［愛情純愛］我地之間嘅友誼純度絕對等於零！！！: 108. 回答

「你都未答我你點解嬲⋯」沈心怡好似隨口地講一個理由去留住潘景諭一樣

其實連沈心怡都唔知點解自己會用呢個理由叫潘景諭留低⋯或者係一時衝動，又或者係內心嘅始終嘅在意驅使佢伸手

「都話同你冇關⋯你咁在意做咩啫？」潘景諭輕皺一下眉頭，沈心怡嘅追問令佢感到有啲煩躁

「因為你明明係嬲緊我，但你偏偏話同我冇關⋯！」沈心怡聽出潘景諭語氣中嘅唔耐煩，頓時有啲無名火起

潘景諭頓時無話可說，望住沈心怡委屈但又氣沖沖嘅模樣，潘景諭無奈地嘆一口氣





「冇呀真係⋯咁真係同你冇關係⋯」潘景諭無奈地撇開臉同時講道

「你睇你仲唔係講大話！？你次次一講大話就唔望我㗎啦⋯！」沈心怡一臉認真地講道

潘景諭更無奈，佢淡淡然地瞄一眼沈心怡，佢幾時有個咁嘅習慣，連自己都唔知？

「嗯⋯」潘景諭敷衍地點一點頭

沈心怡見潘景諭冇講嘅打算，猶疑咗一下之後將潘景諭嘅手鬆開





「唔講就算，隨你中意。」沈心怡淡然地講道，轉身打算走

潘景諭頓時回頭望向沈心怡，見到沈心怡真係轉身就行

「佢真係由得我㗎喎⋯！」潘景諭嘅內心頓時又嬲又無奈，連忙轉身大步朝沈心怡快步行去，一手捉住沈心怡，「你又真係直接走㗎喎！」

「咁我問你嬲咩你又唔講，問你係唔係嬲我你又話唔關我事⋯！」沈心怡轉身面向住潘景諭不忿地講道

「咁你就唔可以在意多啲咩？」潘景諭皺起眉頭問道，「咁我唔答你，你就唔可以追問咩？」





潘景諭忽然間覺得自己好似女仔一樣麻煩，忽然間覺得自己好似喺度無理取鬧一樣：明明係自己先講同對方冇關係，但當對方唔再追問時就開始發脾氣

「你自己話同我冇關係！我問咗你，你唔講咋嘛！」沈心怡更嬲，臉頰都變得紅紅的

潘景諭不禁一怔，識沈心怡以嚟，都冇見過佢會有呢種怒氣匆匆嘅情緒

本來就因為潘景諭突如其來嘅冷淡而唔高興嘅沈心怡，宜家仲要承受潘景諭莫名其妙嘅脾氣，心裏又嬲又委屈

沈心怡望住潘景諭一臉愕然嘅模樣後便安靜咗落嚟，好讓自己先冷靜一下，佢唔想強逼潘景諭講，既然潘景諭都唔想講嘅話

「唉⋯我好地地做咩對佢發脾氣⋯」潘景諭喺心裏後悔地講道，佢知係自己情緒化，但佢唔係真係想對沈心怡發脾氣

潘景諭唔知要點樣開口令氣氛緩和，佢唔想沈心怡唔開心，但佢亦講唔出口自己嘅發脾氣係因為沈心怡講嘅一句說話

「算啦⋯」良久，沈心怡重重地呼一口氣，緩緩地開口，聲線聽起嚟好似已經下咗一半火，「我冇打算逼你講，你話唔係嬲我就唔係嬲我啦⋯」





潘景諭沉默落嚟，沈心怡嘅雙眼都冇望過潘景諭，佢始終微微耷低頭⋯

就算口講一句「算啦」又係唔係真係算？在意嘅人同事，邊可能用一句「算啦」就唔再在意？

「沈心怡，你唔可以對我在意多啲？」潘景諭忍唔住問出心底話

「潘景諭，你上次病咗，係邊個買退熱貼比你？」沈心怡反問道，本來已經快要熄滅嘅火因為潘景諭嘅一句又點燃了

聽到潘景諭話自己唔在意佢， 沈心怡嘅內心都唔覺得嬲，淨係覺得比啱啱更委屈

「咁又點⋯」潘景諭雙眸裏嘅光忽然黯淡起嚟，佢嘅腦海中飄過沈心怡喺晏晝時講嘅嘢，潘景諭嘅聲線冷冰冰地道：「我地又唔會有可能⋯」

沈心怡呆咗一呆，佢望住潘景諭，大腦思考着潘景諭嘅說話嘅意思





正當沈心怡想開口講嘅咩嘅時候，潘景諭先一步開口：「我今日真係心情唔好⋯我真係唔想發脾氣⋯」

潘景諭其實係見到沈心怡想開口，所以先開口打斷，佢怕沈心怡再追問落去，自己會一下子忍唔住講咗中意沈心怡呢件事出嚟

「你啱啱⋯係咩意思⋯？」沈心怡回過神，半信半疑地開口問道

「心情唔好。」潘景諭淡然地回答道，語氣亦唔再係唔耐煩嘅狀態

「前一句⋯」沈心怡定睛望住潘景諭，眼神裏係疑惑、係好奇，內心掀起一陣陣浪花

潘景諭瞬間沉默，佢要點樣解釋？衝口而出嘅說話，就係內心最真實嘅反應，要點樣為呢種真實解釋？

「字面嘅意思⋯」潘景諭唔願意解釋，反正再解釋都好，結果都係一樣，「你自己都係咁講㗎⋯」

沈心怡恍然大悟，佢終於知道潘景諭嬲嘅原因，原來就係因為自己咁樣講咗一句





「如果佢唔係中意我⋯佢又點會因為我咁樣一句而嬲⋯？」沈心怡喺心裏遲疑地道，「但⋯真係會係咁咩⋯」

沈心怡都冇辦法用呢個理由說服自己，喺沈心怡嘅心中，潘景諭可以有一千個嬲嘅理由，但偏偏潘景諭中意自己呢個理由係機會最細

沈心怡一聲不吭，只係定睛望住潘景諭，潘景諭瞄咗沈心怡一眼又默默地將視線移開

「嗯⋯」沈心怡心虛地點一點頭

沈心怡冇得否認，因為佢的確係咁樣講，而且潘景諭都已經親耳聽到

「所以你係嬲緊呢樣？」沈心怡喺心裏問道，佢好想直接咁樣問潘景諭，但認真一諗，若然潘景諭答佢係，沈心怡可以比咩反應？

沈心怡最後都係選擇將想問嘅嘢收喺心中，潘景諭望沈心怡一眼，第一次知道原來自己嘅佔有慾都唔弱





「好啦，我送你番去先啦。」潘景諭眼見沈心怡一臉不知所措般企喺度，便行到沈心怡嘅面前，雙手捉住佢嘅膊頭將佢成個人轉180度

「呀？你唔係唔舒服咩⋯？」沈心怡抬頭望向潘景諭，一臉天真同時又擔心地問道

潘景諭沉默不語，只係淡然地望沈心怡一眼；沈心怡對佢嘅關心，令潘景諭覺得有啲心甜

「冇事啦。」潘景諭淡然地講道




IG Link: https://www.instagram.com/nd_cotttoncandy/?hl=zh-tw