電話係由我老家打嚟,我無一刻猶豫就接聽,不竟老家來電,少之又少,聽過電話嘅內容,我唔係幾相信咁講:「你唔係講真呀嘛?」

「喂!等等先呀,我同你啲嘢都未講清楚。」即使水原語帶埋怨咁同我講,不過我依然專注喺電話對話,然後凝重咁回答電話對頭:「嗯,我知道啦。」

收線後,我大為緊張咁對水原講:「我嫲嫲…佢入咗醫院。」

「咩話!」水原被我嘅緊張傳染咗。

「我唔走唔得,好對唔住!」我匆忙對水原道歉,不過水原冇持原則咁同我講:「等等呀,你嘅指名時間仲有淨㗎!」就係咁水原就跟埋我去醫院。





「又唔洗咁大陣仗,只不過係暈一暈姐,你哋就一個二個都嚟哂。」講呢番話嘅就係我嫲嫲木之下和。

「正常人都會擔心㗎啦,你要好好照顧身體。」我媽媽木之下晴美叮囑嫲嫲。

「係呀老媽,上咗年紀就要有上咗年紀嘅自覺,仲有呀鋪頭無咗你唔得㗎。」我爸爸木之下和男同樣叮囑。

「唔好將我當同一般老人家睇齊呀。」嫲嫲孩子氣咁反駁,突然視線轉向我嘅身邊,然後話:「話說嗰邊嗰位小姐係?」

「因為佢同和也一齊嚟嘅,所以我就叫埋佢入嚟。」媽媽向嫲嫲解釋,水原明顯吃了一驚,一邊不知所措望向我一邊講:「我..我係…」





「不過睇真啲真係好靚女,係和也嘅同學?唔通係和也嘅女朋友至啱?」媽媽打斷咗水原,緊隨其後,爸爸亦插把嘴話:「咁係無可能㗎,和也媽媽,嗰個係和也呀。」

「你都好有道理,和也爸爸,佢係和也呀。」媽媽不禁表示認同。

「和也?」嫲嫲再一次將目光投放到我身上,將話題帶回正軌,我望一望水原,然之後就戰戰兢兢話:「女…女朋友,係女朋友!」

好明顯在場嘅另外四個人一瞬間都露出難以置信嘅表情,然後媽媽首先開口:「真係嘅?」

水原輕輕咁吸左啖氣,坐直個身,露出佢個招牌笑容,然後就話講:「初次見面,我叫水原千鶴,真係好抱歉,竟然係喺呢個場合同大家見面打招呼。」





雖然我止不住顫抖嘅身軀,不過卻鬆一口氣,內心不禁想大聲叫一句:「水原,做得好!」

「我要出院!」嫲嫲突然大聲叫出黎,然後又話:「依家咁似咩樣呀,應該要即刻返去攪歡迎會,要係最高級招待。」

「老媽,邊有可能呢頭入院嗰頭就話出院架,起碼做哂啲檢查,無咩大礙先出得院啦。」經過一番爭論,嫲嫲最終都乖乖留院檢查。

「真係好對唔住,講咗個大話。」我衷心向水原道歉。

「其實都無乜嘢呀,都有唔少客人提出(希望介紹俾屋企人)嘅要求。」水原以見怪不怪嘅口吻回應我。

「嫲嫲佢其實已經係第三次入院,對上一次仲要住咗好耐,似乎都唔係想像中樂觀。」我對水原傾訴,水原無作出回應,所以我繼續講落去:「我老家係開舖頭,叫《和酒店》,依家似係便利店咁,係由我爺爺開創,爺爺過身之後,就由嫲嫲一個人守住舖頭,所以對我哋屋企來講,嫲嫲就好似(大神)咁樣。」

「而(大神)有個心願,就係喺有生之年見證我搵到另一半,我好希望可以完成嫲嫲嘅心願。」我望一望水原繼續講:「喺呢段時間入面你都仲算係我(女朋友)丫。」顯然水原有啲無奈。

「我原本有一個拍咗拖一個月嘅女朋友,不過當我同佢講話想帶佢見下嫲嫲,佢就拒絕咗,最後仲要飛埋我。」水原繼續默默地聽我訴苦。





「俾人飛咗之後,我變得自暴自棄,於是就租咗你,我真係好廢呀可,自己好似隻(兔仔)咁尋安慰。」我對水原自嘲。

「根本就唔會有唔寂寞嘅人,只係識隱藏嘅人太多,大家都會用工作呀,拍拖呀去填補寂寞。」水原似乎係想安慰我,之後水原回歸現實咁講:「但係跟住落嚟你有咩打算,諗住每次見嫲嫲都租我?」

「唔會啦,根本就無咁多錢。」我苦笑住咁講,然後再認真咁對水原講:「再加上,租你其間,我成日都會諗起我ex,諗起曾經有幾鍾意佢,雖然唔可能即刻忘記佢,不過我都要向前望,總有一日我會靠自己帶真正嘅女朋友見嫲嫲。」

「因為只有真正嘅自己先係唔需要租返嚟。」我講完都覺得自己有少少型,電光火石之間,水原兜巴車坐落嚟就話:「可唔可以唔好講埋啲咁嘔心嘅台詞。」

「你夠係日日係度扮唔同人嘅(女朋友),講埋哂啲核突台詞。」我撳住塊痛痛地嘅面反駁水原,水原無繼續同我爭論,反而話:「你為家人着想嘅心情我係理解嘅,如果你覺得自己似隻(兔仔)嘅時候,再嚟搵我啦。」

不過,唔會再有下次,我已經唔會再同水原千鶴見面,因為我已經立定決心唔在依靠佢。
已有 0 人追稿