［愛情純愛］我地之間嘅友誼純度絕對等於零！！！: 133. 搶先
「你想食嘢？趁宜家未番到屋企門口，你可以沿路行番出去。」邱旻顥都未聽邱茗然嘅解釋就先婉拒
「唔係呀⋯」邱茗然不禁反一下白眼，「你對你個妹嘅印象得要買嘢食？」
「你用得呢個語氣叫我，有邊次唔係叫我幫你買嘢食？」邱旻顥企喺鐵閘前開門
「今次唔係⋯！」邱茗然見邱旻顥行入屋便連忙跟上講道，「哥哥等陣！」
「咩呀？」邱旻顥行到睡房門前，將書包從門縫中掉到房嘅地上
「係咁嘅⋯我今日派咗份小測卷～但就唔太高分⋯」邱茗然喺邱旻顥未入房前連忙喺書包拎出試卷，「哥哥你話你可唔可以⋯」
「唔可以⋯」邱旻顥未聽完就已經一口拒絕，「你面對現實，等晏啲媽咪番嚟嘅時候比佢簽名啦～」
「媽咪實鬧我㗎⋯！」邱茗然見邱旻顥拒絕，便哭喪著臉望住自己嘅試卷分數，「哥哥⋯」
「你叫我幫你隱瞞你有男朋友可能都容易啲。」邱旻顥聳聳肩，轉身行入房嘅同時解開校呔，「我同你讀同一間中學，點幫你？」
「我邊有男朋友⋯」邱茗然臉泛紅霞，帶着羞澀嘅表情細聲地講
邱旻顥定睛地望住邱茗然，佢留意着邱茗然嘅每一個表情變化，其實佢早就察覺到邱茗然或者有中意嘅人，不過都冇問太多
「成績⋯都唔太差啫。」邱旻顥拎走邱茗然拎住嘅試卷，瞄一眼喺角落嘅分數
「我又唔係哥哥你⋯」邱茗然扁起嘴，皺起眉頭，心入面有啲委屈，「你考咩成績，媽咪都唔會鬧⋯」
「邊個話？」邱旻顥認真地問邱茗然，「佢鬧我你唔知啫。」
「嗯⋯」邱茗然將試卷拎番，默默地垂低頭
「所以你有中意嘅人啦？邊個呀？」邱旻顥免得邱茗然一直處於唔開心嘅情況中，於是轉移話題，「我識唔識？」
「關你咩事喎！」本來仍然有啲悶悶不樂嘅邱茗然頓時紅着臉打邱旻顥嘅手臂一下，「你唔識㗎！」
「哦，好啦～」邱旻顥聳聳肩不在意地講道
邱茗然急步行出睡房，邱旻顥回頭瞄邱茗然一眼，無奈一笑後閂試房門換衫
⋯
星期六，今日係沈心怡同潘景諭約好一齊出去嘅日子
沈心怡今日著咗一件白T-shirt做打底，外面著一件吊帶嘅米白色碎花裙，裙嘅長度距離膝頭3、4cm，孭一個淺啡色嘅斜孭袋，腳上著住一對白波鞋，耳仔對上嘅位置夾咗兩隻米色嘅一字夾
「Okay～」沈心怡拎住手機，用手機殼上嘅鏡照住自己方便搽唇膏，「嘻⋯」
今日沈心怡嘅打扮，完完全全將佢嘅氣質完美地展露出嚟
喺搭扶手電梯差唔多落到月台嘅時候，沈心怡就邁步行，步伐有啲急速，毫不掩飾佢對今日「約會」嘅期待
「佢到咗啦⋯！」沈心怡離遠就已經見到潘景諭企喺方形嘅柱前，內心已經開始緊張起嚟，手心都出汗
潘景諭同平時一樣孭住同一個出街用嘅斜孭袋，但佢一直拎起手機睇時間，唔係因為擔心沈心怡遲到，而係因為佢好緊張，所以一直輕敲着手機螢幕
「嗨～」沈心怡行到潘景諭嘅身後時先探頭打招呼，「你咁早嘅？」
潘景諭回頭望向沈心怡，然後由上而下將沈心怡打量一番
「咁、咁我遲過你到，好似⋯唔係幾好嘛⋯」潘景諭講嘢嘅時候窒咗兩下，由見到沈心怡嘅一刻開始，心臟就開始狂跳，成個人都覺得好熱
沈心怡自然地打量着潘景諭，白色衫加灰色裇衫、故意摺咗兩下褲腳嘅黑色長褲、白色波鞋，加上背上嘅斜孭袋
「做咩呀⋯？」沈心怡嘅一個細微舉動都令潘景諭嘅神經繃緊起嚟
「冇呀～行啦～」沈心怡微微一笑搖搖頭，「我地去邊呀？」
「去食嘢先。」潘景諭見到沈心怡嘅微笑又不禁鬆一口氣
「食咩呀？」沈心怡好奇地追問道
「陣間就知。」潘景諭笑了笑講道
潘景諭帶住沈心怡去到一間淡黃色外觀嘅cafe門前，喺門外嘅位置放咗一張圓枱同兩張木櫈
「好似，喺邊度見過⋯」沈心怡行到cafe前面時輕皺起眉頭，諗咗一陣之後沈心怡就知道喺邊度見過，「你又會帶我嚟呢間嘅？本來彤彤仲話同我嚟⋯」
潘景諭尷尬一笑，自己都有啲唔好意思，佢望向沈心怡，只見沈心怡滿心歡喜地行去拉門行入cafe
今日意外地少人，沈心怡行到去近門口嘅第二張枱坐低，近門口嘅三張枱位置係cafe內最適合打於影相嘅位置，識揀都一定揀呢個位，雖然枱同後方正常嘅枱比起嚟較矮，但呢個位置係最光嘅位置，影相都靚啲
「阿諭你都未話我知，點解係嚟呢間cafe。」沈心怡喺點完餐後好奇地問潘景諭
「呃⋯」潘景諭尷尬一笑，稍微抬眼望一望沈心怡後又垂眸，耳根都紅透，「因為想喺你同李逸彤嚟之前，搶先一步同你嚟咗先⋯咁⋯你同佢嚟嘅時候，會先諗起我⋯」
潘景諭喺李逸彤當時同沈心怡講嘅時候偷偷地記低咗cafe嘅名，打算早一步約沈心怡去，捷足先登
「好可愛⋯！」沈心怡望住潘景諭面紅耳熱嘅模樣時喺心裏講道，「好少見阿諭呢個表情⋯！」
喺沈心怡面前，潘景諭平日嗰種冷酷嘅氣場一下子散去，喺中意嘅人面前所表露嘅模樣，永遠都同真實嘅自己有所不同
「心怡，今日⋯」潘景諭試探般柔聲叫沈心怡，本來望去水吧嘅沈心怡緩緩望向潘景諭
IG Link: https://www.instagram.com/nd_cotttoncandy/?hl=zh-tw