［愛情純愛］我地之間嘅友誼純度絕對等於零！！！: 147. 兩種愛情

潘景諭緩步行番去地鐵站同時想平伏一下心情，但喺睇緊手機嘅時候，手機彈出一個通知

「佢po咗story仲@咗我⋯！」潘景諭意外地望住手機嘅通知，見到沈心怡@咗自己嘅時候，佢嘅內心係激動嘅

潘景諭將沈心怡嘅story喺自己嘅story上repost一次，然後再主動地將佢同沈心怡上次出街影嘅合照po上story，只喺圖片上附上一個紅色嘅心心emoji

呢種公開方式低調且高調，潘景諭就係想先宣示主權，免得有其他男仔中意或者纏繞沈心怡

呢個公開嚟得有啲突然，沈心怡冇諗到潘景諭會以呢個方式直接公開





沈心怡無力地蹲低喺枱前，臉紅得同放喺枱上嘅蘋果差唔多，佢真係服咗潘景諭

翌日番到學校嘅時候，基本上班上有睇潘景諭琴日嘅story嘅人都大概知咩事，沈心怡由番到嚟嘅一刻就覺得渾身唔自在

「陪我去買嘢食？」潘景諭起身打算去小食部時問沈心怡

「好⋯」沈心怡連忙起身，心入面覺得唔自在，想離開課室一陣

一踏出課室門口，潘景諭就望住沈心怡一笑，沈心怡輕皺起眉頭、不解地望住潘景諭





「你都公開得太突然啦掛⋯」沈心怡無奈地道，佢唔係介意潘景諭公開，只係自己未有心理準備

「Okay啦～怕有人追嘛，唯有講定我名草有主先。」潘景諭輕輕一笑道

兩人經後梯落小食部，平時後梯都比較少人行，大家都習慣用前梯

落咗兩層之後，潘景諭偷瞄沈心怡一眼，悄悄地留意着沈心怡

「沈心怡⋯！」潘景諭伸手拉住沈心怡嘅手肘一下





喺沈心怡望向佢嘅時候，潘景諭嘅手迅速地輕托起沈心怡嘅下巴，沈心怡抬頭望向佢嘅瞬間，潘景諭低頭就喺臉頰上一吻

「潘景諭！你、你做咩⋯！陣間有人上嚟見到⋯！」沈心怡又慌張又害羞地壓低聲線講道

「沈心怡我中意你。」潘景諭毫不掩飾自己中意沈心怡嘅心，直接地再一次表白道

「我、我知啦⋯！」沈心怡比潘景諭突如其來嘅表白嚇親，心跳快得好似要心臟病發一樣，「我又唔係唔知⋯！」

望住沈心怡嘅害羞，潘景諭嘅心裏就忍唔住開心

潘景諭伸手放到沈心怡嘅下巴托住，輕掐住佢兩邊臉頰，將沈心怡嘅臉擰過嚟面向自己，今次佢直接耷低頭喺沈心怡水嫩嘅唇上落下一個吻

「潘景諭！」沈心怡嚇得連忙捏咗潘景諭嘅手臂一下，「喺學校啦！其他人會見到⋯！」

沈心怡打咗潘景諭一下，臉頰紅彤彤的，心臟狂跳，感覺離心臟病發唔遠了





「哦，知道～」潘景諭滿足地笑，望住沈心怡氣呼呼嘅模樣，佢都係乖乖地點頭

潘景諭嘅心情隨住沈心怡一句說話一個表情而高低起伏，沈心怡每一個舉動都打中潘景諭嘅心動點

⋯

「眼瞓？」邱旻顥望住坐喺佢隔離嘅李逸彤

李逸彤成個人都隨住地鐵行駛時嘅震動搖擺，感覺企喺度都可以瞓得著

「嗯⋯」李逸彤微微點頭，聲線軟綿綿的，手捉住邱旻顥嘅手肘輕輕一拉

邱旻顥默默地挺直腰桿坐好，李逸彤將頭側着靠喺邱旻顥嘅膊頭上





「好攰⋯」李逸彤細聲地講道

邱旻顥微微轉頭溫柔地望李逸彤一眼，怕動作大啲都會整醒李逸彤

「睇起嚟真係好攰⋯」邱旻顥嘅手輕輕地靜住李逸彤，又默默地坐直個人

李逸彤郁咗兩下，邱旻顥留意李逸彤一下

「唔⋯」李逸彤睜開眼後坐好起嚟，手輕輕地揉眼

「未到，你仲可以瞓多陣。」邱旻顥伸手輕拍李逸彤嘅頭兩下，然後又拍一拍自己嘅膊頭，「瞓多陣？」

「唔洗⋯」李逸彤柔柔地道，但下一秒又將頭再次靠喺邱旻顥嘅膊頭上

邱旻顥嘅頭向李逸彤嘅方向側去，臉頰掂住李逸彤嘅頭；李逸彤嘅左手拖住邱旻顥，右手捉住邱旻顥嘅前臂





「有佢喺度真係好⋯聞到佢嘅味道，好安心⋯」李逸彤緩緩合上眼

邱旻顥身上嘅味道好強烈，係就算李逸彤冇同邱旻顥見面都可以聞到嘅味道

中意一個人，就會聞到嗰個人身上獨特嘅香味，唔會有其他嘢可以有同樣嘅味道，只有嗰個人會擁有

「陣間差唔多到嘅時候我再叫你⋯」邱旻顥低聲地對李逸彤道

「嗯⋯」李逸彤微微點頭

邱旻顥對佢總係好溫柔、好細心、好貼心⋯可能係與生俱來嘅性格，亦可能係成長過程中逐漸形成

邱旻顥嘅溫柔可以直接打動李逸彤嘅心，佢中意邱旻顥自然唔做作嘅體貼，唔明顯但又會令佢感覺到嘅溫柔





愈相處得耐，愈覺得邱旻顥嘅呢種性格係刻喺骨子裏：唔會刻意表達，每一個舉動都係自然反應一樣

當地鐵駛入月台嘅時候，邱旻顥拍一拍李逸彤嘅手示意到站；李逸彤睜開眼，喺佢完全回神前，邱旻顥都放慢腳步，小心翼翼咁拉住李逸彤行

李逸彤踏上電梯，佢比邱旻顥企高一級

「邱旻顥⋯我地會唔會一直一齊⋯？」李逸彤突然問道




///
聽日係最後一集，記得嚟睇～


IG Link: https://www.instagram.com/nd_cotttoncandy/?hl=zh-tw