［愛情純愛］我地之間嘅友誼純度絕對等於零！！！: 141. 呷醋了？

「你加油啦～比機會你同心怡單獨一齊～」李逸彤喺離開座位前對潘景諭講嘅同時，朝沈心怡嘅方向望去，「我去搵邱旻顥啦～」

李逸彤講完就離開座位，小跑着行出課室；沈心怡見到李逸彤行咗出去，潘景諭行向沈心怡

「彤彤去邊呀⋯」沈心怡心裏有啲疑惑，但佢冇將呢份疑惑講出口，只係望一望潘景諭

「佢等埋邱旻顥先嚟，叫我地去攞咗位先⋯」潘景諭嘅手下意識提起摸一摸後頸

「我地兩個⋯？」沈心怡遲疑地再問一次





「嗯⋯」潘景諭微微點頭，氣氛突然間又尷尬起嚟，「你⋯行得未⋯？」

「嗯，行得⋯」沈心怡拎好手機同銀包，將櫈拍埋，同潘景諭一齊行出課室

⋯

邱旻顥將份卷同阿sir講咗計錯分嘅情況，行去前梯落到地面嘅時候，見到李逸彤企喺前梯等緊佢

「你喺度嘅？」邱旻顥一見到李逸彤，頓時露出笑容，心入面果然都係期待李逸彤等埋佢，「唔係叫你同佢地一齊去先咩？」





「始終都係想等埋你⋯」李逸彤走近邱旻顥，對邱旻顥露出可以令人甜入心嘅笑容，「而且，我喺佢兩個中間，好似有啲尷尬⋯」

「你為潘景諭製造機會？」邱旻顥估到李逸彤嘅意圖，輕輕一笑問道

邱旻顥都知潘景諭中意沈心怡，當然，佢覺得沈心怡都係一個唔錯嘅女仔，潘景諭中意佢都係正常，而且大家都係朋友，佢都支持潘景諭

「你呷醋呀？」李逸彤忽然側着頭問邱旻顥，「我想心怡開心㗎咋～冇其他意思。」

「我冇呷醋囉⋯唔通你對潘景諭朋友以上嘅感覺？」邱旻顥無奈地搖頭後裝作疑惑地望住李逸彤問道





「冇囉，佢又唔係你～」李逸彤聳肩，用最自然嘅語氣同表情講道

「哦～」邱旻顥聽到後，心裏嘅甜意溢出，從嘴角滲出嚟，「咁識講嘢嘅？」

李逸彤成日都好有辦法一樣，用一句說話撩動佢嘅心，令佢心甜到漏

「我講事實咋嘛～」李逸彤一踏出學校門口，頓時行近邱旻顥兩步，佢側着頭望住邱旻顥，對邱旻顥笑道：「我最中意你嘛～」

「你唔怕醜㗎咩？」邱旻顥嘅笑意更加止唔住，佢都真係佩服李逸彤嘅直接

邱旻顥伸手拖住李逸彤嘅手，李逸彤嘅手比佢嘅手細，令邱旻顥不禁用力將李逸彤拖緊，好似怕李逸彤走失一樣

「你怕我走失呀？洗唔洗拖到咁實？」李逸彤回握着邱旻顥嘅手，佢其實唔介意邱旻顥咁樣拖到佢實一實，「我又唔係小朋友。」

「我怕唔拖實你，你會去第二個身邊嘛～」邱旻顥望住李逸彤嘅眼神裏係滿滿嘅寵愛，佢特別中意李逸彤偶爾自然不做作嘅撒嬌





「點會！」李逸彤一臉認真地望住邱旻顥嘅臉，「左睇右睇，都係得你係我中意嘅樣。」

「唔⋯我都覺得，得你生成我中意嘅樣⋯！」邱旻顥盯着李逸彤嘅臉回答道，「生到咁可愛，最得人中意啦～」

「洗咩講～」李逸彤靠近邱旻顥企，一臉自豪地回答道

喺餐廳坐咗一陣嘅沈心怡同潘景諭，始終都係有種講唔出口嘅尷尬⋯星期六之後，兩個人一單獨一齊就特別扭擰唔知點咁

「其實係唔係得我覺得尷尬⋯」沈心怡喺心咁諗嘅同時，抬眼望一眼認真睇餐牌嘅潘景諭，「佢同平時都差唔多呀⋯」

沈心怡喺心入面嘆一口氣，只有佢自己知道，喺佢主動錫咗潘景諭嘅嗰一晚，佢完全瞓唔著，一直眼光光到3、4點，什至係因為攰到瞓著⋯

「我係唔係都應該差唔多要比個答覆佢⋯」沈心怡諗起答覆嘅問題，潘景諭仲等緊佢嘅答案





潘景諭嘅目光偷偷地從餐牌移開，望向低頭睇緊餐牌嘅沈心怡；喺望向沈心怡嘅一刻，潘景諭知道自己對沈心怡嘅嗰份感覺嘅強烈，或者係沈心怡都無法想像⋯

佢中意沈心怡散發着嘅柔弱、中意佢嘅可愛開朗、中意佢嘅堅強、中意佢嘅善良⋯沈心怡嘅一切，佢都中意

沈心怡散發對柔弱着感覺，但卻柔而不弱，就算一件事好難做到，沈心怡都會努力地嘗試、唔輕易放棄；單憑呢一點，就激發到潘景諭嘅保護欲，想好好保護呢個女仔

收到邱旻顥話嚟緊message，潘景諭自然要讓番個位比佢地，便行到沈心怡嘅旁邊坐低

潘景諭拎住手機睇，當潘景諭剛好睇緊IG嘅dm時，沈心怡帶着少許好奇心偷瞄潘景諭嘅手機螢幕

「好多message⋯」沈心怡見到潘景諭有好多未讀嘅message，好奇地集中再睇真啲，「全部都係女仔⋯！」

沈心怡嘅內心頓時唔高興了，耷低頭細聲地哼咗一聲，就坐喺沈心怡隔離嘅潘景諭當然聽到，佢隨即望向沈心怡

沈心怡意識到潘景諭好似聽到，便抬起頭望向潘景諭，一抬起頭望就同潘景諭嘅視線完完全全咁對上





「你咁多未讀message嘅⋯？」沈心怡緩緩地開口，嘗試打破尷尬同沉默

「唔太重要所以就唔睇⋯」潘景諭望咗螢幕一眼後道

「全部都係女仔⋯」沈心怡細聲地講道，呢句說話連沈心怡自己都感覺到有啲醋意

「我都冇覆。」潘景諭聽出沈心怡嘅醋意，嘴角上揚

沈心怡輕輕抿唇，兩人沉默落嚟，大家都冇出聲；沈心怡自己都唔明點解自己睇到之後，個心會咁唔舒服，就係唔高興

「如果你拍拖嘅話⋯咁就會少咗女仔追你⋯」沈心怡輕皺起眉頭，帶着少少嘅不爽講道

「唔係啲咩問題。」潘景諭聳肩





一聽到沈心怡提到同拍拖有關嘅話題，潘景諭就覺得緊張，佢知道佢嘅回答同沈心怡嘅提問，都代表沈心怡嘅考慮

與此同時，潘景諭諗起喺李逸彤離開座位前最後同佢講嘅一句提醒：「心怡就係個好冇安全感嘅人，佢一定會考慮好多好多⋯」




IG Link: https://www.instagram.com/nd_cotttoncandy/?hl=zh-tw