［愛情純愛］我地之間嘅友誼純度絕對等於零！！！: 144. 尷尬

潘景諭行喺前面，沈心怡跟喺佢嘅身後，行到課室門口嘅時候，潘景諭故意突然剎掣停落嚟，沈心怡直撞上潘景諭嘅書包

「你做咩突然停低呀⋯！」沈心怡後退一步，輕皺起眉頭道

潘景諭笑而不語，宜家無論沈心怡係嬲定唔開心，喺潘景諭眼中都係佢撒嬌嘅表現

邱旻顥眼尾瞄到有人企喺課室門口但冇行入嚟，於是抬頭望向門口嘅方向，一望就見到潘景諭同沈心怡有講有笑咁行入嚟課室，但喺兩人嘅笑容中又夾雜咗少許害羞

「李逸彤！」邱旻顥伸手拉一拉李逸彤嘅手肘，細聲地叫咗佢一聲





李逸彤一回頭望佢，邱旻顥就朝潘景諭嘅方向望去然後抬一抬下巴；李逸彤沿住邱旻顥嘅目光望去，見到潘景諭同沈心怡番到埋位

「潘景諭咁開心嘅⋯？唔通心怡⋯」李逸彤喺心裏猜測道，「唔通一齊咗⋯？」

雖然李逸彤有呢個想法，但一直都冇問出口，直到去小息嘅時候，一打鐘一放小息，李逸彤即刻就見到沈心怡嘅座位，借沈心怡前面嘅座位一坐，反正本來坐呢個位嘅同學行開咗

「嗯⋯？」沈心怡見李逸彤定睛望住佢，頓時有啲心虛，因為佢仲未同李逸彤講佢已經同咗潘景諭一齊嘅事

「嘻嘻⋯」李逸彤望一望潘景諭後又望番沈心怡輕輕一笑，「今日咁開心呀～」





「我只係未同你講咋嘛⋯唔係要暪你㗎⋯！」沈心怡連忙解釋，怕李逸彤以為佢係特登唔話佢知

沈心怡嘅臉頰有一抹紅霞，佢望向潘景諭，潘景諭一見到沈心怡望佢，嘴角都自動上揚

「哎呀～」李逸彤望住有啲尷尬唔自在嘅兩人忍唔住笑起嚟，「搞到我都覺得自己喺度發光啦～」

「唉～」潘景諭起身嘅時候故意嘆一口氣，沈心怡頓時望向潘景諭，眼神裏夾雜咗少少嘅疑惑，「去廁所。」

潘景諭解釋完之後就離開座位，沈心怡嘅視線跟住潘景諭移動，直到潘景諭踏出課室門口





「所以最後，係你開口啦？」李逸彤細細聲地問

「嗯⋯」沈心怡微微點頭，「咁我應承咗嘛⋯」

「都估到㗎啦～突然間話留低等埋潘景諭～」李逸彤對於自己估中咗沈心怡回答呢件事覺得有少少自豪，「我地心怡大個女啦～」

沈心怡回想起琴日，其實都覺得好神奇，自己真係真係鼓起好大嘅勇氣將潘景諭留低⋯中意一個人，對佢講出自己嘅心意，係一件好需要勇氣嘅事⋯

「呀⋯但係都太益佢啦⋯」李逸彤忽然略有不滿地道，「我地心怡都太好啦～益咗潘景諭⋯」

「阿諭唔好咩？」沈心怡笑一笑後問李逸彤，「唔係都幾好咩？」

「點知呀⋯我冇特別想法⋯」李逸彤講嘅時候，望向坐喺位嘅邱旻顥

對李逸彤嚟講，最好嘅永遠都係邱旻顥，冇其他男仔可以同邱旻顥比較





「知啦知啦～你對眼淨係望到邱旻顥㗎咋嘛～」沈心怡沿住李逸彤嘅視線望咗一眼，見到李逸彤定睛望住邱旻顥，「邱旻顥冇缺點嘅～」

「佢有缺點都唔緊要，冇人係完美㗎嘛～」李逸彤滿不在乎地聳肩

當好中意一個人嘅時候，佢嘅缺點都會被自動屏蔽，優點都會被放大

「邱旻顥一直喺度睇手機⋯」李逸彤見邱旻顥一直低頭睇手機，心裏有種忽視咗佢嘅感覺，「心怡，我過去搵一搵邱旻顥。」

「好呀～」沈心怡點點頭

李逸彤起身番到自己嘅座位坐低，佢伸手拉起邱旻顥嘅手，喺枱擋住嘅位置拖住手

「嗯？」邱旻顥有啲疑惑，對於呢個突如其來嘅拖手，心臟收縮咗一下，「做咩過咗嚟嘅？你唔係同沈心怡傾緊計咩？」





「見你喺度睇手機，搞到我覺得⋯我好似冇理你咁⋯」李逸彤扁起嘴，微微低頭講道

「冇呀～」邱旻顥望住李逸彤一臉可愛，頓時露出笑容，「我睇手機啫，你搵沈心怡玩啦～」

「其實都係想痴住你多啲⋯」李逸彤抬眼望咗邱旻顥一眼後低聲道，「但喺學校又唔可以咁樣痴住你⋯」

「你幾時咁痴身㗎？」邱旻顥本來只係輕輕拉住李逸彤嘅手，但就喺李逸彤講完之後，佢就將李逸彤嘅手拖實

「你唔中意嘅話，我唔痴住你都得⋯」李逸彤故作要將手甩開，邱旻顥見狀立即更用力地將李逸彤嘅手握緊

「冇唔中意。」邱旻顥立刻澄清，李逸彤痴住佢係因為中意佢，如果李逸彤一啲都唔痴身，邱旻顥就真係要擔心，「你痴住我好正常呀，而且⋯」

邱旻顥講咗頭半句又冇講落去，李逸彤微微側着頭望住邱旻顥，等邱旻顥講埋後半句

「再咁樣拖一陣先鬆手⋯」邱旻顥呢句說話，夾雜着半點撒嬌嘅意味





李逸彤聽出話中嘅撒嬌，頓時感覺有一枝箭飛嚟插中心臟

「好⋯」李逸彤伏低喺枱上，臉頰靠喺左臂上，本來開着冷氣都幾涼嘅課室，忽然間有啲熱⋯

⋯

「你做咩咁尷尬咁⋯？」邱旻顥望住李逸彤扭扭擰擰嘅模樣，無奈地笑問道，「你好唔想同我食飯？」

「唔係呀～」李逸彤立馬搖頭，然後雙手拎住叉，輕輕地捏着叉嘅手柄，「只係好少會喺著住校服嘅情況下同你兩個人單獨食lunch⋯」

平時都係佢地兩個人加埋沈心怡、潘景諭一齊食飯，平日幾乎唔會喺著住校服嘅情況下兩個人單獨食飯，所以李逸彤先覺得有啲唔知點嘅感覺

不過今日，因為潘景諭一早講咗想同沈心怡單獨食lunch，所以佢地就分開食飯





可能因為習慣咗平時四個人一齊食飯，所以宜家只有佢同邱旻顥就有啲唔自在⋯但李逸彤絕對唔係唔想同邱旻顥一齊食飯




IG Link: https://www.instagram.com/nd_cotttoncandy/?hl=zh-tw