［愛情純愛］我地之間嘅友誼純度絕對等於零！！！: 118. 反應不及

「做咩？」邱旻顥嘅嘴角不禁滲出笑意，帶着少許好奇心問李逸彤

「嗯？咩做咩呀？」李逸彤卻笑着反問邱旻顥

「見你望住我，以為你有嘢想講。」邱旻顥托着腮，但視線冇離開過李逸彤

「冇嘢想講～」李逸彤搖搖頭，聲線輕鬆愉快，「你以為我有咩想講？」

「冇咩。」邱旻顥聳聳肩，將另一隻手以手心向上嘅方式放到枱上





李逸彤眼見邱旻顥將手放喺枱，於是試探般伸手拍邱旻顥嘅手心一下，邱旻顥盯着李逸彤嘅手，喺李逸彤嘅手一掂到佢嘅手心時，邱旻顥反應迅速地握住李逸彤嘅手

「鬆手，陣間比人睇到⋯！」李逸彤甩咗手兩下發現邱旻顥唔鬆手便連忙講道

「你會驚比人睇到㗎咩？」邱旻顥邊講邊伏低喺枱上，右手曲着放喺枱，頭側着靠喺右手上

邱旻顥嘅左手一直都冇鬆開李逸彤嘅右手，而係握住李逸彤嘅手往枱邊移，將李逸彤嘅手往下拉，剛好枱完住遮住兩人嘅手

「邱旻顥你⋯唔鬆手？」李逸彤細聲地問伏喺枱上嘅邱旻顥，眼睛朝兩人握住嘅手偷瞄一眼





邱旻顥冇回答，本來握住李逸彤嘅手緩緩地一步步鬆開

由握住李逸彤嘅手到輕輕地拖住；由輕輕地拖住手到手指；由李逸彤纖幼嘅手指到指尖，當兩人嘅手快要完全地鬆開時，邱旻顥輕輕地拉住李逸彤嘅食指

李逸彤悄然地將視線移開，心跳加速嘅感覺特別明顯，李逸彤嘅食指向前一勾，扣住邱旻顥嘅食指

「噗噗！噗噗！噗噗！」伏着嘅邱旻顥此時此刻正聽着自己嘅心跳，嘹亮嘅心跳聲傳到身體每一個角落、每一條骨頭，心臟每一下跳動都會掀起一層巨浪

邱旻顥同李逸彤嘅食指輕輕地扣着，邱旻顥一直唔願抬頭，唔想比人見到自己通紅嘅臉頰；李逸彤嘅手緊張地捉住自己校裙嘅裙擺，手心都出緊汗





「點解好似偷情咁⋯？」李逸彤感受着心臟嘅跳動，感覺格外緊張，好怕突然間有人行過嚟，「如果比人見到，就真係水洗都⋯其實，唔清都幾好⋯」

李逸彤諗到呢度，獨自陷入甜蜜又矛盾嘅感覺中，唔係男女朋友卻拉住彼此嘅手唔願鬆開

「邱旻顥，你係唔係中意我⋯？」李逸彤好想將呢一句問出口，好想聽邱旻顥嘅回答，「我好中意你⋯」

李逸彤冇對任何人講過呢句說話，包括自己在內都冇，佢冇試過好認真咁講一句「邱旻顥，我中意你」，當喺心裏講出呢句認真又嚴肅嘅句子時，發現原來會好激動，或者係因為嗰種想比佢知嘅感覺令佢激動起嚟

「叮噹叮噹⋯叮噹叮噹～」

當上堂嘅鐘聲響起時，邱旻顥緩緩地放鬆手，同李逸彤扣住嘅手亦鬆開咗；邱旻顥坐好起嚟，耷低頭想令自己稍微冷靜落嚟

「好香⋯」邱旻顥抬眼望住李逸彤嘅背影時，感覺李逸彤嘅香水味就喺鼻前飄過

⋯





沈心怡邁步行出座位，但腳不經意地被櫈腳絆到，沈心怡向前跌，潘景諭眼目手快地將沈心怡扶住

「唔、唔該⋯」沈心怡企番好後連忙提手縮開

沈心怡呢個舉動無疑刺痛咗潘景諭嘅心，潘景諭將手垂低，沈心怡抬眼偷望潘景諭，然後又垂低頭

潘景諭微微側身躲開沈心怡行出課室，沈心怡望住潘景諭臉上嘅神情，沈心怡嘅心一啲都唔好受，比大石壓到有啲呼吸困難⋯

沈心怡望向潘景諭，望住佢行出課室嘅身影，心裏滿是講唔出嘅難受

「我係唔係又傷到佢啦⋯」沈心怡不禁問自己，因為自己下意識拉開距離嘅舉動令潘景諭受傷

李逸彤行到沈心怡嘅座位，拉住沈心怡行番埋自己位





「我同心怡落去先啦～今日係週會。」李逸彤對邱旻顥講道，「你等埋潘景諭？」

「嗯，我等埋佢先落去。」邱旻顥講嘅同時望向潘景諭嘅座位，卻唔見潘景諭個人，「潘景諭呢？」

「佢出咗去⋯」沈心怡回頭望向課室門口，「啱啱⋯」

⋯

坐喺禮堂上週會嘅時候，沈心怡坐喺潘景諭嘅正後方

「心情好似仲係唔太好⋯」沈心怡望住潘景諭嘅背影，潘景諭正微微耷低頭，完全冇留心聽週會內容

潘景諭耷低頭，目光停喺自己嘅手心，啱啱沈心怡避開佢嘅舉動烙喺潘景諭嘅心中⋯

「可能佢真係唔係中意我⋯」潘景諭喺心裏失落地講道，「明明如果唔表白，我地仲可以係朋友⋯」





潘景諭心入面只顧在意沈心怡嘅事，週會嘅內容對佢嚟講冇咩意義

自覺平凡嘅沈心怡一直覺得潘景諭冇中意自己嘅理由，卻唔知道對潘景諭嚟講，佢再平凡再普通，對佢嚟講都係特別嘅存在

接住週會嘅係一個15分鐘小息，喺週會結束後，李逸彤同沈心怡去咗小食部一趟，打算休息一陣先再番課室

沈心怡同潘景諭對住企，但兩個人一直都冇開聲講嘢，什至連望都冇望過對方一眼

沈心怡一直偷望潘景諭，但潘景諭一直撇開臉唔望佢呢邊，沈心怡嘅心苦澀又難受

李逸彤忽然聽到馨馨嘅聲音嚟佢地好近，下意識回頭一望，見到馨馨同另一個女仔一齊差唔多要經過佢嘅身後，但馨馨卻愈行愈近，差唔多到沈心怡身後時，膊頭微微向後側

「馨馨唔係打算撞心怡呀⋯」李逸彤留意到後，眉頭一皺





馨馨若無其事地行到李逸彤身後，快要行到沈心怡背後時，李逸彤見馨馨真係準備用力地「唔小心」撞沈心怡，連忙伸手推咗沈心怡一把

「嗯！？」沈心怡比李逸彤嚇親又比唔切反應，而且李逸彤推佢嘅背嘅力度都唔細，沈心怡向前踏一大步以換嚟重心，但卻成個人撞落潘景諭度

潘景諭都搞唔清狀況，畢竟佢一直都冇留意發生緊咩事，但佢都係伸出雙手扶住沈心怡；沈心怡抬頭望向潘景諭，臉頰都紅咗一半，兩人終於喺一整日嘅迴避後對上視線

馨馨眼睛嘅餘光望到發生嘅狀況，見狀連回頭望向沈心怡同李逸彤；沈心怡呆一呆，回神過後連忙同潘景諭分開

李逸彤狠狠地瞪馨馨一眼，馨馨見自己好似幫咗沈心怡一把一樣，嬲到頭頂都要出煙；邱旻顥同潘景諭咩都唔知，只係不約而同地朝馨馨望咗一眼

「哼！」馨馨不忿地哼一聲，拉住佢嘅朋友轉身就走




IG Link: https://www.instagram.com/nd_cotttoncandy/?hl=zh-tw