［愛情純愛］我地之間嘅友誼純度絕對等於零！！！: 131. 故意
「嗯⋯」潘景諭露出少少尷尬嘅笑容，「你得唔得閒⋯？星期六之類⋯」
「可以呀～」沈心怡微微一笑，自然地答應咗潘景諭嘅邀約，「不過你想去邊呀？」
「未諗到，到時再同你講？」潘景諭微微聳肩
其實潘景諭對於沈心怡嘅答應仲係有啲意外，佢冇諗過沈心怡會咁爽快咁答應佢嘅邀請
「係唔係因為佢話咗會考慮下，所以先應承我⋯？」潘景諭雖然意外，但內心都係會忍唔住開心，「如果真係呢個原因嘅話，咁都有機會⋯」
沈心怡悄然抬頭，目光落喺潘景諭嘅身上，啱啱潘景諭問佢嘅時候，佢不禁有啲期待⋯
兩個人又安靜落嚟，有時呢種安靜令沈心怡覺得喺佢地兩個人之間好似仍然有層薄紗隔住
兩人前後行入課室，沈心怡眼尾瞄到馨馨瞪咗自己一眼，心入面卻有啲心涼
「好彩阿諭唔係中意佢啫～」沈心怡心情愉快地喺心裏道
本來行喺潘景諭身後嘅沈心怡喺差唔多行到馨馨嘅座位時，快步行前拍一拍潘景諭
「咩呀？」潘景諭回頭，不自覺地露出一個寵溺嘅微笑
「陣間地理堂，記得帶新note。」沈心怡微微一笑講道，此時剛好經過馨馨嘅座位
「知啦，我有帶。」潘景諭笑道
喺兩秒後，沈心怡回頭朝馨馨望，坐喺位嘅馨馨好似察覺到一樣轉頭望向嘅沈心怡，兩個少女對上視線
沈心怡一直掛着嘅微笑喺馨馨眼中，根本就係放上面嘅挑釁；馨馨不忿，但佢冇得反擊，畢竟沈心怡咩都冇做過，佢都唔可以講啲咩
潘景諭嘅心情忽然間變得好好，佢覺得自己都係有機會，沈心怡都係有機會接受自己，只係時間嘅問題
「幫我開⋯」李逸彤將啱啱買番嚟嘅嘢飲完整地遞比邱旻顥，「開唔到⋯」
邱旻顥望一望李逸彤，又望一望李逸彤遞到自己面前嘅嘢飲，無奈地一笑後默默地接過膠樽
「你平時唔係都係自己開㗎咩？」邱旻顥笑問道，佢當然知道李逸彤只係單純地撒嬌
「嘻嘻⋯」李逸彤見邱旻顥睇穿自己便嘻嘻一笑，然後解釋道：「比你表現下嘛～」
「哦，好呀～我唔介意。」邱旻顥用半秒嘅時間將樽蓋扭開，然後自己先飲一啖後先將嘢飲同樽蓋遞到李逸彤面前，「嗱。」
「邱旻顥你做咩偷飲呀！？」李逸彤明明鼓起腮，但眼神裏卻係濃濃嘅甜意
「幫你開個樽蓋，收番少少開瓶費都得掛～」邱旻顥淡淡嘅笑容掛喺臉上，望住李逸彤嘅眼神就好似望住一件閃亮嘅寶物一樣
「好啦～」李逸彤點點頭，然後飲咗一啖蜜桃茶，「比你飲一啖咁多啦～」
「番上去啦，陣間上堂。」邱旻顥拉一拉李逸彤嘅手腕，但今次好快就鬆咗手，「陣間嗰堂係地理。」
「知道知道～」李逸彤比咗一個Okay手勢，佢望住邱旻顥嘅側臉，不禁有啲犯花痴嘅感覺出嚟
邱旻顥望李逸彤一眼示意兩人要番課室，喺邱旻顥邁步之際，李逸彤踏着輕鬆嘅步伐行到邱旻顥身旁
「點解佢好似好平靜咁⋯？」李逸彤忽然間覺得邱旻顥同平日好似冇太大嘅差別，對佢好似都係用同一種模式，「得我覺得唔一樣⋯？」
邱旻顥微微垂低頭，李逸彤悄然地望邱旻顥一眼後偷偷地扁嘴，只有自己一個興奮激動嘅感覺唔太好⋯
「做咩扁嘴？」邱旻顥因為察覺到突然嘅安靜而望向李逸彤嘅時候，見到李逸彤自己扁着嘴低着頭
「冇。」李逸彤頓時抿唇當冇事發生一樣，「陣間地理堂係唔係要帶新notes？」
「係呀。」邱旻顥微微點頭，「你冇帶咩？」
「我有帶呀～」李逸彤笑笑回答，「只係問下confirm一下咋嘛～」
「我地放學去飲珍珠奶茶？」邱旻顥忽然間小心翼翼地問道，「好唔好呀？」
「做咩突然同我去飲珍珠奶茶？」李逸彤有啲困惑，但都不禁一笑
「飲完珍珠奶茶呢啲甜嘢，唔係會開心啲咩？」邱旻顥微微側着頭望住李逸彤溫柔問道
「我又冇唔開心～」李逸彤若無其事地聳肩
「冇咩？」邱旻顥瞄起雙眼追問李逸彤，似乎唔太相信李逸彤講嘅嘢，「真係冇？」
「冇呀～」李逸彤仍然否認，「不過冇唔開心係唔係都可以飲珍珠奶茶？」
「你想唔想飲？想飲嘅話一定要飲！」邱旻顥講道
「咁一定要飲啦！」李逸彤高興地笑起嚟講道
李逸彤嘅步伐變得輕快，行上樓梯嘅步伐帶着微微跳起嘅感覺，每一步都係腳尖先落地；邱旻顥回頭望一望身後睇下有冇其他人，見到冇人之後跨級行到李逸彤旁邊
「下次有唔開心，直接同我講就得啦⋯」邱旻顥無奈地笑一笑
「唔⋯好呀～」李逸彤稍微一怔後微笑道，「你唔好嫌我任性喎～」
「唔會啦～你點都唔會係任性～」邱旻顥輕捏李逸彤嘅臉頰一下
「聽住先啦～」李逸彤口係咁講，但心入面都覺得有陣甜意飄過
啱啱開始嘅一段關係總會係完美無瑕，但時間一耐，完美嘅外殼褪去，就會露出內裏嘅缺陷⋯李逸彤明白呢個道理，但仍然有維持呢段關係完美嘅期望
⋯
李逸彤行到櫃枱前拎起店員放喺枱上嘅珍珠奶茶，將單放喺枱上然後拎住珍珠奶茶就走
「啵！」李逸彤熟練地將飲管插穿杯面嘅膠膜，然後飲咗一大啖奶茶
邱旻顥望住李逸彤一個為食鬼嘅樣不禁寵溺一笑，佢中意李逸彤偶爾展示出嚟嘅天真、中意佢好似陽光一樣嘅笑容、中意佢唔造作嘅性格，李逸彤就係佢嘅小太陽
「嘻嘻⋯」李逸彤偶然望向邱旻顥，見到邱旻顥正望住佢笑，李逸彤頓時露出笑容，然後將奶茶遞到邱旻顥嘅面前，「你飲唔飲一啖呀？」
IG Link: https://www.instagram.com/nd_cotttoncandy/?hl=zh-tw