［愛情純愛］我地之間嘅友誼純度絕對等於零！！！: 77. 被閃了

「叮噹叮噹⋯叮噹叮噹～」

落堂嘅鐘聲響起，lunchtime嚟到，老師都識趣地叫大家落堂，因為佢自己都要去食飯

李逸彤將枱上嘅嘢先收入櫃桶，等陣間食完飯番嚟先執；邱旻顥將所有嘢都收番入櫃桶之後，抬頭望住執緊嘢嘅李逸彤

「今日食咩？」邱旻顥問李逸彤道

「食⋯茶餐廳？」李逸彤轉身，雙手搭喺櫈背上，上身微微側前，「好唔好呀？」





「唔⋯好呀～你決定。」邱旻顥笑道，喺佢目光所及之處，就只有李逸彤

沈心怡執好嘢，起身打算行去搵李逸彤之際，見到佢地兩人一番甜蜜似的，沈心怡拎起手機偷偷地將佢地影咗落嚟

「影緊咩？」潘景諭眼睛嘅餘光見到沈心怡起咗身卻企喺原地，一望過去見到佢舉起手機擺出影相嘅姿勢

「噓⋯」沈心怡細聲地對潘景諭道

潘景諭行到去沈心怡嘅身旁望向佢嘅手機螢幕，好奇沈心怡到底影緊啲咩





「哦～」潘景諭見到沈心怡已經睇緊自己啱啱影嘅傑作，原來沈心怡影緊李逸彤同邱旻顥

潘景諭悄悄地留意着沈心怡臉上掛着嘅笑容，甜美嘅笑容總會一直撩撥着佢嘅心，令佢小鹿亂撞

「好纖瘦⋯好似大風啲都會吹走佢咁⋯」潘景諭望住沈心怡嘅時候喺心裏不禁講道，「明明比人嘅感覺就係一個柔弱女子，但偏偏有柔而不弱嘅堅強⋯」

沈心怡比人一種柔弱嘅感覺，講嘢嘅聲線都軟綿綿的，好容易會挑起人地對佢嘅保護欲，但偏偏沈心怡只係看似柔弱，實際上佢唔係一個會依賴人地幫佢嘅人

自己可以做到嘅事就自己做，如果有困難都會嘗試一番先，真係冇辦法先會搵人幫佢一把





「嘻嘻⋯」沈心怡收起手機，抬頭望向潘景諭笑咗一笑，然後就朝住李逸彤嘅座位行去

潘景諭跟喺沈心怡嘅身後行，佢嘅目光總會比沈心怡吸引，佢中意沈心怡散發出嚟嘅柔弱感，亦中意沈心怡嘅堅強，佢嘅柔而不弱最吸引到潘景諭

李逸彤同邱旻顥見佢地都行過嚟，便起身離開座位

「阿諭行啦！」沈心怡見潘景諭停喺原地發呆便回頭叫佢一聲

「哦，嚟啦。」潘景諭微微點頭，望住沈心怡嘅背，潘景諭默默地喺心裏講道：「就算你宜家唔係中意我都好，我都會努力令你中意我⋯」

去到茶餐廳坐低，沈心怡將啱啱影嘅嗰張相drop咗比李逸彤，然後若無其事地睇手機等李逸彤反應

李逸彤睇睇下手機見到有air drop嘅通知彈出嚟，一㩒入去就見到沈心怡影嘅嗰張相

「你幾時影㗎⋯！？」李逸彤嘅臉頰頓時紅紅的，伸手挽住沈心怡嘅手，將頭靠喺沈心怡嘅膊頭上





邱旻顥望住坐喺對面嘅兩個女仔唔知發生咩事咁激動，潘景諭輕輕一笑，因為佢知道李逸彤面紅嘅原因

「啱啱囉～」沈心怡笑一笑，「閃親我啦～」

沈心怡咁樣一講，邱旻顥頓時一怔，原來沈心怡影咗自己同李逸彤嘅相

「你洗唔洗要番張相？」沈心怡見邱旻顥望住自己便半開玩笑地問道

「我想睇下張相。」邱旻顥朝沈心怡伸手，想拎沈心怡嘅手機望下張相係點

沈心怡微微轉頭望向坐喺佢旁邊嘅李逸彤，李逸彤同邱旻顥都一臉疑惑

「我比我部手機你嘅話，有人會呷醋㗎～」沈心怡露出意味深長嘅笑容，正因為大家熟，先可以咁樣直接抽水





「邊個？」邱旻顥望住沈心怡，一臉好奇地問道，「邊個會呷醋？」

「哦～」沈心怡同潘景諭頓時起哄起嚟，潘景諭輕輕地撞咗邱旻顥兩下，「閃死人啦～」

「咩呀～」邱旻顥都忍唔住露出打從心底甜出嚟嘅笑容，下意識地伸手摸一摸後頸

邱旻顥抬眼，同臉頰紅着嘅李逸彤對上視線對望着，李逸彤輕輕抿一下唇然後將視線移開

「點呀，我同沈心怡洗唔洗行開先？你兩個自己食得啦～」潘景諭忍唔住兩人嘅視線交流所散發嘅粉色泡泡，終於沒好氣地開口道

「你地曖昧少一陣好唔好？」沈心怡無奈地笑道，「比我同阿諭好好地食個lunch得唔得？」

「又冇人唔比你食嘢！」李逸彤一臉害羞地道，然後拎起凍奶茶飲咗一啖

李逸彤不自覺地抬眼望咗邱旻顥一眼，邱旻顥亦抬眼望向李逸彤，李逸彤發現兩人嘅視線又對上後，連忙紅着臉將視線移開





食完飯番到學校，李逸彤話要去一轉教員室，要去簿櫃幫阿sir拎晏就要用嘅嘢番課室，所以一番到課室一陣又出咗去，邱旻顥跟住出去，跟上李逸彤嘅步伐

「你做咩出咗嚟嘅？」李逸彤見邱旻顥行到自己旁邊便問道

「冇呀，食完飯好飽想行下。」邱旻顥嘅手放啖小腹上，但當然呢個只係借口

「係咩？」李逸彤輕輕一笑，「要唔要同我一齊落去教員室拎嘢？」

「好呀，當做下運動囉～」邱旻顥自然地答應，心裏默默地道：「本來都係想同你一齊去攞嘢⋯」

「係想做運動消化下定因為想陪我落去？」李逸彤笑咗一笑喺心裏道，不過口裏回答嘅都只係一個簡單嘅：「哦～」








IG Link: https://www.instagram.com/nd_cotttoncandy/?hl=zh-tw