［愛情純愛］我地之間嘅友誼純度絕對等於零！！！: 146. 是認真的！

「拜拜～」「拜拜～」

兩個女仔互相講拜拜，然後就各自番屋企

「行啦沈心怡！」潘景諭一下子攬過沈心怡嘅膊頭就行

「宜家咪行緊囉⋯！」沈心怡無奈地被潘景諭拉住行

沈心怡推開潘景諭搭喺佢膊頭下嘅手，潘景諭嘅手一垂低就即刻拖起沈心怡嘅手，一刻都唔會同沈心怡保持距離





沈心怡仍然有啲唔習慣同潘景諭喺人前咁親近，行嘅時候都有啲唔自在嘅感覺，自動地喺自己同潘景諭之間拉開少許空隙

「你做咩要行開？」潘景諭不解嘅同時，語氣中亦有啲不悅

「呃⋯有啲唔慣都係⋯」沈心怡尷尬地坦白道

每當佢行近潘景諭，心跳就完全無法控制

「唔慣啲咩？」潘景諭毫不猶疑追問沈心怡，關於沈心怡諗緊啲咩，佢都好奇想知，「之前我都會送你番嚟。」





「呃⋯唔係呢個⋯」沈心怡扭扭擰擰，有啲欲言又止

要點樣解釋比潘景諭知佢唔習慣嘅嘢？如實咁回答，會唔會令潘景諭唔開心，以為自己唔想同佢一齊？

「我嘅意思係⋯」「意思係？」

潘景諭擺出一副要追着沈心怡嘅說話嘅氣勢，沈心怡都未講完，潘景諭就即刻搶答一樣追問

「唔慣突然間同你咁close⋯」沈心怡一臉唔好意思地笑一笑，同時又不自覺地向旁邊行咗兩步





「咁宜家開始要習慣下啦～」潘景諭一手就將沈心怡拉回自己身旁，沈心怡跌跌撞撞地撞進潘景諭嘅懷中

「你真係⋯！」沈心怡鼓起兩泡腮，帶着一分抱怨、九分撒嬌嘅聲線道：「你個人咁霸道㗎！行遠兩步都唔得⋯！」

「係呀！我係咁㗎啦！」潘景諭理直氣壯地回答沈心怡，手更用力地拖實沈心怡嘅手

面對潘景諭嘅直接，沈心怡一下子笑咗出嚟，佢直覺話佢知潘景諭嘅霸道係因為佢對自己嘅認真，所以先會霸道，對於自己愈中意嘅嘢愈唔會讓步

「你就習慣下啦～」潘景諭仲特登握一下沈心怡嘅手，「我係霸道㗎啦～」

「哦，考慮下啦⋯」沈心怡一臉不在意地點頭，但內心係激動嘅，只係沈心怡唔想將呢份激動放到臉上

潘景諭最在意沈心怡嘅反應，沈心怡呢份唔在意嘅感覺對潘景諭嚟講實在難受，潘景諭知道或者自己冇辦法喺呢一刻將沈心怡內心嘅不安完全抹去，但佢好希望沈心怡相信佢，相信佢對佢嘅中意同佢拍拖嘅選擇係認真

「好啦，我地聽日見啦好唔好？」沈心怡番到屋企樓下，佢轉身望向潘景諭，但手仍然唔捨得鬆開





「你喺度等我一陣得唔得呀？」潘景諭忽然間著急地問道，「一陣就得！」

「哦⋯好呀⋯」沈心怡愣了一愣，完全搞唔清狀況

潘景諭聽到沈心怡嘅同意後，即刻轉身就跑起嚟，留下滿頭問號嘅沈心怡企喺原地

「去、去邊呀⋯？」沈心怡一頭霧水地望住潘景諭跑走嘅背影，完全唔知道發生緊咩事

沈心怡企喺原地呆呆地等潘景諭番嚟，偶爾抬頭望一望天空，偶爾伸手整理一下校裙嘅裙擺

「阿諭到底去邊呀⋯」沈心怡低頭沉思

正常沈心怡估緊潘景諭去邊幾時番嘅時候，潘景諭跑到番嚟





「哈⋯哈⋯哈⋯！」潘景諭跑到番嚟到沈心怡嘅面前，先彎着腰雙手扶住膝頭用力地喘着氣，吞一啖口水後又挺直腰桿企好，「送比你⋯！」

「你就係特登跑去買花比我呀⋯？」沈心怡訝異地望住潘景諭遞到自己面前嘅一束藍色滿天星，心裏默默地有啲感動

「哈⋯哈⋯嗯！」潘景諭仍未回氣，佢點點頭，沈心怡伸出雙手接住潘景諭手中拎住嘅一束滿天星

「點解咁突然⋯？」沈心怡雖然感動，但都係有啲不解潘景諭突然跑去買花比佢嘅原因，雙眼帶着閃光問潘景諭

「我知我冇可能喺啱啱同你一齊就可以比到你100%嘅安全感⋯」潘景諭認真地望住沈心怡道，「但我希望你信我係認真。」

「我信呀⋯！」沈心怡感動地講道，拎住花嘅佢行前兩步一下子伸手攬住潘景諭，「我信你⋯！」

「我會努力比安全感你⋯」潘景諭雙手攬住沈心怡嘅背，佢認真嘅一句說話打動到沈心怡內心嘅深處

當沈心怡番到屋企，佢望住佢啱啱用花樽插好嘅滿天星，腦海中浮現出潘景諭對佢認真講出嘅一字一句





沈心怡以充滿愛意嘅眼神望住眼前嘅滿天星，心有啲醉嘅感覺，潘景諭去買花係佢意料之外嘅事

「多謝你揀我⋯」沈心怡嘅指尖輕碰一下花朵，望住眼前嘅花柔聲地道

潘景諭嘅每一句說話都好似烙咗喺沈心怡嘅心一樣，佢嘅聲線一直喺沈心怡嘅腦海裏迴盪着

沈心怡拎起手機，因為好奇而悄悄地上網查一下滿天星嘅花語

「嘻⋯」沈心怡望住搜尋結果甜笑起嚟，瞬間心甜到膩，「都唔知你係唔係睇過先買～」

感覺潘景諭好努力地用行動去證明對自己嘅真心，沈心怡望到花語嘅當下，心臟用力地收縮一下，心動嘅感覺隨之而來

手機嘅頁面停留喺搜尋結果⋯「真心真意地喜歡」⋯








IG Link: https://www.instagram.com/nd_cotttoncandy/?hl=zh-tw