［愛情純愛］我地之間嘅友誼純度絕對等於零！！！: 143. 想告訴您⋯

「問心怡有冇咪得⋯」潘景諭靈機一動，諗到一個唔洗特登番課室開locker嘅方法，但再諗咗陣之後，潘景諭又嘆一口氣，「算啦⋯好似好多頁⋯佢又話唔會影比我⋯我都係番去拎啦⋯」

潘景諭無奈地行到旁邊上樓梯行番上課室，番去開locker拎番本地理書

「嗯⋯？」潘景諭行到去課室門口時，見到沈心怡仲喺課室坐喺位執緊嘢，「你仲喺度嘅⋯？」

「哦⋯係呀⋯」沈心怡略略地帶過呢個話題，將放喺枱上嘅功課疊好收入書包

潘景諭徑直地行到自己嘅locker前，正要打開locker門打算拎番本地理書，心入面仲覺得有啲小幸運，陣間可能有機會同沈心怡一齊番去





「你做咩上番嚟嘅⋯？」沈心怡有啲明知故問，明明佢就知道，潘景諭係番嚟拎地理書，但為咗做戲做全套，佢都係問出口

「你提我拎地理書嘛，咪番嚟拎。」潘景諭打開locker門，一本本放好嘅書中唯獨見唔到地理書，「冇嘅⋯？」

沈心怡有啲心虛地將視線移開，微微低頭後輕輕抿唇，輕手輕腳地從自己嘅櫃桶中拎出潘景諭嘅地理書

「唔通我拎咗⋯？」潘景諭疑惑地打開書包拉鍊再搵一次，但書包入面冇地理書

沈心怡雙手放喺身後，手上拎住潘景諭嘅地理書，悄悄地行到潘景諭嘅左邊；潘景諭往右邊回頭望向自己嘅座位，又彎腰朝自己嘅櫃桶望一眼，但佢嘅櫃桶空空如也





喺潘景諭回頭望向locker打算再搵一次嘅時候，沈心怡伸出右手拉一拉潘景諭嘅衫袖

「嗯？」潘景諭頓時望向沈心怡，目光落喺一臉羞澀、臉頰泛着淡淡紅霞嘅沈心怡身上

沈心怡放喺身後拎住地理書嘅手因為緊張而用力地捏着地理書，潘景諭都察覺到沈心怡嘅「異常」，本來搭喺locker邊嘅手緩緩地放低

「地理書⋯」沈心怡將地理書從身後拎出嚟遞比潘景諭

「喺你度嘅⋯？」潘景諭瞄一眼地理書，因為疑惑而眉頭輕皺，「我仲以為唔見咗⋯」





「嗯⋯因為想你番嚟課室一轉⋯」沈心怡細聲地講道，佢完全唔敢抬起頭同潘景諭對望，「所以⋯特登收起咗你嘅地理書⋯」

「點解⋯？」潘景諭不解地望住沈心怡問道，佢心入面嘅第一個反應係疑惑，第二下先留意到沈心怡嘅表情

潘景諭嘅心臟一縮，佢好似⋯大概估到沈心怡想做啲咩⋯但佢唔敢肯定自己所想係唔係就係沈心怡所想

呢一刻，時間就好似靜止咗一樣，課室裏安靜得只剩低風扇轉動嘅聲音同樓下喺操場嘅田徑隊傳嚟嘅訓練聲

潘景諭安靜地等待沈心怡開口，沈心怡用力地捉住潘景諭嘅衫袖，搞到潘景諭衫袖嘅一角都皺晒；沈心怡喺開口前先吞一啖口水，令自己冇咁緊張

「之前⋯你問我係唔係中意你，我冇答你⋯」沈心怡緩緩開口，聲線帶着微微嘅顫抖，「今日我想話你知⋯我係中意你⋯」

「嗯⋯」潘景諭不禁閉氣一秒，然後又將氣呼出，感覺⋯心跳加快了，呼吸都變風淺促起嚟⋯

沈心怡因為緊張，接住落嚟嘅說話佢都講唔出口，但因為早就答應咗潘景諭、亦決定咗要將心聲講出口，沈心怡都係鼓起勇氣





「我⋯想同你一齊⋯！」沈心怡鼓起1000%嘅勇氣對潘景諭講出佢嘅答覆，「⋯！」

沈心怡嘅回覆，最後一個字啱啱講完，潘景諭一下子就伸手將沈心怡拉到懷中攬實；沈心怡一臉愕然，對於突如其來嘅擁抱有啲措手不及

「好⋯」潘景諭低着頭，佢嘅聲音就喺沈心怡嘅耳邊傳嚟，佢嘅等待係冇白費，「當然好⋯」

親耳聽到沈心怡嘅回答，潘景諭嘅心係激動係感動係心動，對佢嚟講，沈心怡已經足夠特別，至少喺佢心中⋯係最特別嘅存在

沈心怡回神過來，微微低頭將額頭靠喺潘景諭嘅膊頭上，鬆開捉住潘景諭衫袖嘅手，將地理書放喺一旁嘅枱上，雙手放到潘景諭嘅腰上，緊緊地捉住佢嘅裇衫；喺呢個距離，佢只係聽到融合埋一齊嘅心跳聲，將其他聲音都自動屏蔽起嚟⋯

「沈心怡，我⋯真係好中意你⋯」潘景諭自己都覺得自己宜家呢個樣好冇自信，佢從未試過對一個人講呢種情深嘅說話，「我真係冇諗過要同你以外嘅人一齊⋯」

潘景諭抬起頭，將沈心怡鬆開，臉上係一副難得嘅羞澀，佢對沈心怡，總會毫無保留地表現自己嘅中意，因為太難壓抑呢份感覺





沈心怡抬頭望住潘景諭嘅雙眼，眼中係感動亦係心動，望住潘景諭時，雙眼都係閃閃發光；沈心怡嘅雙手捉住潘景諭嘅衫領用力往自己嘅方向一拉同時踮起腳尖，勇敢果斷地喺潘景諭嘅唇上落下一個蜻蜓點水一樣嘅吻，然後迅速地鬆手

「地理書，還番比你⋯」沈心怡拎起啱啱比佢放喺一旁嘅地理書，將書推到潘景諭嘅懷中

沈心怡因為覺得怕醜尷尬，所以書一到潘景諭嘅懷中後，沈心怡頓時轉身番埋位；潘景諭立馬回神，大步地走向沈心怡，從後攬過沈心怡嘅膊頭，抬起沈心怡嘅下巴，毫不猶疑地喺沈心怡嘅唇上錫一啖

「番去啦我地⋯」潘景諭喺沈心怡嘅耳邊講道，然後緩緩地鬆開手

沈心怡嘅臉頰紅彤彤的，明明課室開咗風扇，但感覺都係好熱⋯潘景諭都面紅耳熱，但佢係打從心底咁興奮激動

潘景諭主動地拉起沈心怡嘅手，用力地將沈心怡嘅手拖實，潘景諭回頭朝沈心怡望一眼，沈心怡同佢對上視線，喺對望嘅雙眸中似乎係講緊「終於同到你一齊」一樣⋯

相識八年，啱啱⋯開始咗八分鐘⋯

⋯





「你最好真係溫咗書啦邱旻顥～」李逸彤瞇起雙眼望住邱旻顥，兩人剛好講起今日嘅默書，「你真係背咗書先好呀～」

李逸彤擰番好個人，邊食着早餐三文治邊拎住中文書溫默書，一直細聲地喃喃自語背着課文嘅內容

「李逸彤，今日默邊度？」邱旻顥嘅左手掀着書頁，右手伸手拍李逸彤嘅膊頭

「頭三段呀⋯」李逸彤嘅思路頓時被打斷，佢回頭無奈地望向邱旻顥，「你唔係背咗㗎咩？」

「背咗背咗，confirm一下有冇背錯嘛～」邱旻顥嘅手拉住李逸彤嘅手肘

潘景諭同沈心怡今日一齊番學，沈心怡嘅內心莫名緊張，明明平時都有機會撞到然後一齊番學，但今日特別緊張








IG Link: https://www.instagram.com/nd_cotttoncandy/?hl=zh-tw