［愛情純愛］我地之間嘅友誼純度絕對等於零！！！: 81. 猜測
「唔⋯」沈心怡冇即刻回答，只係望咗潘景諭一眼
潘景諭見到沈心怡嘅猶疑，心裏就開始緊張起嚟，心臟「噗噗、噗噗！」咁跳；就算係一個本來好受歡迎嘅人，面對自己心上人時總會有一絲緊張，面對對方嘅遲疑，心裏都會慌一慌
潘景諭期待地望住沈心怡，期待着沈心怡會答應，但亦擔心沈心怡會拒絕
「可以呀～」沈心怡抬頭望向潘景諭，甜甜地微笑道，潘景諭頓時有種發自內心嘅高興同激動
「睇你幾時想食呀，我陪你嚟食呀！」潘景諭笑了笑講道
沈心怡只係笑了笑，兩人隨即又安靜咗落嚟；潘景諭悄悄地望沈心怡一眼，佢喺心底裏始終唔了解沈心怡到底諗緊啲咩
「如果我問佢嘅話，會唔會好突然⋯？」潘景諭喺心裏道，佢擔心沈心怡會覺得自己咁問好唐突，「佢會唔會因為咁，而察覺到我中意佢⋯？」
潘景諭明明自己都知道，沈心怡最後好大機會都會用「我地熟嘛」嚟解釋一切，佢都唔知沈心怡係真係咁諗，定只係想扮唔知
「再唔問嘅話，就要番到去啦⋯」潘景諭望坐前面嘅路，心裏有啲猶疑不決
潘景諭又望一望沈心怡，佢想了解沈心怡嘅想法，想知沈心怡點諗⋯但又怕自己對沈心怡嚟講只係一個普通人，自己高估咗自己嘅地位⋯
「如果我一直都唔問出口，咁我一直都唔會知佢諗緊咩⋯」潘景諭喺心裏遊說自己道，佢輕輕抿唇，望向沈心怡，緩緩地開口：「沈心怡⋯」
「嗯？」沈心怡聽到潘景諭叫自己，便抬頭望向佢，只見潘景諭一臉認真地望住自己
「你⋯你覺得我點呀⋯？」潘景諭鼓起自己最大嘅勇氣，將想問沈心怡嘅嘢都歸納到一句說話中
「咩點⋯？」沈心怡輕輕地皺一下眉頭，有啲唔理解潘景諭所問嘅呢個問題係咩意思
「就係⋯你覺得我點。」潘景諭又將問題重複一次，看似平靜嘅佢，內心都已經緊張死，心臟用力地跳動着
「做咩突然咁問⋯？」沈心怡喺心裏疑惑地道，佢抬眼望一望潘景諭，「佢想我點答⋯？基於啲咩去答⋯？朋友？定係⋯」
「做咩唔出聲⋯」見沈心怡一臉認真咁沉思，潘景諭嘅內心更緊張，「快啲講啲咩啦⋯！」
「其實都冇咩點呀～雖然有時有啲自戀，但都冇咩唔好。」沈心怡緩緩地開口講道，但佢比嘅答案冇偏向任何一邊，就好似對普通人嘅一個評價一樣，「咁多人追～即係冇咩唔好啦～」
沈心怡心裏鬆一口氣，佢唔想潘景諭知道或者睇穿自己嘅心思，所以先會靜咗落嚟咁耐，諗一個冇咩特別嘅答案出嚟
潘景諭對沈心怡嘅呢個回答，當然唔滿意，不過比起唔滿意，更多嘅係失望
「咁如果我話想你同我一齊，你會唔會答應？」潘景諭抱住放手一搏嘅心問沈心怡，心臟用力地收縮再放開，連呼吸都喺不知不覺間變得急促
「你講邊種一齊⋯？」呢個說話連大腦都冇經過，沈心怡就直接衝口而出
「拍拖⋯嗰種一齊⋯」潘景諭窒了窒，但都係講咗心入面諗嗰種一齊嘅意思
沈心怡怔了怔，佢冇諗過潘景諭講緊嘅一齊會係呢種，一時間唔知要比咩反應先啱
「痴線⋯我講咗啲咩⋯」潘景諭喺內心問自己，沈心怡嘅沉默令佢在意又慌張，「講啲咩啦快啲⋯！」
「呃⋯你咁多人追，同你一齊嘅話好大壓力啫～」沈心怡擠出笑容，故作從容地講道
沈心怡連視線都唔敢喺潘景諭嘅身上停留多過一秒，心裏擔心着自己會講錯啲咩
「點解聽起嚟，阿諭好似表白咁⋯？」沈心怡嘅內心有啲緊張同時又有啲慌張
「佢咁樣講，算唔算係婉拒咗我⋯？」潘景諭喺心裏有啲失落地道，雖然落力掩飾，但失落嘅感覺都喺眼神裏滲出
兩人都沉默咗落嚟，氣氛有啲尷尬，沈心怡同潘景諭各自都有啲緊張
喺沈心怡面前，再自信嘅潘景諭都會變得冇自信起嚟，或者因為觸摸唔到沈心怡嘅心，睇唔穿佢嘅表情同想法⋯
潘景諭陪沈心怡行到番去屋企樓下，潘景諭先停落嚟，沈心怡察覺到潘景諭停低後，佢都緩緩地收步，有啲尷尬咁轉身面向潘景諭，稍微抬眼望佢
兩人又沉默起嚟，尷尬感喺空氣中瀰漫着，潘景諭唔知要開口講啲咩，沈心怡滿腦子都係啱啱嘅事
「呃⋯我番到啦⋯」沈心怡輕抿一下唇，抬頭望向潘景諭，臉上掛上一個尷尬嘅微笑
「嗯⋯」潘景諭微微一笑，點一點頭
「你啱啱⋯」沈心怡緩緩地道，但又冇將句子講完，停頓落嚟思考一下後又開口：「啱啱又攞我嚟開玩笑⋯」
沈心怡故作輕鬆地露出微笑，但佢睇唔到自己嘅笑容係幾尷尬
「唔自在嘅話，當冇聽過就得啦⋯」潘景諭輕嘆一口氣講道
「阿諭果然唔係要表白嘛⋯」沈心怡喺心裏有啲失落，「佢點可能會同我呢啲人表白⋯佢點可能會中意我呢類女仔⋯」
「對唔住，我講咗啲奇怪嘢令你唔自在啦。」潘景諭微笑着對沈心怡道歉，同時伸手摸一摸沈心怡嘅頭
「唔緊要，我唔會放喺心，感覺你今日太多心事啦。」沈心怡微微一笑，然後轉身打算走，「我走啦，多謝你又送我番嚟。」
「等等⋯！」潘景諭一下子拉住沈心怡嘅手，佢冇用力捉住沈心怡嘅手，只係好似輕搭喺上面一樣掂住
IG Link: https://www.instagram.com/nd_cotttoncandy/?hl=zh-tw