［愛情純愛］我地之間嘅友誼純度絕對等於零！！！: 102. 甜品

「你快啲番去啦，如果唔係陣間邱旻顥鬧你。」潘景諭笑了笑講道

「嗯！我宜家番去㗎啦～」邱茗然露出可愛嘅笑容講道，「拜拜～」

邱茗然連忙好似逃跑一樣從兩人嘅身旁跑走，跑咗幾步後先慢慢停落嚟慢慢行，但又忍唔住回頭望一望潘景諭

「會唔會諭哥哥真係有中意嘅人⋯？」邱茗然喺心裏問道，望住兩人嘅背影，邱茗然嘅心就更苦

自己中意潘景諭，本來就係一場冇勝算嘅比賽，宜家嘅感覺就更似未比賽先結束一樣⋯





「佢會唔會係中意心怡姐姐⋯？」邱茗然喺心裏道，「心怡姐姐好呀⋯溫柔又有氣質，同諭哥哥好襯⋯」

所有人嘅初戀都係甜蜜而難忘，邱茗然嘅初戀係苦澀而難忘⋯

食完晚飯之後，邱旻顥起身行番房，正準備要坐低喺書枱前時，電話忽然之間響起嚟

「邱旻顥，你宜家得唔得閒呀？」電話裏頭傳嚟李逸彤活潑嘅聲線

「得呀，做咩？」邱旻顥坐低喺櫈上





「我整咗甜品，你要唔要呀？」李逸彤望住啱啱焗好嘅小型cupcake講道，「你要嘅話我宜家可以拎比你，新鮮出爐！」

「好呀！」邱旻顥一下子就答應

「咁我宜家落嚟啦～」李逸彤笑了笑講道

收咗線之後，李逸彤連忙換上拖鞋，拎住一袋小cupcake出門口

李逸彤行入電梯㩒咗25樓，電梯閂上門向下落，到咗25樓時響兩聲提示聲便打開門





電梯門一打開，李逸彤就見到邱旻顥已經企喺度等佢

「嗨～」李逸彤笑道，笑起嚟時眼睛都瞇起嚟成一條線，「晚上好～」

「你唔凍咩？唔著多件外套先出嚟？」邱旻顥一開口就係對李逸彤嘅關心，順便將李逸彤打量一番

「唔凍呀～」著住居家服嘅李逸彤講道

李逸彤著住短袖T裇同短褲，頭髮散着搭喺胸前，同平日番學嘅佢完全係兩個樣

「新鮮出爐嘅cupcake～嗱！」李逸彤將袋cupcake遞比邱旻顥

「多謝！」邱旻顥嘅手托住袋底，感覺到個袋有啲微暖，「你比咁多我呀？」

「嗯嗯！要食晒㗎！」李逸彤點點頭，「你要唔要先試一個呀？」





「做咩咁急要我試？」邱旻顥邊問邊打開膠袋

「睇下好唔好食呀嘛～」李逸彤伸手從袋中拎咗一個小 cupcake，將外面嘅包裝紙撕開後自然地將cupcake遞到邱旻顥嘅面前

「佢係打算⋯餵我⋯？」邱旻顥嘅眼神裏流露出一絲愕然同有啲慌張，什至有種受寵若驚嘅感覺

邱旻顥嘅上身微微前傾出去，微微張開口，李逸彤笑了笑後將小cupcake放到邱旻顥嘅口中，然後一臉期待咁望住邱旻顥

「好唔好食呀？」李逸彤期待地問道

「好食⋯」邱旻顥微微點頭然後笑了笑

「咁記得食晒喎～」李逸彤講道，「唔食晒嘅話，我會嬲㗎⋯！」





「咁為咗避免你會嬲，我一定會食晒。」邱旻顥將個袋綁番好

「嘻嘻⋯好啦～」李逸彤露出甜甜嘅笑容，然後轉身㩒制，「咁我番上去先啦～」

一直停喺25樓嘅電梯打開門，李逸彤轉身制入電梯

「嗯，聽日見。」邱旻顥微微點頭，朝李逸彤揮揮手

「嗯！聽日見～」李逸彤點點頭，手卻一直冇㩒閂門制

「你要等佢自己閂門？」邱旻顥無奈地笑問道

「懶得㩒。」李逸彤瞄一眼個閂門制，「等佢自己閂啦～而且可以見多你兩秒。」

「兩秒？多謝晒真係。」邱旻顥不禁一笑





當電梯門閂上時，李逸彤微微側着頭對邱旻顥揮揮手；邱旻顥望住手中拎住嘅甜品，心裏甜甜的，啱啱嗰件試味嘅都已經夠甜

⋯

邱旻顥換上白色嘅短袖裇衫，著上長褲，扣好皮帶，今日係換夏季校服嘅第一日

邱旻顥嘅校服都燙得筆直，整理好校服之後便換上番學嘅皮鞋出門口

當升降機門打開，邱旻顥一眼就望到李逸彤，著住夏季校服嘅李逸彤顯得更活潑開朗

「早晨。」「早晨～」

邱旻顯企喺李逸彤嘅身旁對佢低聲道





兩人同平日一樣一齊番學，因為李逸彤換上夏季校服嘅關係，邱旻顥不禁多望李逸彤兩眼，總會不自覺地偷瞄李逸彤

「我怕今日涼，特登帶定冷衫～」李逸彤對邱旻顥講道，好似期待邱旻顥讚佢一樣

「我都有帶定，喺書包。」邱旻顥講道

「唔知係唔係因為今日轉季，所以搞到我琴晚好緊張，有啲瞓唔著⋯！」李逸彤講嘅時候，邱旻顥一直默默地注視住佢嘅側面

李逸彤見邱旻顥一直冇出聲便望向邱旻顥，一望過去就見到邱旻顥定睛望住自己

「唔⋯做咩？」李逸彤微微側着頭問道，「我覺得我著夏季校服幾好睇呀⋯」

「呀？」邱旻顥呆一呆，然後一笑，「我咩都冇講呀～」

「好耐都冇著過夏季校服啦～夏天嚟到好開心～」李逸彤低頭望一望自己校裙嘅裙擺




IG Link: https://www.instagram.com/nd_cotttoncandy/?hl=zh-tw