我摸住塊好痛嘅臉,我好唔甘心,我決定要反擊。

「傻㗎你,無啦啦發火一拳打落嚟。」話口未完,我已經回敬木部一拳。

(之後和也同木部你一拳我一腳,大家亦都嘗試調停,最終木部都推咗和也落地然後騎係和也身上㩒住和也)

「我真係睇錯咗你呀,和也。」木部佢嘅眼神好認真。

「和也你係幾時變成一個自私自利嘅人渣㗎?」我都唔係好明白木部想講咩?





「你係今次旅行就一直俾麻美迷到神魂顛倒,我有無講錯呀?咩過咗熱戀期,根本就係水原同學唔能夠再忍受你同前女友唔清唔楚,俾著係我都接受唔到,你依家就好同水原分手,你呢種人渣根本就唔配。」木部原來都一直有留意住我,水原同麻美嘅事。

(水原喺一邊根本無插嘴嘅餘地,因為木部所言甚是,和也對麻美嘅盛情,對水原嘅冷落實在係明顯不過)

「連眼前嘅女仔都無辦法認真珍惜嘅人,根本就無辦法守護任何野。」我真係木部講得咁差?我想變成咁㗎?我真係好想澄清。

(和也趁木部稍微放鬆一下,就堆倒木部,然後就滿腔熱淚咁向木部發洩)

「你根本就咩都唔知,我當初有幾鍾意麻美,我被麻美飛嘅時候有幾痛苦,你又知幾多呀?」我大大聲向木部吐苦水。





(一旁嘅前輩再次上前阻止和也同木部,並提醒和也水原仲喺現場,唔好再亂講嘢)

(不過木部聽完和也訴苦,似乎未想收口,反而將矛頭指向麻美)

「麻美同學,其實你都有唔啱,和也係個蠢材嚟,成日好易會錯意,所以麻美同學你可唔可以唔好再對一個俾你飛嘅人賣弄風情?」木部眼神凌厲咁對麻美講。

「我…我根本就無咁嘅意思。」麻美揼低頭思考咗兩秒,然後就皺住眉回應木部。

「木部你快啲同麻美道歉。」我忍唔到麻美佢咁受委屈。





「喂,和也,你冷靜啲啦!」前輩佢㩒住我,然後擰轉頭同水原講:「水原同學,和也佢依家有啲頭昏腦脹先到亂咁噏,不如你就返老家先啦。」

(水原接納前輩嘅意見,先行離開,水原走咗之後,雖然和也同木部仲係好唔份氣,不過總算收斂落嚟)

「我去廁所呀。」真係激氣,我同水原嘅事值得木部咁勞氣咩?

(和也去廁所途中,水原一直喺附近等住和也)

「你會唔會努力過頭呀!」水原叉起雙手對我講。

「嗯?」努力?邊一方面?

「我指你還手呀,無事呀嘛?我都明嘅,佢哋咩都唔知,唔理解你都係在所難免。」原來水原係講打交件事。

「無咩嘢姐,我一陣就會向你事務所預約下次(假約會)。」我覺得我要好好調整自己,要同水原清清楚楚,等我哋可以好好咁(分手)。





「俾你見到我咁失禮嘅樣,真係好對唔住,一直以嚟我都俾咗你太多麻煩。」我想喺(分手)之前好好向水原道歉。

「我覺得(分手嘅宣告),都係邁向未來嘅一步,喺我眼中,呢一步包含咗無限嘅勇氣,咁樣的話,你多少都有啲男子氣概。」水原用殷切嘅眼神望住我講,我完全感受到水原無比嘅温柔,攪到我都有啲眼濕濕。

「多謝你呀水原,係咁的話,再見啦。」果然水原係專業嘅,安慰完我可以亳無留戀,轉身就走。

「果然我係好厭惡呀可?做我呢種人渣嘅(女朋友)」到最後我都係忍唔住問水原對我嘅睇法。

(水原一下拍落和也嘅膊頭度)

「俾啲自信自己啦,雖然做你(女朋友)係我工作,不過我都做得好開心,真係好開心。」水原真係好犀利,我真係攪唔清所謂嘅好開心係水原定係一之瀨。

(今次輪到和也亳無留戀咁轉身就走,水原默默咁望住和也嘅身影慢慢遠去)





「笨蛋!」水原對住和也嘅背影講咗出聲。

(和也走咗無耐,木部就出現喺水原面前)

「水原同學,我可唔可以稍微阻你少少時間?」木部一本認真咁請求水原留步。

《十九話 手足的情誼》

「木部佢出手真係重,依家都仲痛緊。」我都行開咗一段時間,而水原都應該走咗,我都係時候返去。

(返到去,和也見到木部好似有話要同水原講咁,下意識咁和也就躲咗入草叢,偷聽下佢哋講咩)

「真係唔好意思,叫住你,不過應該點樣講起至好呢!」木部好似有話難以啟齒咁。

(木部邀請水原坐落嚟傾)





唔知點講起好?唔通木部要同水原表白?應該唔會啦,事關木部自己都配唔起水原啦。

「水原同學你同和也真係要分手?」木部唔情願咁問水原,而水原就直接回應:「嗯,係呀。」

「我呀,自小就認識和也,和也一直以嚟不受歡迎嘅經歷我都見證過,所以呢,當和也介紹水原你呢個咁可愛嘅女朋友俾我識嘅時候,我真係好懷疑自己訓醒未。」木部感慨咁講。

(水原聽到讚美自己嘅部份就不停耍手零頭)

「和也佢真係好人渣呀可!唔止蠢,仲優柔寡斷,淨係識俾麻煩人,仲要講埋哂啲咩船到橋頭自然直。」木部繼續講。

(水原對於木部講出和也嘅缺點似乎相當認同)

「但係,有陣時我會諗,和也佢好似似蠢材咁見步行步,永不放棄咁去做一件事其實都係一種才能,唔係咩?」木部望一望水原。





(水原表示好奇點解木部會咁覺得)

「喺我哋讀小學嗰陣,同樣係夏天,我哋全班都要種牽牛花,但係我一個唔小心就踢跌咗和也嗰盆,啲泥周地都係,連種子都唔知跌咗去邊,不過和也都盡力將啲泥執返入盆。」

「然後,和也嘅花盆係最先生出嫩芽,不過老師同和也解釋但種芽根本就唔係牽牛花,但係和也就認定係牽牛花,完全唔聽人講,仲話係咩超級牽牛花。」

「就算老師叫和也放棄,和也都永遠係第一個返到學校澆水嘅,仲有成長日記,和也一日都無畫少過,好蠢呀可?明明所有人都知無可能開花,再努力都係無可能。」

(水原都點點頭表示當時嘅和也好傻,同埋依家都仲係咁上下)

「我當時覺得係我累到和也白花心機,所以打算暑假完咗之後好好向和也道歉,但係,到最後水原同學你估下發生咩事?」木部向水原賣關子。

「請問係咩呢?」水原反問。

「花…綻放,仲要係俾任何同學都要大要靚嘅花,我記得老師話係一種叫朱槿嘅大紅花,係夏威夷女郎成日放耳邊嘅嗰種花,不過和也就好傷心,話唔係牽牛花喎。」

「而我呢,就超級羨慕和也嗰朵花,如果和花嗰時停止澆水的話,咁嗰一朵花就永遠都無可能綻放。」木部都展現出當時羡慕嘅表情。

「現實呢,就係充滿咗好多打擊人心嘅嘢,例如讀唔成書,無份好工,識唔到女仔,買唔到樓,好多好多!但係呢,當人俾呢啲現實浸死,連夢都發唔到嘅時候…就係所謂同條咸魚無分別嘅時候。」

「喺上次聯誼會,水原同學你袒護和也嘅時候,我就覺得同我一樣注意到和也優點嘅人終於都出現,我唔知你哋之間發生過咩事,不過水原同學你可唔可以俾多次機會和也?」木部企起身拍一拍身上嘅沙。

「和也佢其實唔係咩人渣,到最後,和也佢一定可以俾到幸福水原同學你。」木部檸轉頭自信滿滿咁對水原講。

(水原聽到有少少眼濕濕咁,而木部就係褲袋攞兩張觀光船票遞俾水原)

「我啱啱係便利店買嘅,我覺水原同學你同和也需要一個只係屬於你哋兩個嘅時間。」

「咁貴重嘅嘢我係唔可以收㗎。」水原耍手婉拒。

「就收咗佢啦,當係我幫和也做返啲小事,明明最好嘅朋友識到最好嘅女朋友,但係我就連一份賀禮都無送過。」

(躲喺草叢嘅和也一字不漏咁聽到木部嘅說話,內疚得抱頭痛哭)

(汪汪)

(一隻散步中嘅狗發現草叢中嘅和也,然後吠到和也成個彈起)

(木部同水原立即就發現和也喺度偷聽,和也拔足而逃)

「對唔住…頭先還手打你,真係好對唔住。」跑跑下我停咗落嚟,我覺得我應該要向木部道歉,不過我無面目面對木部,所以我雙手遮住塊臉講。

「真係囉嗦,蠢材,係咁之後落嚟就交比你地,我走先啦。」木部講完瀟灑離開。

「呢一張觀光船票係你嘅。」水原將船票遞俾我。

我接過船票之後就望一望水原。

「一齊去啦,木部嘅心意我真係唔忍心拒絕,只係得我哋兩個上船就唔洗顧慮其他人。」水原見我望住佢,然後就迴避我嘅目光咁回應。

「真係可以咩?咁你朋友嗰邊點?」我覺得水原唔應該再為我操心。

「事到如今,唯有事後同朋友道個歉,話突然唔舒服所以通知唔到,返咗去先。」真係難委水原佢要犧牲佢嘅朋友。

「咁樣的話,我真係好對唔住。」我除咗道歉之外已經無嘢可以做到。

「但係咁樣上完船,我哋就真係會結束!」水原依然未望過我一眼咁講。

「嗯?」水原咁講係咩意思?

「木部同學唔知我哋嘅真相,如果我哋上完船再話佢知我哋已經好好再商量過然後分手,咁木部同學就應該會容易接受得多。」果然水原考慮得好周詳。

(如是這,和也同水原就各自換返便服相約乘搭5點30分嘅觀光船)
已有 0 人追稿