［愛情純愛］我地之間嘅友誼純度絕對等於零！！！: 106. 氣氛

「今日個氣氛咁唔對路嘅⋯」李逸彤喺心裏輕嘆一口氣，臉上掛上無奈嘅笑容，「咁落去都唔係辦法⋯」

潘景諭啱啱嘅表情，令沈心怡不禁諗起最近潘景諭病咗嘅時候對佢講嘅嘢，嗰啲說話其實令沈心怡心動，但係沈心怡唔會將呢啲感受擺出嚟，只會將佢地收喺心入面⋯

潘景諭對佢講嘅嘢佢都記得，但每次沈心怡都唔會選擇回應啲咩，只會笑一笑然後講其他嘢⋯

理所當然地，佢呢種迴避嘅方式，會令潘景諭有啲失去自信同時有啲難受

「彤彤，我⋯忽然醒起我好似漏咗嘢喺學校，我番去一轉⋯！」沈心怡忽然停下腳步對李逸彤講道





李逸彤同邱旻顥都停落嚟回頭望向沈心怡

「吓⋯？你漏咗咩呀？我陪你番去拎呀！」李逸彤喺此刻仲未意識到咩事

「唔洗，我番去拎就得啦！」沈心怡笑了笑講道

邱旻顥彷彿察覺到啲咩一樣，喺李逸彤想開口再講啲咩之前，垂手捉住李逸彤嘅手

「你捉住我做咩⋯？」李逸彤望一望自己嘅手，又望一望邱旻顥





「沈心怡都話自己番去拎，你就由得佢啦～」邱旻顥睇穿沈心怡想做嘅嘢，識趣地講道

「嗯！你地番去先啦～」沈心怡微微一笑講道，然後揮揮手，「拜拜彤彤～我地聽日見～」

「李逸彤，我地番去飲珍珠奶茶。」邱旻顥好順手就伸手繞過李逸彤嘅背，手搭喺李逸彤嘅膊頭上將佢輕輕地抱住一樣

「吓⋯？做咩一定要飲珍珠奶茶喎！」李逸彤一臉不解地問道，然後又望向沈心怡，「咁⋯我地聽日見啦心怡～」

「嗯！」沈心怡微微點頭，「拜拜～」





沈心怡轉身就走，邱旻顥鬆開手，手垂着輕輕地拉住李逸彤走

「洞察力好啲啦李逸彤⋯！」邱旻顥無奈地望李逸彤一眼，「連我都察覺到嘅嘢，你點解會察覺唔到？」

「吓？講緊咩？」李逸彤仍然未明白發生緊咩事一樣問道

「咁梗係講緊沈心怡啦⋯！」邱旻顥更無奈，對住李逸彤反咗個大大嘅白眼

「哦～」李逸彤嘅嘴角微微上揚，輕輕點一點頭，「仲以為你講緊你自己嘅嘢添～」

李逸彤望一眼自己比邱旻顥輕輕拉住嘅手，仍希望邱旻顥唔會鬆開手

「係呀係呀⋯咁番到去買唔買嘢飲呀？」邱旻顥無奈一笑問李逸彤

「買呀！點解唔買？」李逸彤用力地點頭，小跑兩步追上邱旻顥嘅步伐行喺佢身旁，「你話今日飲咩好呀邱旻顥～」





沈心怡邁着少許急促嘅步伐朝住潘景諭啱啱行嘅方向行去，好彩啱啱喺潘景諭走嘅時候，沈心怡有再回頭望一眼，知道潘景諭行邊一個方向

李逸彤回頭若有所思地望咗一眼，然後默默地微微一笑

「呼⋯」潘景諭輕呼一口氣，坐喺鞦韆上嘅潘景諭以好細嘅幅度前後搖晃着

佢嚟呢度唔係想同小朋友爭嘢玩，只係想避一避沈心怡，但又唔想咁快番屋企

「都唔知嬲咩⋯」潘景諭喺心裏自嘲般講道，「唉⋯」

潘景諭雙手捉住鞦韆嘅鐵鏈，頭仰起望住天空，整個人微微向後靠，鞦韆微微前後盪着

「佢人呢⋯？行得咁快⋯？」沈心怡東張西望，尋找着潘景諭嘅身影





沈心怡不自覺地邁步行入公園，直覺指引佢行呢一邊

「唔⋯佢人呢⋯」沈心怡喺心裏喃喃自語道，目光自然地落喺遠處，「原來喺度⋯！」

沈心怡小跑兩步，又急步行起嚟，心裏緊張同時覺得有啲不明所以

沈心怡一步一步行到去潘景諭嘅面前，潘景諭都冇留意到沈心怡喺度，佢只顧望住天空發呆

「呼⋯」潘景諭回過神輕呼一口氣，當佢打算住番好個人嘅時候，見到「憑空出現」嘅沈心怡，「⋯！」

潘景諭嚇咗一跳而鬆一鬆手，頓時失重心向後跌，潘景諭嘅手連忙拉住鞦韆嘅鐵鏈，沈心怡亦連忙伸手想拉住潘景諭

「冇事冇事⋯」潘景諭找回重心坐好，沈心怡便將手默默地收回

沈心怡企喺潘景諭嘅面前，潘景諭抬眼望一望沈心怡後又默默地微微耷低頭





「你⋯做咩嚟咗嘅⋯？」潘景諭抬眼望一望沈心怡，裝作若無其事地微微笑

「你唔係唔舒服咩？喺度做咩？」沈心怡嘅手緊握着晏就買嘅嘢飲，心臟緊張地噗噗跳

「冇⋯就係想坐陣再番去⋯」潘景諭聳聳肩，然後抬頭望向沈心怡

潘景諭冇講大話，佢的確係想喺度坐一陣先再番屋企

「你點解喺度⋯？」潘景諭再一次問沈心怡，呢個問題嘅答案，係潘景諭所在意嘅事

潘景諭定睛地望住沈心怡，佢等待着沈心怡嘅回答，佢想知道沈心怡嚟呢度嘅原因同佢心中所想嘅原因係唔係一樣

「佢係因為在意我、中意我⋯所以先嚟呢度搵我⋯？」潘景諭喺沈心怡比出正確答案前，喺心裹先一步猜想





「咁啱想嚟行下⋯」沈心怡冇講出佢嚟呢度嘅真正原因

當潘景諭就喺佢面前時，沈心怡忽然間無法講出自己心中真正嘅想法⋯喺潘景諭嘅面前，沈心怡就係咁樣，總會下意識地將自己嘅想法收起⋯

「嗯⋯」潘景諭微微點頭

兩人又沉默咗落嚟，潘景諭坐喺鞦韆上前後搖晃着，沈心怡唔知講咩好

「你快啲番去啦⋯」良久，潘景諭先開口用着催促嘅語氣對沈心怡講道

「咁你呢？」沈心怡卻企喺原地反問潘景諭

「我坐多陣就番去。」潘景諭隨口講道

「咁我同你一齊坐多陣。」沈心怡唔等潘景諭嘅答覆就行到潘景諭旁邊嘅鞦韆坐低，雙手捉住鐵鏈

潘景諭望向沈心怡，沈心怡嘅心思，潘景諭真係睇唔清⋯佢好似永遠都唔會知道沈心怡下一步會點做、會講啲咩，捉摸唔到佢嘅想法係點⋯




IG Link: https://www.instagram.com/nd_cotttoncandy/?hl=zh-tw