［愛情純愛］我地之間嘅友誼純度絕對等於零！！！: 112. 細微

「有時連我自己都有種⋯喺呢種感覺呢種曖昧入面迷失嘅感覺⋯」李逸彤嘅手摸一摸自己嘅衫角，耷低頭時，眼裹都係陣陣迷惘，「可能因為個感覺就好似我同邱旻顥太似已經一齊咗，但其實又未一齊，所有嘢又太自然⋯所以顯得有啲lost⋯」

「其實最重要都係你地兩個係點樣睇對方，點樣對待呢個問題啫⋯」沈心怡若有所思，有少許遲疑地回答道，「冇人話一定要經歷啲好深刻嘅表白同回憶先可以喺埋一齊，可以係兩個人簡簡單單、好自然咁樣一齊都得，都係睇你地㗎咋嘛～可能邱旻顥覺得未到表白嘅時機呢～」

沈心怡嘅回答令李逸彤思考起嚟，時機⋯點先叫一個啱嘅時機？要喺大時大節？要喺好有紀念價值嘅日子？定係要點⋯？

「我覺得，以邱旻顥嘅性格，唔會做令你唔自在嘅事，佢一定會以你嘅想法行先。」沈心怡講道，呢個係佢對邱旻旻嘅少少觀察加了解，「真係有眼嘅人都會睇得出，佢係中意你。」

「咁我又冇覺得佢唔中意我⋯唔多唔少都feel到嘅⋯」李逸彤喺晏晝後久違地露出淡淡嘅笑容，「至少我覺得自己係同其他人唔一樣，對佢嚟講⋯」





「我覺得你地喺埋一齊係遲早嘅事，只可以咁講⋯」沈心怡用一句說話將一切做一個總結，「至少係雙向。」

「做咩講到好似好sad咁⋯？」李逸彤輕皺一下眉頭，但聽到沈心怡嘅總結，心裏又好似鬆咗啲，沉重嘅大石好似變輕咗少許

雙向喜歡，可以係一件簡單又不失浪漫嘅事

「係呢彤彤你⋯當初點知邱旻顥中意你⋯？」沈心怡有少許好奇地問道，「你就咁肯定佢係對你有意思？」

「唔⋯其實嘛⋯只係觀察一下，再加上個人嘅直覺⋯」李逸彤回想一下，仔細回想後先發現自己好似喺回神時就察覺到一樣





李逸彤嘅腦海中默默地浮現出喺佢同邱旻顥啱啱熟嘅時候嘅相處，開始係因為一句「多謝」同一句「舉手之勞」；好感係因為兩人嘅目光真正相交嘅時機；心動係因為日常嘅細節同好感累積而嚟

可能連李逸彤自己都冇諗過自己會中意邱旻顥，雖然係同班同學，但一直以嚟都唔太熟

當初兩人話題嘅開始，係邱旻顥錯手喺睇story時send咗個emoji比李逸彤，但又唔知應唔應該刪咗佢當冇事

由偶爾reply對方嘅story到問功課；由問功課到偶爾閒聊；由偶爾閒聊到每日都會同對方傾計；由每日傾計嘅習慣到對方未覆機時會緊張不安；由呢種細微又唔起眼嘅情緒到發現自己期待翌日碰面⋯

每一個過程，都係逐少逐少咁將彼此之間嘅距離拉近，只要對方一出現，眼裏就只有對方一樣⋯





「其實就係啲好簡單好細微嘅事，好似佢唔會抗拒同我行得近，唔會抗拒人地拎我地嚟講笑，唔會抗拒同我私下出街⋯」李逸彤不自覺地露出淡淡嘅笑容，「可能都係啲好平常、可以對所有人做嘅事，但我一直都會默默留意佢呀～」

「佢有直接表示佢中意你？」沈心怡好奇地追問道

「梗係冇啦！邱旻顥橫睇掂睇都唔似嗰啲將中意唔中意掛喺嘴邊嘅人～」李逸彤笑道，「感受加上留意再加上直覺啦算係～係一次又一次喺傾計嗰陣不經意嘅試探同提問所得。」

李逸彤諗起邱旻顥有時會不以為然咁捉住佢、拉住佢嘅手，若然係冇好感，又點會肯有咁明顯嘅身體接觸？

當然係基於李逸彤對邱旻顥嘅了解，知道邱旻顥唔係見女就撩嘅人，而且李逸彤都幾信自己嘅直覺

「本來就係咁呀～中意本來就係咁樣嘅一回事，同中意嘅人相處，本來就係一種試探⋯」李逸彤將手機嘅notice拉落嚟，望住邱旻顥喺不久前send比佢嘅一個問號

「你story嗰個po，係po比佢睇？」沈心怡笑了笑問道，女仔最明白女仔，所以其實都有少少明知故問，「佢睇得明㗎啦？」

「佢覆咗我添啦～」李逸彤自豪地講道，但下一秒又嘆一口氣，「但我未覆⋯」





李逸彤喺沈心怡同佢講嘢嘅時候，㩒入IG同邱旻顥嘅對話框中，諗緊要點樣回覆邱旻顥先啱

「邱旻顥知道我想講咩⋯我諗係⋯」李逸彤望住手機嘅螢幕，雙手一動不動地停喺鍵盤嘅上方，「呀⋯點覆佢好⋯？覆兩個問號比佢⋯」

李逸彤真係直接send咗兩個問號比邱旻顥，本來頹廢地灘喺床上打機嘅邱旻顥見到李逸彤嘅回覆，頓時坐起身㩒入通知

「覆番兩個問號比我做咩⋯」邱旻顥無奈地望住李逸彤send過嚟號兩個問號道，然後又回覆：「？？？」

李逸彤：覆問號比我做咩？

「因為你覆咗問號比我（笑喊）」邱旻顥回覆時加上emoji，免得氣氛太嚴肅似的

邱旻顥見剛send出去嘅message下方彈出seen嘅通知，但李逸彤卻遲遲冇打字輸入啲咩，邱旻顥就有種坐不住嘅感覺，連忙又覆入道：「做咩share啲咁sad嘅語錄」





望住代表輸入中嘅省略號，邱旻顥心裹更緊張，感覺到心臟緊張地噗噗跳着，望住跳動號省略號，邱旻顥更好奇李逸彤係打算回覆佢啲咩

李逸彤：有感而發

李逸彤：嗯嗯，覺得好有道理

「有感而發⋯」邱旻顥望住呢四個字，有種無言以對嘅感覺喺心底浮出嚟，但卻只可以默默地回一句：「道理喺邊⋯」

邱旻顥懷疑李逸彤根本就係因為佢喺放學之後講嗰句「如果係夠中意，無論邊個都會開口」而有感而發

「唉⋯點搞⋯」邱旻顥細聲地講道，與其懷疑李逸彤有感而發嘅原因，不如諗下點氹番李逸彤好過⋯








IG Link: https://www.instagram.com/nd_cotttoncandy/?hl=zh-tw