［愛情純愛］我地之間嘅友誼純度絕對等於零！！！: 101. 酸溜溜

潘景諭自問自己真係已經好主動，佢從來都冇試過對一個女仔主動到呢個地步，主動send message又主動約食飯

或者的而且確，沈心怡喺佢心中係重要嘅一人，喺潘景諭剛察覺到自己真係中意沈心怡嘅時候，潘景諭都有諗過邱旻顥啱啱問佢嘅問題

「係唔係因為沈心怡一直都冇中意我，令我覺得滿足唔到心入面嘅滿足感⋯？」

一開始都會覺得迷惘嘅潘景諭慢慢地發現自己唔係因為滿足感而想追沈心怡，而係因為嗰一份明確嘅怦然心動嘅感覺

每一次不自覺地留意沈心怡、每一次對望時心跳嘅強度、每一次無意嘅觸碰帶嚟觸電般嘅感覺⋯每一樣都係大腦同心臟傳遞比潘景諭嘅訊號





「你有冇諗過要同李逸彤維持呢種關係幾耐？」潘景諭問邱旻顥同時不忙提醒邱旻顥，「嗰個敵人喺前面個箱後。」

「Okay，打中。」邱旻顥自然地回答，「都唔係冇嘅，諗緊諗緊。」

「諗緊？左邊一個。」潘景諭疑感地輕皺一下眉頭，「諗緊啲咩先？」

「咁始終都會想一齊嘅，我怕佢唔想啫～」邱旻顥騰出一隻手拎起放喺背後靠着嘅抱枕放到大腿上，「佢唔想嘅話，我同佢表白都冇意思。」

「你諗住表白啦？」潘景諭又道





「諗住囉，未知點。」邱旻顥微微聳肩

邱旻顥忽然回頭望向掛喺牆上嘅時鐘，又望一望門口

「做咩？搵咩呀？」潘景諭不解地問道

「邱茗然仲未番，5點半啦都。」邱旻顥有啲擔心地講道，但轉個頭又毫不在意地繼續打機，「是旦啦⋯」

⋯





潘景諭離開邱旻顥嘅屋企後獨自一人行去地鐵站

喺路上，潘景諭嘅視線都離唔開手機嘅螢幕，一直諗緊要同沈心怡講啲咩嚟打開話匣子先好

「佢呢個鐘數番到屋企未⋯？」潘景諭望一望時間又喺心裏道，「可能佢今晚番屋企食飯喎⋯」

潘景諭嘅內心莫名地感到掙扎，只係想講句嘢點解都會咁難？

潘景諭忽然間拎起手機就打電話比沈心怡，行動仲快過佢大腦思考，真係諗都唔諗就打咗電話

「喂？阿諭？」電話裏頭傳嚟沈心怡嘅聲線

「心怡，你番到屋企未呀？」潘景諭問道，喺只叫出沈心怡嘅名字時，潘景諭嘅心臟狂跳，只係叫一下名都特別緊張

「未呀，啱啱出閘。」沈心怡講道，潘景諭聽到後頓時一怔





出閘，咁咪即係宜家沈心怡個人就喺地鐵站？

潘景諭連忙小跑起嚟去到出閘機嗰邊東張西望，尋找着嗰個令佢掛念嘅身影

「喂？阿諭？你係唔係有事要搵我？」沈心怡見潘景諭冇講嘢便開口問道

「你仲喺地鐵站？」潘景諭追問道

「吓？係呀，啱啱先出閘，唔喺地鐵站喺邊？」沈心怡感到無奈又疑惑，「做咩呀？」

潘景諭朝平日沈心怡番屋企嘅出口小跑過去，小跑咗兩步就見到拎住手機放喺耳邊、著住同一間中學校服、孭住嗰個佢再熟悉不過嘅書包嘅女仔

「喂？喂？阿諭？」沈心怡又喂咗兩聲，但潘景諭都冇回應





沈心怡將手機從耳邊拎開望一望手機螢幕

「打比人講兩句又唔出聲係點㗎⋯」沈心怡喃喃自語地講道，「嘩⋯！」

正當沈心怡打算收線嘅時候，忽然間有人行到佢嘅左邊，然後一下子伸手攬住佢嘅右邊膊頭；沈心怡頓時嚇咗一跳，忍唔住叫咗一聲出嚟

「Surprise～」潘景諭鬆開手從旁探頭望向沈心怡

「阿諭！？」沈心怡一臉訝異地望住眼前人，「你喺度嘅？」

「啱啱去完邱旻顥屋企打完機，宜家番屋企。」潘景諭笑了笑講道

「哦～」沈心怡笑了笑講道，然後試探般問道，「咁你宜家番去？」

「唔⋯都撞到你啦，唔差在送埋你番屋企啦～」潘景諭拎出手機望一望時間後講道





⋯

「阿顥，打電話比妹妹睇下佢喺邊啦！」媽媽從廚房行出嚟對邱旻顥講道

「哦。」邱旻顥哦咗一聲，拎起放喺手旁嘅手機打電話比邱茗然

此時嘅邱茗然行到地鐵站，睇睇下手機就見到邱旻顥嘅來電顯示通知

「喂哥哥？」邱茗然接咗電話

「媽媽問你番到邊。」邱旻顥淡然地講道

「地鐵站，行緊番嚟啦！」邱茗然講道，「今日放咗學之後同朋友去咗食嘢嘛！」





邱茗然偶然抬頭望向前方，見到從不遠處朝佢迎面行嚟嘅潘景諭同沈心怡

「我番緊嚟㗎啦！」邱茗然連忙對邱旻顥講道，然後就匆忙地掛斷電話

「好趕時間咩⋯」邱旻顥望住彈回主頁嘅手機螢幕無奈地講道

「嗨～」邱茗然行到潘景諭同沈心怡嘅面前對兩人打招呼

「嗨～」「嗨，你仲未番屋企嘅？」

沈心怡同潘景諭同時地講道，不過潘景諭見到邱茗然呢個時間點都未番到屋企有啲愕然

「我啱啱同朋友去咗食嘢，所以宜家先番去～」邱茗然吐一吐舌頭講道，「諭哥哥你今日過咗嚟嘅？」

「今日約咗邱旻顥，都係啱啱先走。」潘景諭講道，「然後心怡又番到嚟，撞到佢咪送埋佢番去先。」

「哦⋯」邱茗然嘅內心忽然一陣酸溜溜嘅感覺飄過




IG Link: https://www.instagram.com/nd_cotttoncandy/?hl=zh-tw