［愛情純愛］我地之間嘅友誼純度絕對等於零！！！: 117. 一時半刻

李逸彤坐番埋位，邱旻顥早就坐喺位伏着小睡片刻；李逸彤轉身望一望邱旻顥，然後拎起手機偷影一張邱旻顥嘅相

「李逸彤⋯」邱旻顥忽然間緩緩地開口叫李逸彤嘅名字，李逸彤嚇咗一跳，頓時將手機收起

「咩呀？」李逸彤若無其事地問道，仲要側側頭望下邱旻顥有冇望到自己

「陣間叫醒我⋯」邱旻顥嘅聲音裏夾雜着少許疲倦

「哦⋯」李逸彤無奈地哦一聲回答





當李逸彤轉身坐番好之際，李逸彤先發現邱旻顥冇講清楚「陣間」嘅意思到底係幾時，係五分鐘後？十分鐘後？定打鐘前一分鐘？

「你話陣間⋯」李逸彤回頭想追問時，句子講咗一半又冇再講落去，只係喺心裏柔聲道：「算啦⋯陣間打鐘前叫佢啦⋯」

坐喺位溫緊測驗嘅潘景諭，本來有嘢唔明想問沈心怡，但佢想開口時，又諗起琴日嘅事，覺得有啲尷尬，唔想同沈心怡講嘢

「問邱旻顥⋯」潘景諭第一個諗到可以問嘅人就係邱旻顥，但望向邱旻顥嗰邊嘅時候，見到邱旻顥伏喺枱上瞓緊，「問唔問李逸彤好⋯但係李逸彤一定會覺得我點解唔問沈心怡⋯」

潘景諭望一望沈心怡，總覺得唔知點樣開口先係，但佢又唔知可以問邊個





「問心怡嘅話好尷尬⋯雖然講咗話當冇事發生，但點可能真係100%當冇事⋯」潘景諭嘅內心有啲掙扎，「咁我都係問學習上嘅嘢啫，又唔係講啲咩嘢⋯」

潘景諭用眼睛嘅餘光望沈心怡一眼，睇下沈心怡做緊啲咩，沈心怡好似都係坐喺位溫緊書之類冇咩特別

「唉⋯死就死啦⋯！」潘景諭喺心裏鼓勵自己道，唔知仲以為佢要做啲咩偉業，「呃⋯沈心怡⋯」

「係⋯？」沈心怡有啲訝異地抬頭望向潘景諭，同時覺得有啲尷尬嘅感覺喺一剎那湧出嚟

「呢度⋯係點解？」潘景諭拎起書遞比沈心怡睇，沈心怡盡自己能力解釋比潘景諭聽，「唔該⋯」





沈心怡微微點頭，兩人之間嘅距離又拉遠咗⋯

「講咗唔逼佢，就唔可以逼佢比答覆我⋯」潘景諭喺心裏對自己道，壓抑着同沈心怡嘅距離拉遠嘅難受，「本來就係我衝動同佢表白⋯衝動嘅行為仲可以期望有啲咩回覆⋯？」

嗰日沈心怡冇比出一個回答潘景諭，因為就喺沈心怡要講啲咩嘅時候，潘景諭打斷咗沈心怡嘅說話⋯

「佢嗰日就算係答我，都應該係拒絕⋯」潘景諭自己心中有數

喺沈心怡想要回答啲咩嘅一刻，潘景諭嘅心臟用力一縮，佢唔敢聽沈心怡嘅回答⋯從沈心怡嘅反應就睇得出，沈心怡好大機率都係拒絕，潘景諭怕⋯

「如果我同沈心怡嘅關係都可以好似邱旻顥同李逸彤咁⋯係唔係會簡單好多⋯」潘景諭不禁喺心裏問道，佢羨慕邱旻顥同李逸彤之間嘅關係可以如此明確

話佢地關係明確，係因為邱旻顥知道自己係可以表白、知道李逸彤唔會拒絕，唔表白係邱旻顥嘅選擇，佢有得揀

彼此都知道「唔表白」係一個選擇，而唔係因為會被拒絕而唔表白





「唉⋯宜家兩頭唔到岸⋯」潘景諭喺心裏慨嘆道，心入面有種無力感，「如果我琴日冇打斷沈心怡嘅話，佢本來會想答我啲咩⋯？」

潘景諭伏低喺枱上，呢個無解嘅問題令佢嘅大腦好混亂，好似點諗都唔會諗得清一樣⋯

「佢會唔會打算答應我⋯？會唔會係咁樣⋯定佢會猶疑一陣，然後拒絕我？」潘景諭喺心裏猜想，但琴日嘅事已經成為過去，潘景諭宜家再諗都唔可能知道，被佢打斷嘅說話係一個點樣嘅回答

沈心怡眼睛嘅餘光留意到潘景諭伏低，便以小幅度轉頭望向潘景諭嘅方向，偷瞄潘景諭一眼

沈心怡嘅心無法平靜落嚟，或者係因為潘景諭琴日突然間嘅表白剎佢一個措手不及，令佢手足無措

「就算我承認我係中意都好⋯」沈心怡嘅心情都受潘景諭影響，「我覺得⋯阿諭中意我或者都只係一時間嘅好感⋯」

沈心怡望住書發呆，諗起潘景諭嘅表白，沈心怡就會不自覺地陷入矛盾嘅狀態⋯自己明明係中意潘景諭，但當潘景諭表明自己嘅心意時，卻又下意識地退後⋯





沈心怡一想放空嘅時候，腦海中就會頓時淨現出潘景諭同佢講嘅嘢

「我係認真，唔係講笑。」

「你唔洗覺得有壓力，我⋯唔會逼你做決定⋯」

「所以你就當冇事發生就可以⋯！」

當時潘景諭嘅笑容係苦澀嘅味道⋯沈心怡總會諗起潘景諭嗰個為咗令佢唔好大壓力而露出嘅笑容，心裏就會泛起陣陣嘅歉疚⋯

「邱旻顥起身啦。」李逸彤轉身，輕輕地推咗邱旻顥兩下

「嗯⋯」邱旻顥點點頭，緩緩地抬頭坐好起嚟，「夠鐘啦⋯？」

「仲有一分鐘。」李逸彤將手機遞比邱旻顥睇，「你又冇講清楚我幾時叫醒你。」





「是旦啦～」邱旻顥坐好後伸咗個懶腰，然後望向黑板睇下下一堂係咩堂，「英文⋯」

「星期六⋯我地睇咩戲？食咩好？」李逸彤問邱旻顥，其實睇咩戲都冇咩所謂，李逸彤都只係隨便搵啲話題講下，「今日星期四啦！」

「有人好期待。」邱旻顥將英文書從櫃桶抽出嚟，「其實你有冇想睇嘅戲？」

「冇咩特別⋯」李逸彤諗咗一諗後搖搖頭，「你有冇想睇嘅戲？冇嘅話⋯我地周圍行下好唔好？」

「好呀～」邱旻顥爽快地答應，「到時再睇下有冇戲想睇囉～」

「嘻⋯好呀！」李逸彤笑了笑

李逸彤定睛望住邱旻顥，邱旻顥覺得李逸彤好似有啲咩想同佢講一樣；邱旻顥同李逸彤對望着，但李逸彤只係對佢微微一笑，微微側着頭望住佢








IG Link: https://www.instagram.com/nd_cotttoncandy/?hl=zh-tw