［愛情純愛］我地之間嘅友誼純度絕對等於零！！！: 130. 邀約

「呀⋯！」馨馨下意識嗌咗一聲，抬頭見到係潘景諭時向後退咗兩小步，同潘景諭對上視線，「Sor、Sorry⋯」

「唔緊要。」潘景諭毫不在意地微微一笑，然後側一側身避開馨馨，從馨馨嘅身旁行出課室

邱旻顥望一望馨馨，然後跟喺潘景諭身後行出課室

馨馨嘅目光好似痴咗喺潘景諭身上一樣，但潘景諭當佢透明咁，馨馨內心就更嬲

「噗⋯！」望到成件事經過嘅李逸彤忍唔住笑咗出嚟，但為咗唔好咁過份，所以用手掩着嘴笑





馨馨聽到笑聲，帶着怒氣一下子回頭望向李逸彤，不忿氣地瞪咗李逸彤一眼，沈心怡輕撞李逸彤一下，李逸彤便收起笑容忍住笑意

沈心怡心裏覺得自己有啲衰，因為就喺啱啱見到潘景諭無視馨馨嘅時候，佢自己有啲心涼，好似有人幫自己出咗一口氣嘅感覺

⋯

「陣間你要同我坐定係同邱旻顥坐？」沈心怡喺去食飯嘅路上細細聲問李逸彤

「睇你啦～」李逸彤輕鬆地講道，語氣裏夾雜着少許愉快，「睇你想唔想同潘景諭坐啦～」





「關我咩事⋯」沈心怡無奈一笑，微微聳肩，但喺笑容嘅背後卻隱藏着一份少少嘅期待

「我識做嘅～」李逸彤比一個Okay手勢

去到餐廳之後，邱旻顥行到靠牆嘅位置坐低，喺潘景諭行到前，李逸彤迅速地坐低喺邱旻顥隔離

邱旻顥望一望李逸彤，嘴角頓時上揚，完全冇掩飾嘅打算

「唉～」潘景諭望住兩人嘆一口氣





「你坐入面。」邱旻顥輕推李逸彤一下講道，兩人行出嚟後李逸彤先行入去坐喺靠牆嘅位置

「心怡坐我對面～」李逸彤伸手放到枱上拍一拍對面嘅位置

潘景諭本來想伸手輕輕地推沈心怡一下示意佢坐入去，但當手微微抬起時，潘景諭又默默地將手垂低

「睇下食咩。」邱旻顥拎起放喺一旁嘅餐牌，將餐牌打開放喺自己同李逸彤之間，手悄悄地拖住李逸彤放喺櫈上嘅手

「唔⋯今日食咩好⋯」李逸彤一臉認真地望餐牌，但都係有感覺，佢望邱旻顥一眼，甜甜一笑後又望番餐牌

潘景諭默默地將餐牌放喺沈心怡面前讓佢先睇，沈心怡輕輕抿唇，然後將餐牌向潘景諭嘅方向推近少少

「你食咩⋯？」沈心怡微微抬頭望向潘景諭，嘗試主動啲打開話題

「未諗到⋯」潘景諭望住餐牌淡然地講道，上身稍微向外傾着姿勢令沈心怡有啲在意





感覺，潘景諭好似同自己默默拉開距離一樣⋯沈心怡抬眼偷望坐喺對面嘅李逸彤同邱旻顥，內心係一份難以壓抑嘅羨慕，同時又有啲矛盾

「我食呢個，你食邊樣？」

「同平時一樣。」

「日日都食呢個你唔厭咩？」

「唔厭喎～」

兩個人嘅對話日常到冇得再日常，但沈心怡都係忍唔住羨慕，或者因為連佢自己都知，佢同潘景諭好難做到呢種日常

「我諗好啦，你食咩？」潘景諭將餐牌推比沈心怡，望住沈心怡嘅同時問道





「今日想食個餐蛋麵。」沈心怡指一指餐牌

「心怡～我地下次去食呢間好唔好？」李逸彤忽然將手機遞比沈心怡，興致勃勃地講道，「好啱打卡，啲嘢食都幾靚！仲係你中意嗰啲style～」

喺李逸彤上身前傾同沈心怡講嘅時候，佢同邱旻顥嘅手仍然拖住；邱旻顥嘅目光自然地落喺李逸彤嘅側面上，定睛望住李逸彤

「好呀～」沈心怡接過手機望一望後微微點頭，「又真係唔錯～我都好耐冇po過相～」

「下次去食呀～」李逸彤高興地講道

「好呀～」沈心怡又一次點頭笑道

⋯

「邱旻顥你買唔買嘢飲？」先啱啱番到學校，李就彤就拉一拉邱旻顥，示意想買嘢飲





「哦好呀。」邱旻顥其實冇幾想飲嘢，只係李逸彤話想買，自己陪佢去嘅意思

「心怡你飲唔飲？」李逸彤問沈心怡

「唔啦～而且我就唔做電燈膽啦～」沈心怡笑着微微聳肩，「我番上去先啦～」

「我都番課室。」潘景諭接住講道

潘景諭同沈心怡兩人行上樓梯，潘景諭偷偷地瞄咗沈心怡一眼，稍作猶疑

「佢仲記得佢自己話會考慮下我㗎可⋯？」潘景諭嘅內心不禁有啲疑惑，「啱啱⋯佢算唔算係踏出一步⋯？」

沈心怡講嘅會考慮，潘景諭記喺心中，可能連沈心怡嗰日答咗佢啲咩佢都記得清楚





「沈心怡⋯」潘景諭試探般開口叫咗沈心怡一聲

「嗯？」沈心怡望向潘景諭，「係⋯？」

「呢幾日⋯你有邊日得閒？」潘景諭小心翼翼地將想問嘅事開口問沈心怡，「嗯⋯」

「呢幾日⋯？」沈心怡不解地側一側頭，但認真咁思考一下之後，沈心怡似乎對潘景諭想做嘅事有少少眉目，「你想出去？同我⋯」




IG Link: https://www.instagram.com/nd_cotttoncandy/?hl=zh-tw