［愛情純愛］我地之間嘅友誼純度絕對等於零！！！: 83. 少女心事

李逸彤：終於走得啦！！！

邱旻顥望住新嘅message笑了笑，然後將手機解鎖，頓時回覆李逸彤：「恭喜晒～」

李逸彤：恭喜晒？生日定新年？定結婚派帖？

「你生日好似過咗？」邱旻顥回覆道

李逸彤：點解係疑問句⋯





「你生日過咗」邱旻顥回覆道，「不過嚟緊係我生日」

李逸彤：我知，唔洗提我

邱旻顥望住手機笑了笑，每日同李逸彤閒聊就係最開心嘅時候，連機都唔打住

「邱旻顥就嚟生日⋯送咩比佢好⋯？」李逸彤灘喺梳化拎住手機沉思道

⋯





李逸彤同沈心怡去到餐廳，今日係潘景諭同邱旻顥去攞位先，兩個女仔後到

「佢地點解係咁坐⋯」李逸彤一行到入門口，就見到兩個男仔係面對面咁坐

「你地咁樣坐係⋯」沈心怡行到過去時問道

「啱啱攞位，費事要搭枱嘛。」邱旻顥解釋道

「咁你坐番過去啦邱旻顥。」李逸彤講道





「我唔想郁。」邱旻顥微微聳肩，然後拍一拍旁邊嘅空位，「你坐過嚟啦。」

「我都唔想郁。」潘景諭搖搖頭，「讓比李逸彤坐。」

「嘖⋯又要我同心怡分開坐⋯」李逸彤無奈地講道，然後坐低喺邱旻顥旁邊

沈心怡同潘景諭對望一眼，沈心怡頓時將視線移開，然後掃一下校裙嘅裙擺坐低喺潘景諭旁邊

相比起邱旻顥同李逸彤之間嘅粉色泡泡，潘景諭同沈心怡之間卻有份淡淡嘅尷尬飄過

「睇下食咩。」潘景諭將餐牌放到沈心怡嘅面前

「嗯⋯」沈心怡點一點頭

「你食咩呀？」李逸彤拎住餐牌問邱旻顥





「你估下～」邱旻顥托住下巴笑了笑，「你食咩？決定好未？」

「常餐C。」李逸彤將餐牌遞番比邱旻顥同時講道

「你食咩？」潘景諭望一望沈心怡，小心翼翼地開口問道

「B啦～」沈心怡好似咩事都冇一樣微微一笑講道

「佢好似真係當冇事發生⋯」潘景諭喺心裏道，「都唔知係好事定壞事⋯」

望住坐喺佢對面嘅邱旻顥同李逸彤，兩個人有講有笑，一個甜蜜嘅模樣，再望下自己同沈心怡，兩人都唔出聲，沈心怡又耷低頭睇手機，感覺完全係一對好sweet嘅情侶同一對啱啱嗌完交、冷戰中嘅情侶⋯

「唉⋯」潘景諭細細聲咁嘆一口氣





沈心怡聽到潘景諭嘅嘆氣聲便望向佢，潘景諭怔了怔，沈心怡沉默不語

「咦？嗨哥哥～」剛好嚟到同一間餐廳食lunch嘅邱茗然，一踏入餐廳就見到邱旻顥，立馬跑咗過去

「嗨⋯」邱旻顥敷衍地提一提手，然後擺出一副斬釘截鐵嘅表情道：「唔好打算叫我資助你食飯，你哥哥我最近都好窮。」

「你咁睇我㗎⋯」邱茗然扁一扁嘴

「你同你啲朋友坐邊呀？」潘景諭對邱茗然微微一笑問道

「嗰邊！我地坐嗰度～」邱茗然頓時微笑起嚟，然後轉身指一指佢地坐嘅位置

邱茗然回頭望向佢嘅朋友們嘅方向，然後對邱旻顥佢地揮一揮手就轉身番去佢嘅朋友嗰邊

「嗰個就係你哥哥呀？」坐喺邱茗然對面嘅女仔喺邱茗然一番到去坐低時，頓時拉住邱茗然細聲地問道，「隔離係唔係佢女朋友呀？」





「都⋯可以話係⋯」邱茗然猶疑咗一秒後回答道

「坐你哥哥對面嗰個男仔，就係你中意嗰個師兄呀？」坐喺邱茗然旁邊嘅女仔細聲地問道

「咩呀⋯！」邱茗然頓時有啲不知所措，佢回頭望一望潘景諭嗰邊，又瞬間收回視線

邱茗然嘅小臉已經變得紅彤彤的，佢嘅朋友們頓時明白了

「但係坐喺佢隔離嗰個女仔，會唔會係女朋友？」坐喺邱茗然對面嘅女仔嘅目光落喺沈心怡嘅背影上

「梗係唔係啦⋯！」邱茗然立刻講道，「佢冇女朋友⋯！」

邱茗然回頭，目光悄悄地落喺潘景諭嘅背影上，一臉情竇初開嘅羞澀





「諭哥哥先冇女朋友⋯只係因為哥哥佢要同姐姐坐，所以先係咁樣⋯」邱茗然喺心裏講道，「因為哥哥同諭哥哥係好朋友，所以諭哥哥一定會幫哥哥嘅忙⋯」

「不過坐喺你個師兄隔離嗰個女仔，淨係個背影都好有氣質嘅感覺⋯」坐喺邱茗然旁邊嘅女仔望向沈心怡嘅背影，對邱茗然講道，「感覺好⋯嗰種叫咩？溫文爾雅？」

「心怡姐姐的確係好有氣質嘅人嚟。」邱茗然微微聳肩，佢打從心底咁樣諗

邱茗然回頭再望一眼潘景諭，目光自然地轉移到沈心怡嘅身上，喺呢一刻，邱茗然只係覺得氣質呢樣嘢真係刻喺骨子裏

邱旻顥佢地先一步食完飯離開，當佢地幾個企起身時，同邱茗然一同食飯嘅幾個女仔便抬頭望過去

「拜拜。」邱茗然對邱旻顥同其餘三人講道

「拜。」邱旻顥淡然地回答道

李逸彤同沈心怡幾乎同時望向邱茗然嗰邊，微微一笑點點頭




IG Link: https://www.instagram.com/nd_cotttoncandy/?hl=zh-tw