出租女友: 《廿一話 生死的一瞬》

（水原被和也拖上一個小石島上面）

「咳咳…咳咳」

（水原開始恢復意識）

「呢度係？係啦，我記得我失一失平衡就係船跌咗落水。」水原四圍望就發現到昏迷嘅和也。

（水原見到和也就依稀記得和也潛入水嘅畫面）





「係…係和也救咗我？喂，和也，你醒下啦。」水原拍一拍和也。

（和也依然無反應）

「我真係太差啦，我自己無好好管理身體狀況，仲要令客人陷入危險之中，喂和也！醒一醒呀。」水原越來越大力同著緊拍同搖和也。

（和也一動也不動）

「有無人？有無人可以…」水原開始慌亂，環顧四週。





「我記得係喺胸口中心連續㩒三十次。」水原雞手鴨腳咁幫和也做心外壓。

「你咁樣係咩意思呀？明明我都唔係你真正嘅女朋友，點解你要咁做？你真係個死蠢嚟㗎咩？我已經講咗我只係Part-time GF。」水原一邊壓一邊鬧和也。

（係岸上救護車嚟咗，有途人問候命嘅救護員發生咩事嘅對話俾木部聽到）

「好似話有一個後生女跌咗落水，有個著橙衫嘅男仔就跳咗落水救佢，依家海猿仲揾緊佢哋。」救護員向途人闡述。

（木部聽到相當驚訝同擔心，立即去聯絡和也，當發現聯絡唔到嘅時候，木部就知和也同水原出咗事）





（麻美不斷喺電話呼叫和也，不過都無回應，麻美話過無論點都會等和也，所以就一直呆喺泳池）

「麻美，你點解會係呢度㗎？揾咗你好耐，打俾你又唔聽，和也同學佢為咗救水原同學跳咗落海。」大學前輩一揾到麻美就急忙交代。

（水原不停壓和也胸口，不過和也完全無任何起色）

死火啦，我意識好似好迷糊咁，我係咪死咗啦？我明明好似做得到咁，果然我唔似電影嘅英雄咁，對唔住呀嫲嫲，我始終都帶唔到另一半嚟見你，對唔住水原，我自己嘅事無一件係處理得好。

（其實和也嘅意識漸漸咁恢復）

（水原見心外壓無咩效就決定要做埋人工呼吸，水原一對和也呼氣時，和也就睜大對眼
，水原見和也清醒就彈開俾和也坐起身）

（和也坐起身咳咗兩咗就同水原四目交投，水原一副想喊嘅樣）





「水原，頭先你…」我望住水原呢個樣，再諗起頭先水原靠近我埋臉，想搞清楚少少野。

「對唔住，要你冒險嚟救我，真係好對唔住。」我都未問完，水原就擰歪面，扮到若無其事咁向我道歉。

（海猿就係水原道歉完之後出現）

「揾到啦！佢哋兩個都喺度，睇落意識正常。」其中一個海猿同隊友交代。

就喺咁我同水原就安全返到岸上面，而我就徹徹底底咁甩咗麻美底，因為我同水原上救護車到附近嘅醫院做簡單嘅身體檢查。

上救護車之前，所有朋友都到咗現場關心我同水原，雖然咁多人在場好難開口，不過我點都要同水原交代一聲。

「水原！真係好多謝你呀，居然為咗幫我，不惜做到呢個地步。」我大大同感激水原。

「咁係理所當然，因為我係和也你嘅女朋友嚟。」水原回頭親切咁對我講。





我呆一呆，完全無諗過水原會咁回應，女友模式，一定係！

「點呀！係咪唔再鬧分手啦？」木站向我批踭，陰陰嘴笑咁問我。

我無理到木部，我只係諗水原身為一個知書識度嘅專業Part-time GF，人工呼吸其實無咩大不了。

（上咗救護車嘅水原接受心跳監測，心跳得非常快）

「你係咪好緊張呢，深呼吸，放鬆啲。」救護員著水原放鬆心情。

（其實水原無咩大礙，只不過諗返起和也不顧一切潛入水嘅畫面，變得面紅心跳。）