［愛情純愛］我地之間嘅友誼純度絕對等於零！！！: 124. 偶遇
「咁、咁突然嘅！？」李逸彤頓時有啲唔識比反應，臉頰都紅咗一半，然後又細聲地道，「原來你聞到呀⋯仲以為你冇聞到⋯」
「咁明顯點會聞唔到？」邱旻顥一笑，覺得李逸彤有時嘅思路好可愛，「你唔係每次都係噴呢隻香水？」
「你又知？」李逸彤輕輕地打邱旻顥嘅手臂一下
「你平時出街都噴香水？」邱旻顥突然問道
如果係平時邱旻顥突然間咁問，一定會顯得有啲奇怪、有啲突兀，但以宜家呢個關係狀態，講出嚟都唔會太奇怪
「唔係呀～」李逸彤爽快地回答道，將視線移開後先再補充：「睇下同邊個出去啦～噴香水⋯唔好咩？」
「好～當然好，呢個味都同你好夾。」邱旻顥笑笑口地講道，「係咩味？」
「好似係⋯小蒼蘭⋯係之前我媽媽買比我嘅生日禮物～」李逸彤提起手放到自己嘅鼻前，聞到手腕上淡淡嘅香水味
「你餓唔餓？我地去食嘢先？」邱旻顥體貼地問道
「好呀！我都有少少餓啦⋯」李逸彤扁一扁嘴後講道，但一諗到食咩好，李逸彤又有啲精神，「不過我地食咩呀？」
「咁睇下你想食咩啦～」邱旻顥稍微用力地拉咗李逸彤一下，將行得比佢有少少後嘅李逸彤拉番嚟同自己水平嘅位置
⋯
沈心怡趁住今日係假期就出街行下，只係百無聊賴周圍行下睇下嘢
沈心怡一個人去到銅鑼灣，打算行一陣就番屋企；沈心怡行入Log-on，佢只係忽然想去下嗰度
「唔⋯陣間去唔去買杯嘢飲好呢？」沈心怡邊望放喺架上嘅記事簿邊喺心裏沉思道，「飲咩好⋯飲個芝士奶蓋都幾好⋯」
沈心怡喺放文具嘅地方行咗一轉，然後便打算行去另一邊睇下，先啱啱行出文具區，就見到一個熟人企喺電子產品區嘅架前
「阿諭⋯！？」沈心怡愣了愣，腳步都頓時停低企喺原地，「我要唔要行過去同佢打招呼好⋯？」
潘景諭打算買個新嘅耳機，只係喺度先睇下有冇合心意嘅款式，佢應該冇諗過沈心怡喺佢身後
「嗨～」沈心怡行到潘景諭嘅斜後方，有啲尷尬地輕拍潘景諭嘅膊頭兩下
「嗨⋯？」潘景諭回頭望就見到沈心怡，似乎潘景諭都有啲疑惑點解會見到沈心怡
明明沈心怡自己都覺得有啲尷尬唔太想行去打招呼，但係偏偏雙腳唔聽使，直接就朝潘景諭行去
「你喺度嘅？」潘景諭自然地問道
「咁啱出嚟行下⋯」沈心怡微微一笑，眼尾瞄到潘景諭手上拎住嘅耳機，「你嚟買耳機⋯？」
「哦⋯只係嚟睇下啫，都未真係決定買。」潘景諭將手上拎起嘅sample放低，佢望一望沈心怡，又朝沈心怡身後同附近望，「得你一個人？」
「嗯，今日我自己出嚟⋯」沈心怡點一點頭，氣氛忽然間又變得有啲尷尬
潘景諭察覺到沈心怡嘅尷尬，佢唔想令沈心怡唔自在，但難得今日見到佢又唔想咁快走，心裏矛盾到極致⋯
「你⋯食咗嘢未呀？」潘景諭下意識問沈心怡，覺得可能係一個可以見多佢一陣嘅機會一樣
「呀？未、未呀⋯」沈心怡彷彿啱啱回神一樣講道
「唔介意嘅話可以一齊食嘢⋯」潘景諭試探地問，一直留意着沈心怡嘅表情
其實潘景諭喺問出口嘅時候就已經心中有數，沈心怡就算拒絕都唔出奇，但潘景諭都係想搏一搏
「嗯⋯好呀⋯」沈心怡微微點頭，因為尷尬所以將視線移開
潘景諭嘅雙眼不禁瞪大，本來都做好被拒絕嘅打算，但冇諗到沈心怡居然答應同佢一齊食嘢，心裏又驚又喜
「你想食咩呀？」潘景諭頓時問道，心情瞬間都好咗一大截，見沈心怡有啲困惑，即刻拎出手機，「我睇下有咩好食⋯！」
⋯
「外套。」邱旻顥行入戲院坐低，就從袋中拎咗件外套出嚟放到李逸彤嘅腳上
「嘻嘻⋯我就知你有帶外套～」李逸彤挽住邱旻顥嘅手臂，親密地將下巴靠喺邱旻顥嘅膊頭上
「有邊次會唔帶外套？」邱旻顥稍微湊近李逸彤嘅耳邊細聲地講道
「最叻係你啦～」李逸彤細聲地講道
李逸彤抬頭望住邱旻顥，下意識輕輕抿唇，心臟噗噗跳動嘅聲音此刻格外明顯，好似有環迴立體聲一樣
邱旻顥一怔，因為李逸彤嘅舉動令佢嘅心跳都變快起嚟；邱旻顥嘅目光不禁落喺李逸彤因為搽咗唇膏而有啲閃亮嘅唇上，連同呼吸都變得淺促起嚟
「咳咳⋯」李逸彤有啲怕醜地咳咗兩聲後默默地坐番好，鬆開挽住邱旻顥手臂嘅手轉為拖住手
邱旻顥好似知道李逸彤想做啲咩，但佢未有咁大勇氣做主動，佢嘅勇氣都要累積⋯
邱旻顥緊緊地握住李逸彤嘅手，李逸彤嘅手比佢嘅手細，拖起嚟嘅時候總會覺得好唔一樣；對李逸彤嚟講，比邱旻顥拖住就好似會有滿滿嘅安全感一樣
恐怖片嘅恐怖源於電影營造出嘅氛圍，忽然間嘅寂靜同嚴肅嘅氣氛的確會令人不安嘅感覺增強，將觀眾嘅緊張感拉得繃緊
李逸彤朝邱旻顥嘅方向稍微側身坐，佢嘅右手緊緊地拖實邱旻顥，左手捉住邱旻顥嘅前臂
完全唔驚嘅邱旻顥望一望用力捉住自己嘅手嘅李逸彤，邱旻顥提起右手，右手輕輕地蓋喺李逸彤嘅左手上
「驚⋯」李逸彤抬頭望向邱旻顥細聲地講道
李逸彤講嘅一個單字，卻帶着滿滿嘅撒嬌意味，邱旻顥嘅心頓時傳嚟怦然心動嘅感覺
IG Link: https://www.instagram.com/nd_cotttoncandy/?hl=zh-tw