭地鐵嘅三個人一行出地鐵站，沈心怡便左望右望，睇下潘景諭喺邊
「係我嘅夥伴⋯！」沈心怡見到潘景諭就企喺出口旁嘅花圃前，立馬就行到潘景諭嘅身旁，下意識提手捉住潘景諭嘅手肘
「早晨喎潘景諭～」邱旻顥一下子就行到潘景諭嘅身旁攬住潘景諭嘅膊頭，「又會咁啱見到你嘅？」
「費事沈心怡一個人咁尷尬啦～」潘景諭用手肘輕輕地撞邱旻顥一下
「難怪咁好死等埋我地啦～」李逸彤輕嘆一口氣搖搖頭
「你咁講，即係你都覺得我係電燈膽啦⋯！」沈心怡扁起嘴，一臉委屈起拉住李逸彤嘅手
「冇！絕對冇！」李逸彤立刻否認，拉住沈心怡行喺兩個男仔嘅前方，「完全冇！」
邱旻顥行喺潘景諭旁邊，整個人微微側身傾向潘景諭，用膊頭輕輕地撞咗潘景諭一下
「笑咩呀邱旻顥⋯夠啦你⋯」潘景諭沒好氣地望咗一直偷笑嘅邱旻顥一眼
「有你嘅把柄喺手嘅感覺真係好～」邱旻顥細聲地講道，免得講得太大聲，前面兩個人，特別係沈心怡會聽到
「你真係好煩⋯」潘景諭反一下白眼，用手肘撞邱旻顥
「點呀？係唔係好開心呢～」邱旻顥故意問道
「唔知你講咩。」潘景諭努力地忍住笑意，但嘴角卻失守忍唔住微微上揚
「嘖嘖嘖⋯」邱旻顥露出意味深長嘅笑容
「你地講緊咩要細細聲？」李逸彤回頭望住兩人問道
「講緊打機嘅嘢，你唔識㗎啦～」潘景諭頓時回答，反應快到喺邱旻顥開口前就答咗
「又打機⋯日日都掛住打機，難怪成日欠功課啦⋯」李逸彤反一下白眼，搖搖頭道
「青春入面就係要欠下功課先可以。」潘景諭理直氣壯地講道，明明做功課係學生嘅本分，但潘景諭卻講到好似一定要欠下功課先算係一個完整嘅青春
「哦。」沈心怡回頭望向潘景諭，淡然地哦咗一聲
潘景諭面對淡然回答佢嘅沈心怡只係無奈地一笑
望住沈心怡嘅背影，潘景諭心裏覺得自己同沈心怡之間好似總有啲無形嘅距離一樣⋯好似好難靠近沈心怡一樣
「到底嗰個距離係出自邊度⋯？」潘景諭不禁問自己，佢諗唔通，亦諗唔明，「係唔係因為我地一早就識，所以先會有距離⋯？」
⋯
「呢題係咩？」邱旻顥望住拎喺手上嘅測驗卷問李逸彤
「呢個⋯」李逸彤將自己份卷遞比邱旻顥，用筆尖指住題目，「答案喺呢度。」
「咁我呢度咁樣寫係唔係都會有分？」邱旻題望一望李逸彤寫嘅答案後問道
「唔⋯」李逸彤側着頭望住邱旻顥寫嘅答案，然後又望一望顯示喺螢幕上嘅答案，「呢度你有寫，應該都有分⋯但呢度你冇解釋原因，所以⋯」
邱旻顥悄然抬眼定睛地望住李逸彤，專心嘅模樣總會有種吸引力，佢都不自覺地比李逸彤呢種專心嘅模樣所吸引，都聽唔到李逸彤後面解釋比佢聽嘅嘢
「嗯，就係咁啦。」李逸彤講完就轉身坐番好
「呀？」邱旻顥回過神，佢啱啱咩都冇聽到，「你啱啱講咩？講多次。」
「吓？」李逸彤一臉訝異地回頭望邱旻顥，「你發夢呀啱啱 ？我啱啱先講完咋喎⋯！」
邱旻顥笑而不語，李逸彤無奈地快速講一次，畢竟佢仲要對下一題嘅答案
「掛住發夢搞到我要講多次⋯」李逸彤不忘抱怨兩句，然後轉身坐番好繼續對下一題嘅答案
邱旻顥托住下巴，目光悄悄地落喺李逸彤嘅馬尾上，馬尾好適合李逸彤身上散發出嚟嗰種清新嘅感覺
邱旻顥嘅嘴角微微上揚，每個番學嘅日子都可以見到李逸彤嘅感覺好好
邱旻顥中意李逸彤專心認真嘅模樣，總會不自覺地留意到入神；中意每朝早見到李逸彤嘅時候，李逸彤都係精神飽滿嘅樣子；中意李逸彤喺同自己相處嘅時候表現出嘅自然同偶爾嘅羞澀
「喂邱旻顥，你有冇抄呢題嘅答案呀⋯？」李逸彤拎住測驗卷微微轉身問邱旻題
「冇。」邱旻顥一下子回神，然後瞄一眼李逸彤指住嘅題目，「仲諗住問你陣間抄番。」
「嘖⋯」李逸彤一臉不悅地瞪邱旻顥一眼，「哼⋯」
「咁我真係冇聽到嘛。」邱旻顥忍唔住一笑講道，之後又細聲地補一句：「咁可愛做咩⋯？」
本來已經轉身坐番好繼續聽測驗卷嘅題目解答，但聽到邱旻顥細聲嘅一句後，拎起測驗卷擋喺面前，淨係露出雙眼回頭望向邱旻顥
邱旻顥見到李逸彤回頭望自己時怔了一怔，見到李逸彤一個羞澀嘅笑容，邱旻顥知道佢聽到自己啱啱講嘅嘢，邱旻顥嘅耳根泛起淡淡嘅紅霞，耷低頭微微一笑，又抬眼望一望李逸彤
李逸彤成個心都覺得甜絲絲的，明明邱旻顥講嘅一句係提問，但去到李逸彤嘅耳中，卻成為咗一個直述句
IG Link: https://www.instagram.com/nd_cotttoncandy/?hl=zh-tw