［愛情純愛］我地之間嘅友誼純度絕對等於零！！！: 121. 魔力
潘景諭心裏一顫，愣一下後指尖先落喺螢幕嘅鍵盤上輸入道：「唔洗」
望住螢幕等待沈心怡回覆嘅時候，係潘景諭最緊張、心跳最快嘅時候，忍唔住估下沈心怡會覆佢啲咩但又唔敢諗太多
此時，新嘅message又彈出嚟，潘景諭立馬回神望向螢幕
沈心怡：令你唔開心對唔住
「唔洗對唔住，我冇期望你即刻回應」潘景諭輕抿一下唇後回覆沈心怡，「我只係想講比你知，但冇逼你令你大壓力嘅意思」
用最大方嘅字句，講出令自己最難受嘅說話，或者就係暗戀一個人時嘅痛
拎住手機望住潘景諭啱啱send到過嚟嘅回覆，沈心怡嘅心不是味兒，感覺自己就好似大逆罪人一樣
「佢唔逼你做決定，唔代表佢唔想同你一齊。」李逸彤今日對沈心怡講嘅嘢，此刻言猶在耳
沈心怡唔知道可以覆潘景諭啲咩先啱，只可以盯住手機螢幕發呆
潘景諭中意佢，係佢諗都冇諗過嘅事，但宜家潘景諭真係中意佢，沈心怡卻唔敢回應潘景諭呢份心事
「唉⋯我要點算⋯？」沈心怡不禁慨嘆問自己
潘景諭伏喺枱上，側着頭望住冇再彈出新message嘅聊天記錄
雖然宜家沈心怡好似同佢拉遠咗距離，相處起嚟都尷尬咗，但潘景諭冇後悔同沈心怡講咗自己嘅心意
「我都只係想佢知⋯就算佢會拒絕我，都唔緊要⋯」潘景諭彷彿遊說自己一樣對自己講道
但其實，有邊個會想身處喺一個冇結果嘅戀愛圈套入面？倘若有半點真心，就會期待結果
「算啦⋯順其自然⋯」潘景諭無奈地自言自語道，既然唔係佢可以控制嘅事，咁就聽天由命
⋯
「你買唔買嘢食？」沈心怡拎住銀包同手機行到李逸彤嘅座位，望到李逸彤已經執好嘢將枱面清空
「買呀買呀，等我一陣～」李逸彤彎腰從書包裏拎出銀包，然後就同沈心怡手挽手一齊行出課室
行落樓梯嘅時候，李逸彤望一望沈心怡，感覺沈心怡好似冇琴日咁心不在焉
「你同潘景諭好番啦？」李逸彤湊近沈心怡細聲地問道
「呀？」沈心怡卻好似啱啱回神一樣望向李逸彤，嘴角一塌，轉眼又擠出笑容，「冇呀⋯」
「原來冇好番⋯」李逸彤望住沈心怡喺心裏講道，「仲以為心怡已經答咗潘景諭⋯」
「星期六得唔得閒？一唔一齊出去行下？」沈心怡邀約李逸彤道
「聽日⋯唔得呀⋯」李逸彤一臉抱歉地望向沈心怡，雖然佢唔想拒絕滿懷心事嘅沈心怡，但聽日已經同邱旻顥約好咗
「你約咗邱旻顥呀？」沈心怡一眼就睇穿李逸彤，望下李逸彤嘅若隱若現嘅笑容都估到，「你話同邱旻顥冇一齊真係冇人信⋯」
「咁我同佢早兩日已經約咗嘛～」李逸彤挽住沈心怡嘅手臂，貼喺沈心怡嘅身旁，「我唔係特登唔同你出去～」
「知啦知啦⋯！」沈心怡瞄李逸彤一眼，無奈地笑了笑，「邱旻顥就嚟重要過我啦⋯！」
「唔會囉！你地都唔一樣～」李逸彤澄清般講道，差啲就要起誓
沈心怡淨係買咗盒維他奶就番課室，一坐低喺位就拆開飲管，趁小息好好休息下
邱旻顥去完廁所番嚟，踏入課室門口第一眼就見到李逸彤
「有冇買埋比我？」邱旻顥喺經過李逸彤嘅座位時問道
「冇喎～」李逸彤抬頭望邱旻顥，視線隨住邱旻顥郁，「你都冇叫我幫你買～」
「聽日約幾點？」邱旻顥下意識將聲量稍微降低後先問李逸彤
「聽日睇幾點？」李逸彤轉身面向邱旻顥，雙手捉住櫈背
「你想睇—」「李逸彤，我想問下你⋯」
邱旻顥嘅說話被行過嚟搵李逸彤嘅
女同學打斷，女同學拉起李逸彤行到去黑板前；李逸彤回頭望一望邱旻顥
「咁⋯陣間再問啦唯有⋯」邱旻顥喺心裏無奈地嘆一口氣
邱旻顥喺手機搵最近戲院上映嘅戲，免得陣間李逸彤問佢嘅時候佢咩都答唔到
「李逸彤會想睇邊套⋯？」邱旻顥稍微打量一下每一齣電影嘅poster，從而估李逸彤想睇嘅電影會係邊套
邱旻顥抬眼朝企喺黑板前嘅李逸彤望，見到李逸彤一臉認真咁解答女同學嘅問題，邱旻顥嘅嘴角不自覺地微微上揚
「笑咩呀？」李逸彤行番埋位嘅時候見到邱旻顥自己喺度笑
「笑有人個衫領反咗都唔知。」邱旻顥嘅目光落喺李逸彤嘅後衫領上
「有咩？」李逸彤提手摸自己嘅後衫領，衫領真係反起咗，李逸彤連忙整理番衫領，「係喎⋯！」
李逸彤嘻嘻一笑、吐出舌尖，臉上掛着淘氣嘅笑容，但呢種笑容同佢嘅性格特別配合；本來已經收起笑容嘅邱旻顥，就喺李逸彤露出笑容嘅一刻又忍唔住笑了，都唔知道係中意一個人嘅魔力定係李逸彤嘅魔力⋯
「心怡拜拜～」李逸彤喺分別前同沈心怡講道，「我地要星期一先見啦～」
「你得閒可以call我㗎嘛～」沈心怡無奈一笑，「況且我地都唔係住得好遠啫～」
「好啦～」李逸彤笑了笑，然後湊近沈心怡嘅耳邊細聲地講道：「我會為你嘅愛情打氣～」
沈心怡掛喺臉上嘅笑容頓時一怔，心裏苦澀嘅味道慢慢地滲出，令笑容都變得有啲難睇⋯
「知啦⋯」沈心怡苦笑道，對潘景諭嘅事，佢始終有啲耿耿於懷，「你搞掂自己先啦⋯！」
「嘻嘻⋯好啦好啦，你有咩就同我講啦～」李逸彤輕輕地拍一拍沈心怡嘅膊頭講道
沈心怡太識將心事收起，李逸彤怕沈心怡自己會諗埋一邊，因為愈冇安全感嘅人，愈識得收起自己嘅內心⋯
IG Link: https://www.instagram.com/nd_cotttoncandy/?hl=zh-tw