［愛情純愛］我地之間嘅友誼純度絕對等於零！！！: 122. 一切結束⋯

雖然對潘景諭同沈心怡嘅關係的確好好奇，但有啲嘢真係佢兩個先知

「邱旻顥人呢⋯？」李逸彤轉頭打算搵邱旻顥時，發現邱旻顥唔見咗

明明同沈心怡講咗兩句連5分鐘都冇，一轉眼邱旻顥就唔見咗，李逸彤左望右望，尋找邱旻顥嘅身影

「喺度⋯」李逸彤好快地留意到邱旻顥喺地鐵站嘅7仔行出嚟，連忙加快腳步行去邱旻顥嘅身旁，「喂！」

「嗯？沈心怡番咗去啦？」邱旻顥朝李逸彤嘅後方望一望





「係呀～唔係呢？」李逸彤點點頭

「咁行啦，番去啦。」邱旻顥講道，聲音有輕微嘅顫抖

「哦⋯」李逸彤追上邱旻顥嘅步伐，行到佢身旁時先減慢步速

李逸彤眼尾瞄到邱旻顥嘅手一直插喺褲袋，李逸彤發動女仔嘅直覺，感覺邱旻顥啱啱買咗嘢食

「算啦～可能佢都冇買啲咩～」李逸彤喺心裏講道，打消咗問邱旻顥嘅念頭





邱旻顥悄悄地望李逸彤一眼但咩都冇講，只係覺得格外緊張，明顯感覺到喺手腕上嘅動脈都突突跳動

兩個人行到番去屋苑，就嚟行到番去佢地住嘅嗰座時，邱旻顥從褲袋中拎咗一筒糖出嚟自然地遞比李逸彤

「糖？」李逸彤望住邱旻顥遞比佢嘅一筒糖，「啱啱買㗎？做咩突然請我食糖嘅？」

李逸彤略帶一點遲疑伸手接過筒糖認真地觀察，睇下有咩咁特別；邱旻顥望到李逸彤嘅舉動時無言地笑，筒糖係有意思，但唔係做咗咩手腳喺筒糖度

「筒糖冇嘢㗎⋯你睇一個鐘都一樣⋯」邱旻顥沒好氣地笑道





「冇嘢？咁做咩突然請我食？」李逸彤一副要打爛沙盤問到篤嘅氣勢，邱旻顥又一笑，「無事獻殷勤⋯」

雖然口係咁講，但李逸彤嘅心都甜到好似食咗蜜糖一樣，甜絲絲嘅感覺令佢嘅笑容都特別甜

「你冇學中文㗎咩？冇聽書？」邱旻顥將筒糖從李逸彤嘅手中拎走，將包裝外殼撕開然後拎咗一粒糖出嚟，將包住糖嘅銀色包裝紙拆開，將糖放到李逸彤嘅嘴邊

邱旻顯嘅心臟噗噗跳，心跳嘅強烈什至令邱旻顥有啲手震，仔細觀察會發現，銀色嘅糖紙都微微顫抖着

糖果嘅香甜喺鼻邊飄過，李逸彤微微張口將糖食咗，輕咬一啖時糖嘅甜味喺口中擴散

「食糖同中文有咩關係啫⋯」李逸彤邊咬着糖邊問道，佢完全唔知呢筒糖同中文有咩關係，糖嘅外包裝上面寫嘅係日文，「哼⋯」

「你冇學過要首尾呼應㗎咩？」邱旻顥捉起李逸彤嘅手，將印住糖名嘅一面朝上放到李逸彤嘅手上，「結束嘅時候要呼應番開始嘛～」

邱旻顥見李逸彤仲係唔太明白，腦袋好似未運轉到一樣，輕嘆一口氣後一臉認真地道：





「請你食㗎，當係多謝你嘅謝禮。」

李逸彤聽到邱旻顥講嘅嘢時不禁就露出笑容笑起嚟，呢句說話係幾咁似層相識？

李逸彤先一步停落嚟企喺原地，邱旻顥亦隨即停落嚟面向李逸彤企

「我地⋯要結束啦？」李逸彤下一秒就收起甜甜嘅笑容，輕輕抿一下唇，微微耷低頭，抬眼望向邱旻顥柔聲地問道

邱旻顥稍微一怔，心跳得更快，李逸彤好似真係睇穿佢嘅想法一樣，但邱旻顥唔會因為李逸彤一句而自亂陣腳

「要呀，所有嘢都會有結束嘅一日唔係咩？」邱旻顥稍微平伏一下心情，隨即喺臉上掛上淡淡嘅笑容，佢注視着李逸彤嘅目光格外柔和，「用開始嘅方法嚟結束，唔係好有意思咩？」

「係掛⋯」李逸彤微微聳肩，佢望住邱旻顥嘅雙眸中好似有滿滿嘅星光一樣，「開始係我先開口，但⋯我唔想做開口結束嗰個⋯」





「咁呀⋯就冇首尾呼應啦⋯」邱旻顥輕嘆一口氣，佢瞄李逸彤一眼，李逸彤嘟着嘴一臉委屈地把玩着手中嘅糖

「總之我唔做結束嗰個⋯！」李逸彤任性地撇開臉講道，「我唔要⋯」

「唔做咪唔做囉～係咪？」邱旻顥聳聳肩，佢總會包容、縱容李逸彤嘅任性，「反正我本來就打算由我嚟結束。」

「哼！」李逸彤輕哼一聲撇開臉，但又忍唔住偷瞄邱旻顥一眼，微微鼓起兩泡腮嘅佢格外可愛，偶爾嘅任性亦格外觸動邱旻顥嘅心，「你想做結束咪做結束嗰個囉！我又唔會阻止你嘅！」

「我100%想做結束嗰個，因為有人好似話過男仔做主動表白嗰個好啲咩？」邱旻顥瞄李逸彤一眼，「而且，我都要用實際行動去證明一下自己嘅～」

李逸彤抬眼望住邱旻顥，佢已經忍唔住笑意，直接將甜蜜嘅笑容掛到臉上

「你就一定要咁隱晦咩？就唔可以直接啲講你係中意我咩？」李逸彤心情激動地一蹦一跳行前半步，直接上前一下子攬住邱旻顥

李逸彤嘅主動直接為邱旻顥帶嚟一份愕然，雙手懸喺半空唔知點算，想攬但又唔敢攬





「你咁樣係⋯」「突然間忍唔住想攬你⋯！」

李逸彤耷低頭，額頭靠喺環抱邱旻顥頸上嘅前臂，喺耷低頭嘅時候，李逸彤聽到自己好似癲咗一樣嘅心跳；但比起佢嘅心跳，佢做嘅行為仲癲

「痴線真係⋯！我真係攬住佢⋯！」李逸彤喺心裏震驚地講道，「李逸彤你太勇敢啦⋯！」

李逸彤震驚嘅同時都不忘喺心裏用力咁讚自己，真係忍唔住就攬住邱旻顥

兩顆心靠得最近嘅時候就係呢一刻，什至係心臟跳得最瘋狂嘅時候

李逸彤身上嘅自然香味頓時撲鼻而來，邱旻顥唔敢亂郁，只係敢瞄李逸彤一眼；懸喺半空嘅雙手都只敢輕輕握拳，唔敢掂李逸彤

猶疑咗一陣之後，邱旻顥都係選擇帶住緊張嘅手攬住李逸彤，畢竟呢份誘惑太大








IG Link: https://www.instagram.com/nd_cotttoncandy/?hl=zh-tw