［愛情純愛］我地之間嘅友誼純度絕對等於零！！！: 132. 味道
「唔啦你飲啦。」邱旻顥搖搖頭，喺伸手接過奶茶後，將飲管放到李逸彤嘅嘴邊，「你中意飲。」
「哦⋯」李逸彤笑一笑，然後微微低頭咬住飲管飲一啖奶茶
邱旻顥一直拎住李逸彤嘅珍珠奶茶，另一隻手拖住李逸彤
番屋企嘅路同平時一樣，但李逸彤就總係想笑，笑意都掛到臉上藏唔住；邱旻顥偷望李逸彤一眼，望到佢臉上止唔住嘅笑容，佢都忍唔到笑起嚟
「笑咩？」邱旻顥好奇地問李逸彤
「突然間望到你就好想笑～」李逸彤直接講道，講嘅時候臉上都掛上燦爛嘅笑容，呢個笑容係最令邱旻顥心動嘅笑容
「我又唔係講咗啲咩搞笑嘢，笑咩啫？」邱旻顥無言地笑了，然後將奶茶遞比李逸彤，「飲唔飲？」
「嗯嗯！」李逸彤點點頭，伸手接過奶茶，「奶茶～」
番到樓下行入大堂之後，邱旻顥直接㩒咗32樓
「送咗你番去先。」邱旻顥拉一拉李逸彤嘅手，李逸彤朝邱旻顥嘅方向行近一步
當電梯到咗32樓，兩人行出電梯，但李逸彤冇直接同邱旻顥講再見然後直接番屋企，李逸彤有啲不捨地拉住邱旻顥嘅手
「呀⋯」李逸彤有啲唔自在咁撒嬌，手緊緊地拉住邱旻顥嘅手
「咩呀？」邱旻顥明知故問，佢知李逸彤唔想分開住，但偏偏要問多一次，「我地聽日會見㗎嘛～你想嘅話可以打電話。」
「打電話同見真人點一樣⋯」李逸彤微微鼓起兩泡腮，鬆開邱旻顥嘅手後直接攬住邱旻顥
李逸彤嘅雙手攬住邱旻顥嘅腰時，心臟緊張地噗噗跳，但感覺特別好
「都唔同⋯」李逸彤抬頭望向邱旻顥，雙眼裏充滿不捨
「聽日番學都可以見到呀～我地平時朝早都會一齊番學。」邱旻顥安慰李逸彤一樣輕輕拍佢嘅背
邱旻顥見李逸彤依偎喺佢嘅懷中，不禁收窄雙臂嘅範圍將李逸彤緊緊地攬實，微微耷低頭時，李逸彤嘅髮絲繞到邱旻顥嘅臉頰
「咁好啦⋯」李逸彤扁着嘴，好似受咗委屈一樣微微點頭，緩緩地將攬住邱旻顥嘅雙手鬆開，左腳先向後踏一小步，「咦⋯！？」
李逸彤發現自己冇辦法再多後退一步，李逸彤望向邱旻顥，喺兩人嘅目光交匯之際，李逸彤頓時一笑，甜蜜嘅感覺表露無遺
「我仲以為你會鬆手～」李逸彤高興地掂起腳尖，雙手攬住邱旻顥嘅頸，臉頰泛起淡淡嘅紅霞
李逸彤嘅上身微微向後靠，側着頭望住邱旻顥，笑一笑之後又攬住邱旻顥；邱旻顥望向李逸彤，李逸彤抬頭望向邱旻顥後甜甜一笑，邱旻顥提起左手輕輕地掐住李逸彤兩邊臉頰
「嗯？」李逸彤不解地側着頭，一副天真嘅模樣望住邱旻顥
邱旻顥將李逸彤嘅臉擰向一旁，然後迅速地喺李逸彤嘅臉頰上輕錫一啖，李逸彤都未比得切反應，邱旻顥就已經鬆開手
「咦⋯？」李逸彤怔了一怔，大腦都未反應過嚟，呆呆地望住邱旻顥
「嗯？」邱旻顥若無其事地望住李逸彤，就好似佢都唔知啱啱發生咗咩事一樣
「邱旻顥你、你啱啱⋯」李逸彤吞吞吐吐地講道，順手摸一摸自己嘅臉頰同時，大腦高速運算着
李逸彤冇講落去，但顯然地佢已經回神，知道啱啱邱旻顥錫咗自己一下，因為李逸彤嘅臉頰紅彤彤的，耳根都紅起嚟，感覺體溫都上升了
「你好茅呀⋯！」李逸彤將頭埋喺邱旻顥嘅頸窩中，心臟好似癲咗一樣跳動
「洗唔洗通知你一聲先？」邱旻顥笑問道，看似平靜嘅邱旻顥，實際上喺唇掂到李逸彤嘅臉頰時都已經面紅起嚟
「唔洗～」李逸彤搖搖頭
李逸彤每一下吸氣聞到嘅都係邱旻顥嘅味道，呢份味道嘅感覺好濃烈，李逸彤不自覺地用力攬住邱旻顥，比啱啱貼得更近
面對李逸彤嘅舉動，邱旻顥嘅心跳又加快咗，聽到心跳嘅聲音、感覺到心跳帶嚟嘅突突跳動
「好啦～我番去啦～」李逸彤鬆開攬實邱旻顥嘅雙手，左手拎住奶茶，右手拉住邱旻顥嘅手
「好啦，咁我地聽日番學見啦～」邱旻顥緊握李逸彤嘅手一下
「你番到去要同我講呀～」李逸彤提醒邱旻顥，手仍然拖住邱旻顥嘅手
「知啦，你番到去同我講聲啦，雖然我諗我都知你番到⋯」邱旻顥笑一笑
「嘻嘻⋯好啦～我會啦～」李逸彤甜甜一笑後講道
喺鬆開手前，李逸彤有啲猶疑一樣望住邱旻顥，邱旻顥望住李逸彤微微側頭；李逸彤甜甜一笑，然後行前一步喺邱旻顥嘅臉頰上落下一個溫柔嘅吻
「我番去啦～」李逸彤帶着紅紅嘅臉頰同羞澀嘅笑容講道
「嗯⋯」邱旻顥嘅視線都唔敢一直停喺李逸彤嘅臉上，因為李逸彤忽然嘅一吻，搞到佢心神不定一樣，「咁⋯我番到去再同你講⋯」
邱旻顥對住李逸彤講嘢嘅語氣特別柔和，雙眸中嘅溫柔都會無自覺地滲出
「咁，我陪你等埋電梯先啦～」李逸彤伸手去㩒制，順便抬頭望一眼電梯到邊一層
喺電梯到之前，邱旻顥又伸手多攬李逸彤一次，李逸彤頭靠喺邱旻顥嘅膊頭上蹭咗兩下，抬頭望向邱旻顥笑一笑
喺電梯到後門打開，李逸彤鬆開邱旻顥嘅手；喺電梯門完全閂上開始向下降嘅時候，李逸彤先轉身番屋企
「咦？哥哥你啱啱到咋？」邱茗然踏出電梯，見到邱旻顥從隔離嘅電梯行出嚟，「仲以為你一早番到嚟⋯」
「可以早得幾多？」邱旻顥邊拎出鎖匙邊無奈地問
「哥哥！」邱茗然忽然靈機一動一樣行上前半挽半捉住邱旻顥嘅手臂，語氣中夾雜着一絲期待同興奮，「你話你可唔可以幫我一個忙？」
IG Link: https://www.instagram.com/nd_cotttoncandy/?hl=zh-tw