［愛情純愛］我地之間嘅友誼純度絕對等於零！！！: 82. 如果

「嗯？等⋯！」沈心怡喺一秒間愣住了

回神過來先發現自己被潘景諭攬住，潘景諭嘅微微耷低頭，雙手放喺沈心怡嘅後背將佢抱喺懷內

喺呢個咁近嘅距離，潘景諭嘅呼吸聲，沈心怡都聽得一清二楚，感受到潘景諭嘅胸口起伏；聞到潘景諭身上獨有嘅味道同洗頭水嘅香味⋯

「佢嘅心事，到底係咩⋯」沈心怡不禁喺心裏喃喃自語一樣問道

潘景諭攬住沈心怡，喺佢懷中嘅沈心怡一動不動，潘景諭只係覺得呢個女仔攬起嚟嘅時候軟綿綿的，好想將佢鎖喺自己身邊好好保護着





今次佢鼓起勇氣嘅同時亦衝動地做出呢個舉動，佢有計劃地要攬沈心怡，但同時亦冇把握咁做，但最後佢嘅衝動幫咗佢

「沈心怡，你唔好中意其他人⋯留喺我身邊就足夠啦⋯」潘景諭喺心裏講道，攬住沈心怡嘅雙臂不自覺地收緊

潘景諭卻冇勇敢將呢啲心底話直接講出嚟，佢怕沈心怡會再一次拒絕佢；潘景諭將雙手鬆開，沈心怡帶着紅紅嘅臉頰抬頭望住潘景諭

「大家咁熟，攬一下都可以掛？」潘景諭伸手摸一摸沈心怡嘅頭

「見同你咁熟⋯你今日又有心事⋯先比你攬一下咁多⋯」沈心怡撇開臉道，「冇下次啦⋯」





潘景諭笑了笑，同沈心怡揮揮手，沈心怡轉身就行入大堂

當沈心怡行到入電梯後，沈心怡嘅心完全冇辦法平靜落嚟，心臟一直狂跳，完全冇冷靜落嚟嘅打算一樣

「呼⋯真係要心臟病發啦⋯」沈心怡嘅雙手捧住臉頰細聲地道，「突然問啲咁嘅嘢，嚇死我⋯」

沈心怡諗起啱啱潘景諭問佢嘅嘢，心裏忽然一陣迷惘

「我好似⋯完全冇諗過會同阿諭拍拖呢個問題⋯」沈心怡喺心裏道，「其實都只係⋯我單戀佢啫⋯」





沈心怡輕嘆一口氣，有時都會諗，潘景諭會唔會有少少中意佢，但一轉眼又會推翻自己嘅想法

「啱啱⋯佢係講笑啫⋯」沈心怡喺心裏彷彿安慰兼說服自己一樣

沈心怡番到屋企，將校服除落嚟，將冷衫向上除嘅時候總覺得冷衫上沾到潘景諭身上嘅味道

腦海中頓時諗起啱啱潘景諭攬住自己嘅場景，喺佢懷中時，沈心怡嘅呼吸聲都唔敢咁大

只係咁樣諗起，心跳都已經自動變快⋯

「算啦⋯可能過多一排，我就唔中意佢啦⋯」沈心怡輕嘆一口氣道

沈心怡每次都會咁同自己講，都唔知講咗幾多次、講咗幾耐⋯

「唉⋯」沈心怡灘坐喺床上，然後向後灘低，提起右手，前臂蓋喺眼前，細聲地講出佢對潘景諭嘅口頭禪：「我地⋯熟嘛⋯」





「我今日有啲⋯衝動⋯」行緊去地鐵站嘅潘景諭輕輕一笑，喺心裏默默地嘆一口氣

潘景諭嘅手扶着額，佢都唔知點解自己會咁衝動咁問出口，明明連沈心怡嘅心係點諗都唔知道

「如果佢都係中意我⋯」潘景諭一諗到呢度，心入面就有啲失落感，但諗諗下又覺得唔係咁樣，「咩如果啫，佢都冇講明佢係中意我定唔係中意我⋯」

潘景諭自己都覺得好似安慰緊自己咁，因為沈心怡回答嘅答案，令潘景諭有啲冇自信，明明只係一個沈心怡

「呀⋯原來我唔了解佢⋯」潘景諭喺心裏道，佢自己都露出自嘲一樣嘅笑容，「好迷⋯」

潘景諭發現原來自己原來一啲都唔了解沈心怡呢個人，就算唔係話一直都好熟，但至少上到嚟中學之後都比以前熟絡

就算唔係完全了解，都應該係一知半解，但宜家潘景諭只覺得自己對沈心怡嘅了解只有10%一樣





「係唔係我主動啲嘅話會好啲⋯」潘景諭喺心裏問道，「我啱啱算唔算主動⋯？」

一直以嚟都係被女仔主動追求嘅人，從來都冇諗過自己會有追人嘅一日

沈心怡嘅身影一直喺佢嘅前方一樣，潘景諭想去追上去拉住佢，鼓起勇氣話比佢知自己嘅心意

但理想同現實有差距，潘景諭嘅腦海中一直浮現出兩人啱啱嘅對話，感覺好似已經比沈心怡拒絕咗一次一樣

「主動咗先⋯！」潘景諭鼓勵自己道，「就算點都好⋯！」

潘景諭拎出手機，想再同沈心怡講多次唔洗狂意自己啱啱講嘅嘢，但諗深一層，有啲似此地無銀三百兩⋯於是潘景諭send咗另一個message出去

「你想食嗰間日本嘢嘅話，同我講，同你去食～」

沈心怡好快就睇咗message，然後回覆：好呀！





潘景諭頓時露出笑容，雖然心入面仍然擔心，但係願意邁步總好過原地踏步

⋯

邱旻顥番到屋企整理好所有嘢之後，拎起手機下意識就去睇李逸彤有冇send message比自己

「佢應該仲喺學校⋯」邱旻顥喺心裏道

真係習慣成自然，每一日都係咁樣一番到屋企就睇手機等李逸彤嘅message，宜家都下意識就會拎起手機嚟望

「唔知佢放幾點⋯」邱旻顥望住手機螢幕放空

此時手機螢幕裏彈出一個新嘅message通知








IG Link: https://www.instagram.com/nd_cotttoncandy/?hl=zh-tw