［愛情純愛］我地之間嘅友誼純度絕對等於零！！！: 113. 笑而不語
翌日朝早，邱旻顥特登早咗少少出門口，喺樓下等李逸彤
李逸彤推門行出大堂，見到邱旻顥就企喺一旁時疑惑咗一秒，然後直接行到邱旻顥嘅面前
「早晨～你喺度嘅？」李逸彤同平日一樣對邱旻顥打招呼，「等人呀？」
「等緊成日同我一齊番學嗰個囉～」邱旻顥指一指李逸彤
「哦～」李逸彤忍着笑意點一點頭，然後提手指一指旁邊，「咁⋯我行先啦～」
李逸彤若無其事就行開，邱旻顥連忙跟上，拍一拍李逸彤嘅膊頭
「你唔係等人咩？」李逸彤故意問邱旻顥，明知道邱旻顥係等緊自己，卻偏偏當唔知，「唔等啦？」
「唔等啦～你出咗嚟啦嘛～」邱旻顥聳一聳肩講道，擺出一副無所謂嘅表情
「你唔等唔怕人地嬲呀？」李逸彤問道，望住李逸彤一臉好奇嘅模樣，邱旻顥沒好氣地笑了笑
「咁你有冇嬲呀？」邱旻顥望向李逸彤
邱旻顥今日一大清早就喺度等李逸彤，當然係因為琴晚李逸彤冇覆佢message就自己消失咗，呢一點令邱旻顥格外在意，李逸彤都冇試過咁樣一言不發就消失
「嗯？」李逸彤心虛地將視線稍微移開，然後又將視線移番嚟，「我冇嬲呀～做咩我要嬲？」
「以為你嬲我琴日講嘅嘢⋯」邱旻顥微微耷低頭講道，語氣中夾雜着少許不確定
「呀⋯」李逸彤嘅雙眼微微瞪大，下一秒若無其事地微微一笑，「我冇呀～你以為我琴日po嘅嘢係因為我⋯唔開心⋯？」
邱旻顥沉默不語，若然自己回答「係」，咁樣好似直接講出心聲一樣；李逸彤偷望邱旻顥一眼，李逸彤就算唔係90%了解邱旻顥，都有70%，佢輕輕抿唇，喺心裹輕輕地嘆一口氣
「我又唔係啲咁小氣嘅人，都話有感而發，唔信我呀？」李逸彤用輕鬆嘅語氣講道，然後伸手輕撞邱旻顥嘅手一下，上身微微前傾望向邱旻顥
「唔似，最大方係你啦李逸彤～」邱旻顥無奈一笑，自然地提手將手放到李逸彤嘅膊頭上靠着，「琴晚又唔覆機⋯」
「我瞓著咗嘛～」李逸彤唔好意思地笑一笑，然後探頭問道，「你嬲呀？唔好嬲啦～最多陣間請你食三文治？」
「請食早餐就唔洗啦，我又冇嬲。」邱旻顥望李逸彤一眼後搖搖頭
「哦，咁好啦～」李逸彤只係微微一笑
李逸彤偷偷地將目光放到邱旻顥身上，的確因為邱旻顥講嘅嘢令琴日嘅佢有少少情緒，但今日一起身就冇事
「呼～」李逸彤輕呼一口氣，抬頭望一眼藍天，今日嘅天空飄着幾塊白雲
感覺今日嘅心情好好，或者因為今日天公作美
喺去到平日買早餐嘅小店時，李逸彤加快兩步行到小店前，企喺幾款三文治前思考着
「今日食邊款好？你話呢？」李逸彤自然地提手拉咗邱旻顥嘅手腕兩下，手仍然捉住邱旻顥嘅手腕
「你決定，你唔係食腿蛋就餐蛋㗎啦。」邱旻顥由得李逸彤拉住自己，另一隻手拎起一份裝住餐蛋治嘅三文治盒
「嘻嘻⋯你講得啱！」李逸彤望向邱旻顥一笑，兩人對上視線
李逸彤喺鬆手時，手故意向下滑，纖幼嘅指尖掃過邱旻顥嘅手心；邱旻顥因為覺得手心痕，頓時握起手，捉咗李逸彤嘅手一下
本來已經將視線移開嘅李逸彤比邱旻顥突然捉手嚇咗一下，頓時望向邱旻顥
邱旻顥同李逸彤對望，邱旻顥嘅耳根淡紅，稍微瞇一瞇起雙眼望住李逸彤，李逸彤調皮地吐一吐舌頭笑了笑；感覺啱啱李逸彤除咗掃過佢嘅手心外，仲掃到入心，搞到有啲心癢難耐嘅感覺⋯
「李逸彤學壞啦⋯」邱旻顥不禁紅了臉頰同時喺心裏道，臉頰有啲熱
「鬆手？」李逸彤望住邱旻顥，用一副可愛嘅模樣問道，看似係叫邱旻顥鬆手，但語氣卻係叫邱旻顥唔好鬆手
「今次鬆手。」邱旻顥緩緩地將李逸彤嘅手鬆開，微微點頭
「咁下次呢？」李逸彤連氣都唔比邱旻顥喘一下頓時問道
邱旻顥淡然地望一望李逸彤，臉上掛上淡淡嘅笑容，笑而不語
「邱旻顥會唔會察覺唔到我中意佢⋯？」李逸彤喺心裏問同時，目光停喺邱旻顥嘅身上，「會察覺到掛⋯」
李逸彤輕輕抿唇，喺邱旻顥冇留意到嘅時候，李逸彤伸手輕輕地拉一下邱旻顥嘅書包帶，然後又默默地將手收回
買完早餐，兩人行番學校喺小食部買嘢飲，買完嘢飲打算番課室嘅時候，李逸彤忽然拉一拉邱旻顥
「今日，不如喺度食買先上去⋯」李逸彤講道
「你想喺度食埋先？」邱旻顥有啲疑惑，因為平時佢地都係喺課室食早餐，好少會喺小食部食完先上去
「嗯！好唔好呀？」李逸彤又問多一次
「哦⋯好呀⋯」邱旻顥遲疑地答應
李逸彤行到最近佢地嘅一張枱坐低，將書包除落嚟放喺隔離嘅櫈上
邱旻顥坐低喺李逸彤嘅對面，李逸彤自顧自地將三文治盒拆開，邱旻顥喺拆開三文治同時抬眼望李逸彤一眼
「今日好似⋯邊度怪怪地咁⋯」邱旻顥喺心裏疑惑道
李逸彤拎出手機放喺枱面，喺IG睇到好笑嘅嘢時同平時一樣會share比邱旻顥，但邱旻顥卻覺得有邊度唔一樣
「呀⋯Sorry，我冇心。」李逸彤唔小心踢咗邱旻顥一腳，便低頭望一望枱底
邱旻顥故意踢咗李逸彤一腳，李逸彤頓時一副忍笑嘅模樣瞪邱旻顥一眼
IG Link: https://www.instagram.com/nd_cotttoncandy/?hl=zh-tw