［愛情純愛］我地之間嘅友誼純度絕對等於零！！！: 107. 兩回事
「我要講啲咩先啱⋯？」沈心怡喺心裏道，「無理由一直咁樣落去⋯」
沈心怡明明係在意潘景諭嘅想法，但佢卻唔知道要點樣開口同潘景諭講⋯
「鼓起勇氣直接問啦⋯！」沈心怡喺心裏講道，佢打算一鼓作氣就問出口，唔諗咁多：「你到底唔開心緊啲咩？我在意。」
沈心怡直接開口問出佢想要問嘅嘢、回答潘景諭今日晏晝問佢嘅嘢
「因係覺得你好似係嬲緊我一個咁⋯所以先會好在意⋯」沈心怡下意識就對潘景諭解釋道
「哦⋯唔係呀。」潘景諭耷低頭苦笑道，喺誠實回答同講大話之間，揀咗講大話，「同你冇關係⋯」
沈心怡定睛地望住潘景諭，內心思考着潘景諭對佢講嘅「同你冇關係」係唔係真係同佢冇關係，女仔天生嘅直覺話佢知，潘景諭講大話⋯
「你話心怡會唔會係去咗搵潘景諭？」李逸彤問邱旻顥
「唔出奇，佢會去搵潘景諭。」邱旻顥嘅目光從手機螢幕上移開，「有機呀潘景諭！」
「心怡會唔會中意潘景諭⋯？」李逸彤嘅大腦思考中，佢細聲地講道，好似自言自語，但又似係問緊邱旻顥
「唔知呀～可能會掛。」邱旻顥若有所思地回答道，佢諗起上次只有佢同潘景諭、沈心怡一齊放學時，沈心怡唔明顯嘅舉動
邱旻顥覺得沈心怡嘅舉動好似已經表明咗佢嘅小心事⋯但沈心怡嘅舉動比邱旻顥嘅感覺，係沈心怡猶疑緊要唔要拉近同潘景諭之間嘅距離，但又默默地拉開距離⋯
「早知跟埋去睇下啦⋯！」李逸彤扁一扁嘴，一臉可惜地講道
「吓？」邱旻顥頓時一笑，「你跟埋去有咩用？唔通潘景諭會真係同沈心怡表白咩？定沈心怡會表白？」
「以我對心怡嘅了解，心怡一定唔會做先表白嗰個！」李逸彤自信地講道，佢自問自己對沈心怡嘅了解真係冇9成都有8成
「呢個我就唔知啦～」邱旻顥講道
「我覺得潘景諭會做先表白嗰個。」李逸彤認真地講道，「男仔做主動表白嗰個比較好。」
「點解男仔一定要做表白嗰個？女仔唔可以做表白先嗰個咩？」邱旻顥嘅大腦稍微運轉咗一下後問道
「其實冇咩分別，但我覺得男仔做主動表白嘅嗰一個比較好⋯」李逸彤忽然間有啲唔自在嘅感覺，覺得自己咁樣講好似有啲暗示一樣
「嗯。」邱旻顥望住李逸彤微微點頭，臉上掛上淡淡嘅笑容
李逸彤同邱旻顥對望，邱旻顥側着頭望住李逸彤，李逸彤輕輕抿唇，然後舔一下唇
「呀～搞到好似我好主動要佢同我表白咁⋯！」李逸彤喺心裏尷尬地講道，「如果佢唔係咁諗嘅話，我就真係太自作多情啦⋯！」
「咳咳⋯！你應該唔係暗示緊啲咩？」邱旻顥尷尬地咳咗兩聲，耳根都變紅了
「我要暗示啲咩？」李逸彤嘅臉頰泛起淡淡嘅紅霞，扮唔明白反問邱旻顥
「點知你想點？」邱旻顥輕輕一笑道
李逸彤抬眼，望住邱旻顥嘅眼神中快要慘出蜜糖一樣；李逸彤甜甜一笑後將視線移開，然後伸手握拳，喺邱旻顥嘅手臂上輕輕地打咗一下
甜蜜又曖昧粉紅色嘅泡泡一觸即破，兩人相視而笑，咩都冇講卻又好似明白對方想講嘅事
到底係先有默契後有了解，定係先有了解後有默契？
「係唔係差唔多⋯可以表白⋯？」邱旻顥望着李逸彤嘅同時不禁喺心裏問道，「李逸彤大概⋯會接受我⋯？應該⋯」
喺公園嘅沈心怡同潘景諭仍然沉默中，沈心怡想知道潘景諭心情唔好嘅原因，潘景諭唔想講比沈心怡知真實嘅答案
「真係唔關我事？」沈心怡追問道，佢嘅內心唔相信呢個係事實，「真係？」
「嗯，真係。」潘景諭認真地回答，佢仍然冇講真話
沈心怡定睛地望住潘景諭，然後輕嘆一口氣
「明明就關我事，做咩要話同我冇關係⋯」沈心怡嘅內心感覺有啲失落
面對潘景諭嘅否認，沈心怡心裏有種難以言喻嘅難受，但佢冇打算開口再追問落去嘅打算，因為再問都好，潘景諭唔講就係唔講
「中唔中意同可唔可以一齊，係兩件事⋯」沈心怡將手放到大腿上，微微耷低頭望住自己嘅手，手輕輕地捉住校裙嘅裙擺
沈心怡稍微抬頭，目光落喺坐喺旁邊鞦韆嘅潘景諭身上，目光停留咗兩秒，沈心怡收回視線，又一次微微耷低頭
喺沈心怡嘅眼中，潘景諭係其他人眼中嘅焦點，亦係佢一直注視着嘅人，就算再想忽略都好，潘景諭都可以吸引到佢嘅注意力
中意一個人但冇諗過要一齊，係因為唔夠中意定因為覺得冇需要一齊？或者仲有第三個答案：覺得自己太平凡而冇自信
望住沈心怡嘅沉默安靜，潘景諭有啲灰心，佢知道自己係因為中意沈心怡而嬲
只有喺面對沈心怡嘅時候，潘景諭先會有咁多情緒，先會有起伏不定、手足無措嘅感覺⋯因為患得患失嘅感覺，令潘景諭面對沈心怡時特別緊張
「唔⋯我都差唔多番去啦⋯」潘景諭忽然間企起身，拎起放喺旁邊嘅書包，將其中一邊先孭到身上，「你都快啲番去啦⋯我冇事，你唔洗擔心我⋯」
沈心怡回神過來望向潘景諭，大腦清晰地話比自己知潘景諭打算離開
「你番去呀？」喺潘景諭打算轉身之際，沈心怡連忙企起身問道
「嗯，今日我心情唔係太好，就唔送你番去啦。」潘景諭擠出一個笑容，但喺沈心怡眼中睇起嚟，只係一個用嚟敷衍佢嘅表情，「Sorry我走先啦⋯」
潘景諭轉身正要邁步之際，沈心怡行上前伸手將潘景諭拉住，潘景諭心裏感到意外同時回頭望向沈心怡
「嗯？」潘景諭輕皺一下眉頭，「做咩⋯？」
IG Link: https://www.instagram.com/nd_cotttoncandy/?hl=zh-tw