出租女友: 《廿四話 坦白的流露》
（和也望住著浴衣嘅水原望到呆晒，不過水原整一整正件浴衣就拔足衝出房）
「等等呀！水原，你去邊呀？」我唔會驚嚇到水原要即刻走人排？雖然真係幾驚嚇。
「唔通你無發現咩？我哋中咗計啦， 係嫲嫲同盟想孫仔孫女黐埋一齊陷阱呀。」水原邊跑邊解釋。
啊！原來係咁。
（水原好快就跑到𨋢口等𨋢，和也緊隨其後）
「雖然我唔反對嫲嫲佢哋關係親密，不過佢哋今次對啲孫嘅干涉實在係大過份，我要去說服佢哋。」水原發好大牢騷。
我都明嘅，無啦啦又要對住我，我都會幫手說服嫲嫲。
(𨋢到，水原就一支箭標入去，和也當然尾隨）
「等陣，你去行樓梯。」水原充滿怨念咁命令我。
早又唔叫我行，𨋢到先叫我行樓梯，睇嚟水原真係好唔想存在係同一個空間。
（好快和也同水原就到咗嫲嫲們面前）
「嫲嫲，我以為係得我哋兩個嚟我先會喺房等你。」水原一句。
「嫲嫲你好好諗下，得一間房好似有啲過分。」我又一句。
「好對唔住呀，千鶴公主，瞞住你。」我嫲嫲一句。
「我覺得幾好呀，千鶴你同和也又可以增進感情。」一之瀨嫲嫲又一句。
「總之呢，晚餐之類巳經同旅館交代好哂，如果突然要改就好對唔住旅館嘅人㗎啦。」我嫲
嫲再一句。
「無所謂，千鶴，你同和也係情侶嚟㗎嘛，唔洗係長輩面前扮見外。」一之瀨嫲嫲又再一句。
「就算係情侶，孤男寡女共處一室始終唔係給好，更何況，我同和也都未有經驗。」水原佢講啲咩呀？
咩經驗呀？係咪得我一個聽唔明炸？
「咩話，原來你哋仲未有經驗，咁就趁呢個機會經驗下囉。」我嫲嫲笑笑嘴咁講，咩叫趁呢個機會？
「好青春呀！你哋年青人返啲返房啦。」連一之瀨嫲嫲都揞住半邊笑笑嘴講，今次真係講唔過佢哋。
（和也水原死心咁返客房，水原一返房就好苦惱咁坐低）
「佢哋真係呀！今次點算好呀？」水原皺哂眉頭咁講。
「不如依家就去講（分手）嘅事？」除咗咁，我諗唔到仲有咩方法。
「咁樣啲話，呢個温泉之旅就會不歡而散。」水原都講得好啱。
「不如我靜雞雞去開多一間房，不過我無咁多錢，哈哈。」我都係提多個可能性俾水原考慮下。
「唔好嘥錢，更何況我今個月都有啲手緊，都無多餘錢可以借俾你。」水原平時收我咁多錢，竟然都會手緊？
「算數啦，好好享受啦。」水原口講享受，不過水原個樣依然好苦惱。
「咩享受話？」我想確認多次我有無聽錯。
「我嫲嫲已經俾哂錢，再加上一個禮拜同嫲嫲同我講去浸溫泉，我就已經好期待，所以我依家就去大浴場。」水原真係好犀利，適應力好強。
「雖然我都明呢個情況下係好難開口，不過紙係包唔住火，就由我去同嫲嫲同盟講（分手）嘅事啦。」水原臨行前回頭同我講。
本來就係我種落嚟嘅謊言，一次又一次咁為水原帶嚟麻煩同苦惱，甚至係危險，不過到頭來，都係要水原幫我解決。
（水原準備好入大浴場浸溫泉，一入去就遇見木之下女士）
（木之下女事見到水原雙眼發光，不停打量水原嘅身材同示意水原坐到自己身邊）
「千鶴公主一睇就知你好生養，你簡直就係照亮住木之下家嘅光，畢竟和也嘅基因係唔合格，一定要千鶴公主你拉上補下先得。」木之下女士感恩咁講。
（而水原就不停耍手否認）
「其實今日係我伯爺公嘅死忌，以往嘅今日，我都會覺得有啲寂寞，不過今年我可以識到新朋友，又及時出到院，仲要有千鶴公主陪我浸温泉，多得千鶴公主你，今日變咗愉快嘅一日。」木之下女士感觸咁講。
（水原帶點哀傷咁望一眼木之下女士，然後再垂低頭）
「如果我對和也嫲嫲你講咗大話，你會點做？如果我並唔係和也嫲嫲想像中嘅嗰種人的話…」水原內疚咁講。
「呢個世界無人係唔講大話，就算千鶴公主你話你要外星人，我都一樣會咁鍾意你。」木之下女士眼神堅定咁望一眼水原，然後就對水原開一開玩笑。
（水原聽完木之下女士咁講，內心變得更糾結）
（浸完温泉之後，水原同木之下女士就各自回房享用晚餐）
（面對住精美豐富嘅料理，和也同水原保持住敵不動我不動）
「乾杯啦！」水原首先舉杯向我乾杯。
然後我都攞起杯回敬，乾咗之後，水原就好滿足咁享用美食，都係嘅，水原佢話過佢一直都好期待今次温泉之旅。
（水原不停食之際，和也就先飲湯）
話時話，呢個係咩湯嚟，好似深色咗少少，味又濃咗少少。
「喂，你呀，你飲緊果碗唔係調味料嚟㗎咩？」水原一臉嫌棄咁問我。
「吓？我已經飲咗唔少。」我一臉無奈，唔怪之得怪怪地。
「啊哈哈…哈哈哈…你真係白癡！」水原佢開懷大笑。
我見水原笑得咁開心，我都放鬆落嚟，其實水原佢都會好似咁樣露出普通嘅笑容，我果然係一個(擋路人）。
（晚餐過後，和也就主動提出訓教嘅安排）
「我去廁所或者去玄關訓就得㗎啦，咁你就可以發個好夢。」我已經執緊被鋪準備出去。
「其實…其實你都可以唔洗出去，就喺呢度訓。」水原叫停我。
誒？我好驚訝，明明一開始就好反對孤男寡女，依家又准我留低？
（水原無理會和也，轉身準備除低隱形眼鏡就訓）
真係大鑊，我個心跳得快到好似就快係個嘴度跳出嚟咁。
話時話，原來水原真係有近視，平時係帶隱形眼鏡嘅，果然我無估錯。
咪住，唔係有句說話係話，女人嘅素顏係俾自己認同嘅男人睇㗎咩？
（和也妄想到臉紅紅，而和也呢個猥瑣樣俾水原由鏡嘅反射睇到，然後水一個飛身就踢向和也）
「做咩無端端踢我？」我痛到雙膝跪地，雙手抱肚。
「你諗下你頭先嗰個係咩樣，成個猥瑣佬咁。」水原氣沖沖咁講。
「邊個會對你呢種女人…痛痛痛！」我忍唔住指住水原反駁，不過仲係好痛。
「你唔好會錯意呀，我之所以話你可以喺房訓，係因為我唔想難為顧客，如果你掂我一下，我一定會報警拉你，仲有我有學過下防身術，我三兩下手勢就可以搞掂你。」水原眼神兇狠咁講，仲露咗兩手，睇嚟水原真係食過下夜粥。
「早抖。」水原耍咗幾招就訓低，冚被背住我訓。
誒？咁落妝呢？
（和也選擇貼牆訓，同水原離九丈遠）
唉！完全訓唔著，本來最近就對水原有點野咁，依家仲要訓埋同一間房，我真係好想知水原係點睇我。
「吶，水原，為解次次你都會咁不惜一切去幫我？明明我只係個顧客。」我忍唔住開口問水原。
唔？無反應？應該係訓咗。
（和也見水原無反應，自己又訓唔到，所以就坐起身望住水原嘅背影）
頭先仲講咩防身術，就咁望落，水原其實都算嬌滴滴，不過佢已經算係努力工作緊，比起我，水原佢要成熟一百倍。
水原佢無比堅強，温柔，仲有正確，我真係好想，好想更加去暸解水原。
「（分手）真係唔講唔得咩？我知道我係一個人渣，又麻煩，對水原你嚟講我係個百害而無一利嘅人。」
「但係好奇怪，我同水原你一齊咁呢段時間，我好似成長咗，尤其係喺觀光船嘅時候，我硬係覺得自己好唔似自己。」
「我知我係一直欺騙緊我哋嫲嫲，我亦都對水原你被我捲入呢個謊言之中感到好對唔住，我自聽日都做好咗提（分手）嘅覺醒。」
「但係呀，如果水原你同意的話，我仲係想租，我想給繼續租你做我女朋友。」
我真係白癡，我喺度出力講啲咩呀？明明水原訓咗聽唔到，都係訓覺啦。
（突然水原就檸轉身望住和也，和也呆住同水原四目交投）
「可以呀，我就俾你租多一段時間啦。」水原講完就再次入睡。