如果讀者喜歡此故事,希望你能正評+留言,或到penana點「喜歡」,謝謝你的支持!
 
https://www.penana.com/story/90093/輕鬆-校園-只有一年回憶嘅高中生涯
 
==================================
 
5章 - 高中回憶如社交網嘅wall
 
「中學完撚咗架啦,唔會番嚟架啦,就好似已經中靶嘅箭,射咗出去架喇!一嚟就考DSE,連拎成績都未必番學校拎,都係上網睇數目字架咋!」皮蛋不斷刺激麗連。「記住一句話︰你嘅中學回憶就只係得番電…」
 




「收皮呀!」麗連推咗皮蛋一下。「唔制呀!我要last day呀!」然後中咗埋去光秀度。
 
「點解會咁架,好地地中學人生,以前聽啲老海鮮講︰『到中學人生完嘅時候,就會唔捨得幾年原來係咁短』。」書銘丼隻叉落枱上面。「以前我覺得好誇張,因為我仲讀緊,但係自從中四中學人生就完咗,我對呢句說話有講唔出嘅感覺。」
 
皮蛋︰「上一屆仲有完整中四,我哋得幾個月咋!一句停課就停到而家!」
 
「你兩個收聲!我嘅中學人生未完架!」麗連仲唔肯接受現實。
 
書銘︰「係嘅,我哋仲要影相交功課,但係唔洗番學校交。不過咁,咁仲算唔算讀中學?十足啲興趣班︰鐘意就番吓學,唔鐘意就遲到缺席。」
 




光秀︰「中學模式變咗興趣班…真係sad。」
 
「咪係囉。」我插嘴。
 
書銘︰「輝記你不嬲當學校係興趣班架喎。」
 
我︰「咁畢業我都有份嘅,我都係你哋同班同學嚟架嘛。」
 
光秀︰「講開又講,我都好耐冇見啲friend喺IG Facebook Mewe Po嘢喇,死城咁樣。」
 




麗連︰「一個人溫書有乜好po?」
 
光秀︰「我哋五個人呀!不如影一張po上去?」
 
書銘︰「呢個主意好!」
 
聽完光秀提議,我哋立即行動,我舉機自拍一張,po咗上去個wall度,就好似以前無病呻吟都會上去寫幾句,今日除咗幾句,仲加咗一張相。
 
──我哋好努力溫書。(幸福笑樣)
 
「呢句出自輝記手筆,硬係覺得好唔慣。」皮蛋用電話睇我個po講。
 
「一係你po囉,我驚皮蛋你個wall冇人睇咋!」
 
我哋五個人裡面最毒嘅皮蛋,po咩都冇人睇,得我哋幾個會Like。我個po開咗唔係好耐,咁快已經有人俾反應。




 
心心。
 
閱讀表情。
 
一百分。
 
我︰「其實啲人喺咪好悶?喺個wall上面等人開po咁嘅?」
 
我摷咗陣同學嘅wall,竟然係…
 
「嘩屌,所有人個wall幾乎空架喎。」我有啲驚訝。
 
麗連︰「唔係呀,其他人都會寫吓嘢吖。」
 




我︰「轉載新聞囉,寫自己嘢真係冇乜,我碌咗三個同學都唔見有咩睇,佢哋上一個po係個幾月之前呀。」
 
書銘︰「係喇係喇,知你威喇偽毒輝,多Friend子吖嘛。你都係想我哋咁講啫。」
 
「屌你啦!」我一手箍住書銘。「你個死仔成日疾住晒!」
 
光秀︰「喂,有人話報警喎。」
 
正當我想屌尻書銘條督眼督鼻嘅時候,聽到有另一個人想俾我屌,我即刻拎起電話。
 
──限聚令呀屌晒你哋,報警!(警燈)
 
真係好撚煩,聚會又有人數限制,不如唔好同屋企人食飯啦!
 
「五個咋屌你!你唔好俾我見到你同人食飯!」




 
──我不嬲都一個人架喇!
 
嘩,原來肺炎年代,毒撚先可以寸人,大條道理一個人。
 
話時話,咁光秀佢哋個wall呢?
 
我點咗入去佢哋account睇,碌咗一陣,點知…
 
「喂,你哋…」
 
又係乜都冇。
 
「真係個個都掛住溫書架?除咗新聞嘢,你哋啲個wall冇郁過喎?」
 




「屌,有乜好寫啫。」皮蛋講。「咁dry,唔通俾人笑毒撚咩?」
 
皮蛋你本來就毒。
 
書銘︰「邊似得你呀輝記,日日都有更新。」
 
嘩…真係唔敢相信,昔日每日都更新影相嘅麗連,個wall空晒;會去打波約人嘅書銘,個wall冇郁過;好鐘意轉載新聞嘅皮蛋…屌,佢條毒撚算喇;光秀就一向唔玩社交網,原來兩年過去,所有人嘅人生都好似個wall咁︰空白一片、冇咩值得寫落去。咁係嘅,溫書真係唔值得寫,我哋連帶口罩落圖書館嘅機會都冇呀!
 
屈指一算,中學人生得番幾個月。
 
「喂,抖咗咁耐,溫書嚕。」
 
幾個月之後,我哋就唔會再有機會番學校上堂,校門嘅看更、好似床邊鬧鐘嘅校鐘,就唔會再同我有交雜。
 
想唔想番學?
 

 
我唔會問得出「唔知下次番學係幾時呢」呢啲咁鬼上身嘅問題,曾幾何時我真係覺得呢個問題同大人世界嘅「我好鐘意番工」係一樣。大人「鐘意」番工,係因為要錢,所以有種渴求;咁啲人突然想番學,其實點解會有呢個諗法?
 
鬼上身?
 
一種幻得幻失嘅感覺?
 
還是…
 
我望過去光秀屋企牆上面嘅日曆,今日係中六嘅冬天,即係…中六已經進入倒數階段,得番三個月左右。
 
「…」
 
其實,即使度度都閂晒,係咪有啲嘢可以做呢?