［愛情純愛］我地之間嘅友誼純度絕對等於零！！！: 103. 鬆手
兩人行到去馬路前面，剛好呢條短馬路冇紅綠燈，只可以靠自己留意車輛過路
李逸彤行到馬路邊，見到離遠有一架私家車駛緊過嚟
「應該仲有一段距離先駛到。」李逸彤喺心裏估計道，然後就邁步行
李逸彤嘅右腳啱啱邁出，邱旻顥連忙捉住李逸彤嘅手，將李逸彤輕輕一拉，李逸彤向後行咗兩步
「做咩突然拉住我？」李逸彤不解地望向邱旻顥問道
「有車。」邱旻顥微微抬一抬下巴，私家車從眼前駛過
邱旻顥緊緊地垂手捉住李逸彤嘅手腕，李逸彤微微低頭望向自己嘅手腕，感覺邱旻顥就好似怕自己會走咗去一樣，用力地捉住自己
「你唔洗咁大力捉住我，我隻手都要斷啦～」李逸彤用開玩笑嘅語氣講道，上身微微前傾、側着頭望住邱旻顥，「你就唔可以溫柔啲咩？」
邱旻顥低頭一望，然後緩緩地將手鬆開，李逸彤嘅心裏莫名其妙地湧出一份空虛感，但呢份空虛感喺一瞬間變成溫暖
邱旻顥悄悄地拖住李逸彤嘅手，李逸彤嘅嘴角唔爭氣地微微上揚起嚟
「你都⋯好順手⋯」李逸彤輕輕抿唇，偷偷地瞄邱旻顥一眼，臉頰泛起淡淡嘅紅霞
「都⋯幾啦⋯！」邱旻顥朝李逸彤笑了笑，佢嘅耳根都紅透，心臟嘅跳動強而有力
邱旻顥自己都覺得可怕，自己嘅行動比自己嘅想法嚟得快，一秒都冇猶疑就伸手拖住李逸彤
「嘩⋯！我個心都要跳出嚟啦⋯！」李逸彤嘅內心激動地講道，騰出嚟嘅右手輕輕地放喺胸口上，「邱旻顥係唔係都想同我一齊⋯？最近佢好似成日都拖我⋯」
當兩人行到去月台時，李逸彤偷偷地望一眼邱旻顥，又望一望周圍，睇下有冇同級嘅同學喺附近
「做咩要咁偷偷摸摸咁？係佢拖我先㗎！」李逸彤嘅內心矛盾起嚟，「就算比人睇到，我又唔介意嘅～但好尷尬⋯明明我地都⋯未一齊⋯」
「李逸彤又真係唔打算甩開我⋯」邱旻顥喺心裏暗自高興
看似光明正大咁拖住手，但實際上大家都擔心比人睇到點算，要鬆手定繼續拖住手？
「邱旻顥，我地最近⋯好似成日都拖手⋯」李逸彤湊近邱旻顥嘅耳邊道，聲線裏夾雜着一種羞澀、一種旁人唔理解嘅甜蜜
「咁⋯鬆手？」邱旻顥望住李逸彤問道
與此同時，邱旻顥拖住李逸彤嘅手稍微提起，然後緩緩地鬆開；若然李逸彤係唔想拖手，咁喺邱旻顥嘅手完全灘開後，李逸彤嘅手便會垂低
邱旻顥微微耷低頭瞄一眼，李逸彤嘅手冇垂低，因為李逸彤輕輕地握住佢嘅手
「好彩佢冇真係鬆手⋯！」邱旻顥嘅心頓時鬆一口氣
邱旻顥抬眼望一望李逸彤，李逸彤嘅臉頰紅紅的，同邱旻顥對上視線
「呼⋯」李逸彤耷低頭將額頭靠喺邱旻顥嘅膊頭上，因為緊張而輕呼一口氣
心臟跳動嘅感覺嚟得更強烈，整個胸口都微微顫動着一樣；邱旻顥嘅指尖再一次輕輕地落喺李逸彤嘅手背上
呢種觸感令李逸彤更緊張，完全唔敢抬頭
「好想問佢，我地係咩關係⋯好想知佢係唔係都想同我一齊⋯！」李逸彤喺心裏緊張地講道，心臟噗噗跳動嘅感覺令佢覺得一切都有啲唔真實，「我覺得佢絕對係中意我！但我亦絕對唔想做先開口表白嗰個⋯」
列車駛入月台，車門緩緩打開，當兩人行到上車坐低時，手自然地鬆開了
「鬆開咗⋯」邱旻顥嘅心有啲空蕩蕩嘅感覺
邱旻顥中意拖住李逸彤嘅手嘅感覺，李逸彤嘅手比佢細，拖起嚟嘅感覺同拖住邱茗然嘅感覺好唔一樣
李逸彤嘅手總會有啲凍，但只要邱旻顥喺度，李逸彤嘅手就會變得好暖
「唔想鬆開⋯」李逸彤嘅內心有少許悶悶不樂嘅感覺，「但唔鬆開嘅話比人睇到會有啲⋯尷尬⋯」
當地鐵到站，李逸彤出行地鐵車廂時，偶然發現自己嘅鞋帶就嚟甩
「等等⋯」李逸彤細聲地講嘅同時行埋一邊蹲低綁鞋帶
邱旻顥自動地停落喺企喺李逸彤嘅身旁等埋佢
「Okay～」李逸彤綁好鞋帶起身
邱旻顥嘅手背不以為意地輕碰咗李逸彤嘅手背一下，李逸彤若無其事地垂着手，但手心卻默默地出汗了
「李逸彤你洗唔洗買早餐？」邱旻顥喺一輪沉默後緩緩地開口問道
「我比較想買嘢飲。」李逸彤講道，手捉一捉自己嘅校裙，「你要買早餐呀？我可以陪你去買咗早餐先～」
「好貼心。」邱旻顥忽然輕輕一笑講道
「日日都咁貼心好唔好⋯」李逸彤無奈地反一下白眼，「你冇發現咩？」
「唔⋯」邱旻顥望住李逸彤思考咗一陣，「間中啦～咁貼心得唔得？」
「對你最貼心啦～」李逸彤微微側着頭故意對邱旻顥講道，「你唔覺咩？」
「係咩？」邱旻顥不禁一笑，佢嘅笑容係因為李逸彤嘅笑容同說話，「你對我最貼心咩？」
「邊度唔貼心呀？我琴晚仲拎咗cupcake比你呀⋯！」李逸彤頓時反駁邱旻顥質疑般嘅提問，「我一整完第一時間就諗同你分享！唔貼心咩！」
李逸彤一臉委屈地撅着嘴，輕哼一聲後伸手打咗邱旻顥一拳，但呢一拳對邱旻顥嚟講不痛不癢
「明㗎啦～」邱旻顥對李逸彤點一點頭
「吓？明咩呀？」邱旻顥啱啱講嘅成句話冇頭冇尾，搞到李逸彤一頭霧水
「明啦明啦～」邱旻顥又笑一笑講道
「咩呀？明咩呀？」李逸彤輕皺起眉頭，好奇心大增，「邱旻顥，你明咩呀？」
邱旻顥只係聳聳肩、笑而不語；李逸彤嘅好奇心被撩起後一發不可收拾，佢淨係想知邱旻顥到底明啲咩
IG Link: https://www.instagram.com/nd_cotttoncandy/?hl=zh-tw