之後我睇返啲ig 嘅留言-「佢最後都有同我握手」、「佢笑住咁同我講ByeBye」、「佢把聲好好聽呀」

「唔係呀嘛!」我如夢初醒咁講咗出聲。

「嗰日對住我個啲都係演技,一定係,一定係架啦,走之前握下手都係基本野嚟,你呢個八婆」我好似癲咗咁大聲埋怨。然後我望一望我個户口,我怨恨咁對自己講:「我要好好記住呢個玩女人嘅教訓,真係要計劃下點用啲錢。」,跟手我俾埋個一星評價水原。

「和也,你係等咗好耐呢!我整頭髮整耐咗少少。」水原一如上次咁,充滿住朝氣咁同我打招呼。

「我唔知和也你會唔會唔鍾意我扎呢款辮,所以有少少擔心,你覺得點呀?」水原唔知係咪見我個表情奇奇怪怪咁,所以用自己嘅髮型打開話題,其實我係喺度諗點解我又會指名佢出嚟。





「唔會…點會唔鍾意呢。」我語氣生硬咁回應。

「你鍾意就太好啦!」水原由擔心嘅表情回復返高興嘅表情,老實講水原真係超級可愛,所以真係難怪我會犯賤咁約多佢一次。

我哋又先揾咗個地方坐低咗,然後照規矩我俾咗錢水原先,水原衷誠對我講:「真係好多謝你支持!」

其實聽完水原講多謝,我係感覺有啲沉重,我低下頭向水原發問:「應該點講至好呢,你唔會覺得空虛架咩?」

「誒?」水原有啲不所以。





「明明係對住一個你一啲興趣都提唔起嘅毒男,仲要扮到好開心咁,你唔會覺得好無癮架咩?」我喺唔敢直視嘅情況下問水原。

「唔會呀,我其實好鍾意呢個工作,因為間中都會遇到好似和也你咁嘅男仔。」水原微笑住咁回應我。

我都唔明自己點解要講啲咁嘅嘢,之後我哋去咗行跳蚤市場,我哋都係同一檔睇啱嘢買,老闆正入袋就話:「你哋兩公婆一個袋袋埋就得啦可。」

「我哋唔係兩公婆。」我立刻更正老闆。

「係男女朋友!」水原突然橋住我隻手咁講。





我好快咁再更正:「唔係,我哋唔係咩男女朋友,正確啲嚟講,我哋連(朋友)都未講得上,只係(陌生人)。」我知我依家個表情係好冷漠,連老闆都慌張咁幫我哋分開袋裝。

「嗯,我就照和也你覺得舒服嘅叫法叫啦。」水原帶住勉強嘅微笑打完場。

再之後,我哋去左另一個水族館,水原不減興奮咁對我講:「係霓虹燈魚呀!快啲過嚟睇呀和也。」

「呀…嗯…」我反應仍然冷淡。

「花園鰻其實係好細膽,所以一直都匿埋係沙入面。」縱然我無咩反應,但係水原仲係好盛情咁講,話說回來,水原對啲魚好熟識咁,好似有好好研究過先嚟,為咗今日,佢應該努力過,諗到呢度,我衝口而出:「巳經…夠啦!」

「嗯?」水原回頭對我感到疑惑。

「點解要做到呢個地步?因為你認為係你嘅職業道德?其實咁做係無意義,反正只係扮演一陣我(女朋友)。」我連珠爆發咁講出我的心聲。

「等等呀和也,你做咩突然咁講?」水原緊張起嚟,不停環顧四週嘅目光。





「反正我哋結果都係(分手),咁為對方著想都係無用嘅。」我帶住不悦嘅語氣講出呢番話。

「唔好再講啦,跟我黎。」水原話都未完就一手拉咗我走,雖然好似個傻仔咁,不過我總算講咗出口,水原明明就少少鍾意我嘅感覺都無,但係就同我扮熱戀中嘅情侶。

水原拉咗我去個無人嘅地方,有少少氣喘咁講:「你呢個人…你到底想點呀!」,水原條氣順啲就轉為嬲嬲地咁講:「你白癡㗎?係大庭廣眾大吵大鬧,攪到個個都望住我哋。」

「誒…」我大感驚詫,眼前嘅水原變咗另一個人咁。

「一開始就講埋啲咩「你唔空虛」,然後又話咩「陌生人」,喂!我本身就係Part-time GF,性質就係你俾錢,我就嚟陪你」水原越嚟越心煩氣躁咁講。

「是,好對唔住!」我毫無反駁嘅餘地咁道歉,但係水原未有意思停落嚟咁再講:「仲有上次你個一星係咩意思呀?話你知,我一直以嚟都無攞過五星以外嘅評價,我為我嘅評價而自豪,我從來都係呢份工作上面偷懶過。」

出現啦,佢嘅真面目出現啦,係真正嘅水原千鶴,不得不讚佢真係好好演技,不過講返轉頭,的確係我唔啱,我俾人飛自己心情差,就用錢揾人出氣,我係有多少內疚嘅。





「點呀,你嘅指名時間未完,會唔會想繼續?如果你仲有興致,我都可以奉陪。」水原爆發完一輪之後,心平氣和咁問我,面對着好似坐過山車咁嘅高低起伏,我再一次唔知點樣回應好。

(傳來電話震動聲音)我褲袋入面嘅電話震動打破左我哋之間嘅沈默。
已有 0 人追稿