［愛情純愛］我地之間嘅友誼純度絕對等於零！！！: 140. 難以平伏

「你今朝唔番嘅？」李逸彤純粹出於好奇問道

「冇較鬧鐘⋯」潘景諭無奈一笑，「今朝地理堂講咗啲咩？派咗小測未？」

「派咗啦，你嗰份喺⋯心怡度～」李逸彤望向沈心怡笑了笑

「幫你對咗啦⋯」沈心怡從櫃桶中拎出潘景諭嘅小測卷，物歸原主

「唔該⋯」潘景諭今日望都唔敢望多沈心怡一眼





邱旻顥番到嚟課室之後，一眼就見到潘景諭番咗嚟，邱旻顥行到潘景諭嘅座位

「番嚟啦？仲以為你今日唔番添～」邱旻顥手上拎住一盒嘢飲，行到李逸彤嘅旁邊，靠坐喺枱邊

「點會唔番，我唔係啲會特登缺席嘅人⋯」潘景諭無奈地反一下白眼

邱旻顥自然地望向李逸彤，李逸彤對佢笑一笑，然後朝邱旻顥伸手，邱旻顥就伸手捉住李逸彤嘅手

「我啱啱番嚟就要食狗糧⋯」潘景諭輕嘆一口氣，耷低頭睇緊自己份小測嘅同時搖搖頭





「我冇心㗎～冇人同你一齊派狗糧咩？」邱旻顥呢個提問看似自然同時亦有啲似故意

李逸彤忍唔住笑起嚟，佢心入面察覺到邱旻顥意有所指，李逸彤捉一下邱旻顥嘅手，偷瞄沈心怡一眼

沈心怡有種說不出嘅尷尬，然後悄然地望向潘景諭

「冇呀⋯單身狗淨係可以比人餵狗糧⋯」潘景諭輕輕一笑，手摸着後頸，雙眼一直落喺地理小測卷上，但其實冇一個字都冇睇入腦

「潘景諭你單身呀？」邱旻顥追問嘅同時鬆開李逸彤嘅手，將飲管插穿紙包飲品嘅錫箔紙





「係呀⋯！」潘景諭沒好氣地笑道，「點呀宜家？你有女朋友厲害啦？」

「幾啦～」邱旻顥滿不在乎地聳肩，但下一秒就伸手捏一下李逸彤嘅臉頰，「至少可以請你食狗糧。」

「你好衰呀邱旻顥⋯！」李逸彤喺邱旻顥嘅手臂上不輕不重地打咗一下

潘景諭嘅心入面無奈到極致，冇辦法呀但係⋯

「又唔係我唔想要女朋友⋯」一直耷低頭嘅潘景諭，目光看似不為意地落喺沈心怡嘅身上，「人地又未比答覆我⋯」

「邱旻顥你啱啱去咗邊呀？」李逸彤抬頭望向靠坐喺枱邊嘅邱旻顥，「一落堂就走咗去⋯」

「啱啱？阿sir搵我。」邱旻顥講道，然後遞咗包嘢飲比李逸彤，「順便幫你買咗嘢飲。」

「哦～」李逸彤頓時眉開眼笑，邱旻顥一個舉動，即刻令佢甜到入心，「唔該～」





潘景諭同沈心怡不約而同地擺出嫌棄同時又有少少羨慕嘅表情，食狗糧同閃光彈都食到羨慕起嚟⋯

「啱啱仲以為你買比自己飲添⋯」李逸彤飲咗一細啖，抬頭對邱旻顥露出天真嘅笑容

邱旻顥無奈一笑，將手放喺李逸彤嘅頭頂摸咗兩下；李逸彤抬起頭同邱旻顥對望，兩人喺視線對上嘅一刻，嘴角就自動上揚

靠坐喺枱邊嘅邱旻顥左手插喺褲袋，右手拎住手機睇；坐喺櫈上嘅李逸彤手拎住嘢飲，抬頭望住邱旻顥

「最近犯花痴嘅次數好似太多⋯」李逸彤自顧自地笑了笑，「呀～果然邱旻顥都係好靚仔～」

邱旻顥眼睛嘅餘光留意到李逸彤又望住佢笑，邱旻顥瞄李逸彤一眼，無奈地笑起嚟；面對李逸彤嘅天然呆，邱旻顥完全放棄抵抗，反正李逸彤係一個點嘅人都好，佢都會義無反顧咁中意佢

「同自己中意嘅人互相中意，係一件好幸福嘅事⋯」兩人嘅互動都被沈心怡睇喺眼中，心入面不禁有啲羨慕





沈心怡嘅目光緩緩地朝潘景諭移去，佢對潘景諭嘅中意一直以嚟都收喺心嘅深處，佢唔會刻意地表露出嚟，因為佢唔想令任何人覺得困擾⋯但宜家，佢朝潘景諭望去嘅目光格外柔和

「本來⋯仲以為咁樣一直落去，去到某一日就會唔再中意佢⋯」沈心怡喺心裏默默地道，「我其實⋯真係冇打算講佢知，亦一早做好「初戀一定失敗」嘅打算⋯」

潘景諭察覺到來自右邊嘅視線，潘景諭微微抬頭望去，佢同沈心怡嘅視線就喺佢抬頭望嘅一瞬間對上

兩人一發現對望，頓時各自將視線移開、低頭，當冇事發生過一樣

「一望到心怡，就諗起星期六晚⋯」潘景諭低頭喺心裏講道，只係一個對望，足以令佢心跳加速

「叮噹叮噹⋯叮噹叮噹～」上堂嘅鐘聲響起，李逸彤拉住邱旻顥嘅衫尾番埋位

潘景諭拎出下一堂嘅書放到枱上，然後將手機靠喺櫃桶邊，喺老師嚟上堂前睇多陣手機；沈心怡偷偷地望潘景諭，最近佢成日都會不自覺就望佢

「唔得唔得⋯！」沈心怡搖搖頭，輕輕地拍自己嘅臉頰，「冷靜冷靜⋯！」





⋯

「你地行先啦，我轉頭過嚟。」邱旻顥講道，佢手上拎住計錯分嘅小測卷

「我等埋你呀～」李逸彤對邱旻顥講道，佢都想同邱旻顥獨處一陣

「你行先啦，幫我叫定嘢食。」邱旻顥對李逸彤微微一笑，「免得你餓親～」

「行未呀你地？」潘景諭行到去邱旻顥嘅座位問道

李逸彤嘅上身微微往後仰，避開潘景諭望向沈心怡嘅座位，見到沈心怡整理緊枱面，李逸彤頓時靈機一動

「我落去先，你地行先。」邱旻顥講完就拎住試卷離開座位行出課室





「潘景諭！」李逸彤細聲地叫咗潘景諭一聲，臉上嘅笑容完全就係表達出佢有啲小心思

「咩呀？」潘景諭望向李逸彤

「你想唔想同心怡獨處一陣呀？」李逸彤細聲地問道，「我想等埋邱旻顥，比個機會你同心怡獨處～」

潘景諭冇即刻回答李逸彤，但佢下意識望向沈心怡嘅舉動就已經講咗心中所想

「可能佢唔想同我獨處呢⋯」潘景諭收回視線，雙手插喺褲袋，眼神裏有少許失落嘅感覺

「未必嘅～」李逸彤伸手拍一拍潘景諭嘅膊頭，但拍佢膊頭時，手都有啲猶疑，不過既然只係朋友間嘅鼓勵，咁都唔緊要嘅，「可能心怡想呢～對自己有啲信心啦潘景諭～」

李逸彤喺心裏一笑，佢都係第一次見到潘景諭冇自信嘅一面，從佢嘅語氣都表現晒出嚟⋯




IG Link: https://www.instagram.com/nd_cotttoncandy/?hl=zh-tw