［愛情純愛］我地之間嘅友誼純度絕對等於零！！！: 125. 預判
邱旻顥將右手放到李逸彤嘅雙眼前擋住佢嘅雙眼，但李逸彤卻拉開邱旻顥嘅手
李逸彤將頭靠喺邱旻顥嘅膊頭上，未一齊嘅時候做呢啲事都係試探、都要小心翼翼，但宜家可以光明正大咁做呢啲事
李逸彤心裏覺得好幸運，兩個人要心意相通係一件好困難嘅事，但佢同邱旻顥真係心意相通⋯！
⋯
「你睇下食咩。」潘景諭將枱上嘅餐牌先放到沈心怡嘅面前，然後自己再喺旁邊拎
「唔該⋯」沈心怡禮貌地講道
潘景諭望沈心怡一眼，好似要確定坐喺佢對面同佢食飯嘅人真係沈心怡一樣後，先耷低頭睇餐牌
「點解我會答應同阿諭食飯⋯」沈心怡不禁喺心裏問自己，「都太尷尬啦掛⋯！」
「你諗好食咩啦？」潘景諭見沈心怡停晒手便抬頭問道
「嗯！」沈心怡點點頭，然後指一指餐牌，「我食呢個。」
潘景諭隨即叫侍應過嚟落單，先點沈心怡嘅餐，之後先再點自己嘅餐
「唔該。」潘景諭對侍應講道，然後將兩份餐牌疊好放喺一旁，「你係飲凍奶茶係唔係？」
「嗯，係呀⋯」沈心怡點點頭，佢覺得潘景諭只係唔想氣氛咁尷尬先特登問佢，因為潘景諭明明知道佢飲開啲咩
兩人都安靜咗落嚟，氣氛頓時開始尷尬，潘景諭都唔知要講啲咩先可以令氣氛緩和
「講啲咩好⋯好尷尬⋯」沈心怡喺心裏苦惱地問，從來都冇試過用一個尷尬嘅狀態同潘景諭相處，搞到宜家渾身唔自在
潘景諭悄悄地望沈心怡一眼留意佢嘅表情，潘景諭自己都有啲坐立不安嘅感覺，同沈心怡一齊先會有呢種緊張
「佢真係會比答覆我⋯？」潘景諭喺心裏問，雖然話唔會逼沈心怡，但始終都想沈心怡比一個答覆佢，「但如果我開口問，沈心怡會唔會覺得好大壓力⋯？」
「我想問—」「之前你⋯」
兩個人同時開口，兩人都愣了一下，沈心怡微微耷低頭，想要將啱啱想問嘅嘢收番嘅時候，潘景諭又一次開口：「你講先⋯」
沈心怡因為啱啱被打斷，好難先聚起嘅勇氣又散開，沈心怡微微耷低頭、輕抿一下唇，深深地吸一口氣
潘景諭冇追問，只係安靜地等待沈心怡嘅回答，等沈心怡準備好先再講
「算啦⋯都係唔問⋯」沈心怡喺心裏輕嘆一口氣，冇打算將勇氣再聚起嚟一樣打算放棄追問潘景諭
正當沈心怡真係打算放棄難得嘅機會時，沈心怡諗起上次同李逸彤講嘅時候，李逸彤同佢講：「咁到佢中意第二個嘅時候，你就真係要後悔啦～」
「其實⋯我唔係真係想錯過佢⋯」沈心怡喺心裏默默地講道，佢可以對包括潘景諭在內嘅任何人講大話，但再點講大話都好，佢冇辦法對自己講大話⋯
沈心怡微微抬頭，目光落喺潘景諭身上，潘景諭嘅目光卻落喺餐廳外嘅街道；沈心怡定睛地望住潘景諭，喺潘景諭嘅雙眼中，感覺好似失去咗以前嘅一份自信，多咗一份落寞⋯
潘景諭將視線收回，卻見到沈心怡定睛地望住自己；沈心怡同潘景諭對視咗一秒，然後連忙假裝自然地微微耷低頭
「你上次⋯話中意我⋯」沈心怡喺輕抿一下唇，雙手放喺大腿上不禁捉緊裙擺，「你係⋯認真嘅⋯？」
潘景諭對沈心怡主動問起嗰日佢表白嘅事覺得有啲訝異，佢以為沈心怡唔會再提起嗰日嘅事⋯
「我似講笑？」潘景諭有啲沒好氣嘅感覺，但都只係無奈咁輕輕一笑問沈心怡
潘景諭一個反問令沈心怡即刻窒咗，沈心怡下意識就將視線移開，但又抬眼偷望潘景諭一眼
「我對你講嘅嘢，冇一句係講緊笑。」潘景諭認真地講道，雖然講出口有啲唔知點嘅感覺，但潘景諭都係一鼓作氣地講出口
「嗯⋯我知道⋯」沈心怡微微點頭，除咗比呢個反應之外，沈心怡都唔知要比咩反應好
侍應將佢地點嘅兩杯嘢飲拎到嚟放低喺枱上，潘景諭將沈心怡嘅嘢飲推到沈心怡嘅面前
「不過我講咗唔會逼你⋯就唔會逼你答⋯」潘景諭托住下巴，手輕掂住杯嘅邊緣，垂眸望住自己嘅指尖，「我知你會拒絕我⋯」
喺潘景諭講出後半句時，沈心怡頓時愣住，原來潘景諭早就打定輸數⋯
「佢覺得我會拒絕，但都同我講佢中意我⋯」沈心怡嘅內心有啲意外亦有少許感動嘅感覺摻和其中
潘景諭拎起嘢飲飲咗一啖，飲起嚟明明甜嘅汽水，宜家飲起嚟都苦到入心⋯
沈心怡嘅指尖沿住杯邊向下掃，水珠落喺手上，沈心怡望住一顆顆水珠，不禁諗自己係唔係太絕情
「阿諭⋯我唔係特登想你難受，真係⋯」沈心怡緩緩地開口講道，內心緊張嘅心跳聲蓋過佢講嘢嘅聲音
「我知，我明白。」潘景諭臉帶着淡淡嘅笑容講道，但心入面的確唔好受
兩人都冇再講任何嘢，只係默默地食完呢個lunch⋯
⋯
喺電影完場嘅時候，李逸彤一如既往地將外套摺好先再還比邱旻顥，邱旻顥起身拖住李逸彤就行
「嘻嘻⋯」李逸彤嘻嘻一笑，將下巴靠喺邱旻顥嘅膊頭上
宜家可以咁樣光明正大同邱旻顥拖手，李逸彤單係因為呢件小事而覺得興奮，未一齊嘅話做咩都都會有所忌諱
「你洗唔洗去廁所？」邱旻顥問道，朝廁所嘅方向抬一抬下巴示意，「你要去嘅話我喺度等你。」
「好呀～」李逸彤點一點頭後便將手鬆開，朝廁所嘅方向行去
邱旻顥企喺外面等李逸彤，記得上次都係呢個狀況時遇到班上面嘅同學，兩人都有啲尷尬，但如果今次會遇到嘅話⋯
「係喎，李逸彤會想公開定唔公開⋯？」邱旻顥諗到呢個問題，佢好似都冇問過李逸彤想公開定唔公開
IG Link: https://www.instagram.com/nd_cotttoncandy/?hl=zh-tw