《求婚嗰日，我發現我女朋友鍾意食屎》: 一
是咁的，今日係我同女朋友嘅七週年紀念日，我打算同我女朋友求婚。
為咗隆重其事，我首先Book咗一間五星級大酒店嘅海景套房。
順帶一提，我本身就係呢間酒店西餐廳嘅副主廚，Book房有六折同自動upgrade，所以連嗰啲「乜goda」、「乜乜combine」都唔洗用。
正所謂「求婚唔驚喜，下半世等死」，為咗俾個surprise我女朋友，我專登同我女朋友講，酒店臨時叫我翻多半日工，所以叫佢遲少少到酒店meet up我。
而其實我一嚟係想爭取時間係酒店房搞好啲佈置，擺好哂上網買嗰啲「$100求婚實惠套裝」嘅心型波波燈同港女打卡氣球道具。
二嚟亦都係刻意想有少少掃佢興，咁先可以等佢嚟到嘅時候有更大嘅心情起伏同驚喜㗎嘛。
於是我一上到房，我成功以IG 「#求婚」嘅hashtag搵到唔同求婚酒店房作為參考，開始咗我嘅佈置大計。
要一個男人佈置房間，呢件事簡直係多災多難。
除咗我本身已經無乜art sense之外，例如個「Marry Me」汽球，個廠商竟然整咗做「Merry Me」，我心諗到底係咪間廠聖誕節賣剩咗所以塞埋入嚟扮嘢。
但係，好彩呢個季節大把人去staycation慶祝，又好彩多得我班酒店同事幫手喺其他房間用個「e」字換到個同色嘅「a」字汽球，我先砌得成個「Marry Me」。
不過，聽我同事講，個「a」字係嚟自一間房入面嘅一句「I Love You Elsa」入面「Elsa」個「a」，我唯有祝嗰間房嘅男朋友平平安安。
用咗大半個鐘，我總算佈置好間房。
萬事俱備之後，就係時候等女主角到場。
我一邊通知女朋友可以直接過嚟酒店房，一邊極速去沖涼執翻個樣同換翻一套老西。
換衫、剃鬚、Gel頭、剪埋嗰條衝咗出嚟揮手嘅鼻毛之後，我照一照鏡，補上一個自信嘅笑容。
嗯，fit到無得輸。
今日一定得嘅陳超博。
說時遲那時快，酒店房門嘅門鐘已經響起咗。
女主角要登場啦。
我深呼吸一口氣，開著咗手機入面嗰個「Sweet and romantic moments」playlist，拍一拍自己塊面等自己醒定少少，然後就走去開門。
門一打開，門外係個樣有啲擔心嘅丘思敏，亦都即係我女朋友。
「你做哂嘢喇？酒店無咩事吖嘛？點解……」
當佢如常咁發揮超越正常人類水平嘅愛心去關心我嘅時候，佢留意到房入面嘅裝飾。
特別係，貼咗喺落地大玻璃上面嘅「Marry Me」。
佢個樣，呆到成個馬國明咁，但係眼角就已經開始滲緊眼淚出嚟。
我見佢咁感動，內心當然好開心啦，所以即住拉住佢入咗房，然後帶佢行到嚟窗門前面。
「敏敏，今日你應該都知我想做咩啦。」我溫柔咁捉住佢對手，望實佢嗰對俾眼淚浸到水汪汪嘅雙眼。
「嗯……」敏敏係咁點頭，完全感動到出唔到聲。
睇住佢嘅表情，我知道，係機會喇飛雲！
我即刻單膝跪地，從側邊嘅櫃檯入面拎出咗一個朱古力盒。
無錯，唔係戒指盒，係一個朱、古、力、盒！
唔好話我求婚出手咁低，其實呢盒朱古力係另有玄機㗎。
我喺敏敏面前打開咗盒朱古力，十二粒唔同味、唔同造型嘅朱古力盡現眼前。
不出乎我意料之外，敏敏個樣馬上由原先嘅感動，變成皺哂眉頭。
趁佢未出聲，我即刻搶住講：「呢個盒入面嘅十二粒朱古力，每一粒都係由酒店餐廳入面一位甜品師傅教我親手整嘅。而喺呢十二粒朱古力入面，其中一粒朱古力就收埋我隻求婚戒指。」
好，嚟到呢度，通常笑片睇得多，呢啲屎橋最後都會導致女主角食咗隻求婚戒指落肚。
所以我今次一開始就講明朱古力入面有戒指，亦都即係話只要我女朋友肯每粒朱古力試一半，佢就可以搵出隻戒指。
或者你會覺得我多此一舉，但其實我咁做都係有原因㗎。
「你知我從來都唔食朱古力㗎……」敏敏呢個時候面有難色咁擰開咗個頭，似乎係連盒朱古力都唔想望到。
其實打從敏敏一開始同我拍拖，佢已經講過佢只要一食朱古力佢就會連續打乞嚏五分鐘，所以為免失禮人，佢從來都叫我唔好送朱古力做禮物，而同我拍七年以嚟，佢真係一粒朱古力、甚至一盒朱古力奶都無掂過。
充滿實驗精神嘅我曾經有幾次試過講笑咁叫佢食粒朱古力嚟睇下，佢一係就轉開話題，一係就粒聲唔出走咗，搞到我都唔敢再迫佢試食朱古力。
「我今日之所以要用朱古力做求婚工具，係因為我覺得既然要結婚，大家都係真愛。真愛，係應該可以接受對方一切嘅，包括朱古力會連續打乞嚏五分鐘。所以，我想借今次機會，俾你可以放心喺我面前展露所有自己介意或者擔心嘅地方，然後等我用行動證明俾你睇，我可以包容到你嘅一切。」
我非常誠懇，半跪喺地下咁講，希望用誠意去說服敏敏，令佢可以放膽喺我面前食第一粒朱古力。
敏敏用眼角睄咗我一眼，然後望一望盒朱古力，又即刻縮走翻佢嘅目光。
似乎，朱古力對佢嚟講真係好大嘅心魔。
只不過，「真愛是任何形狀，對付百孔千瘡。」
「好啦，我都知你唔鍾意朱古力，不如咁吖，我話你知邊粒有戒指，你淨係食嗰粒嘅一半吖！啲朱古力我好俾心機整㗎。」
我眨住眼，用期待嘅眼神捧住盒朱古力，望到敏敏實一實。
「真係……食半粒就得？」敏敏好遲疑咁問咗一句。
我就知道，以敏敏咁好人嘅性格，一定會頂唔住我嘅軟性攻勢。
「係啊！」我超快咁點頭。
「嗱，見你咁有誠意，半粒㗎咋！以後我都唔會再食㗎啦！」敏敏扠住腰講。
一聽敏敏咁講，我即刻從個盒入面拎起咗嗰粒有戒指嘅朱古力，然後慢慢放喺敏敏攤開嘅手上面。
敏敏拎住粒朱古力，個樣簡直辛苦到好似有隻曱甴喺手上面爬一樣。
見到佢驚成咁，我內心有少少內疚，但係又唔明點解一粒只不過係會令佢打乞嚏嘅朱古力可以令佢驚成咁。
敏敏喺呢個時候深呼吸咗一口氣，慢慢將隻手移向自己。
近啲，再近啲，粒朱古力終於慢慢接近到敏敏個口。
呢一刻，我簡直好似睇住太空船接近火星表面一樣咁緊張。
就喺呢粒朱古力即將要歷史性登陸敏敏嘅口腔嘅前一刻，突然，敏敏發出咗「嗯」嘅一聲，然後佢面色一變，一手將粒朱古力拋俾我，另一隻手就㩒住咗個口，然後一個箭步就衝咗入廁所。
現場，就剩低睇到莫名奇妙嘅我。
見到事態似乎比我想像中嚴重，我意識到自己今次似乎玩大咗。
於是，我決定好好哋收好粒朱古力，一陣等敏敏出嚟就同佢道歉，然後代佢食粒朱古力同攞隻戒指出嚟求婚。
無諗過，呢一等就等咗十分鐘。
等下等下，我發現有啲唔對路。
按照敏敏頭先嘅反應，佢應該係想衝入廁所嘔嘅。
但係，廁所入面而家非常安靜，完全唔係有人嘔緊。
諗到呢度，我個心馬上有啲不祥預感。
莫非，敏敏暈咗喺廁所？
唉，陳超博啊阿超博，你今次真係搏大咗。
我好緊張咁衝去廁所門前，貼隻耳仔上去再聽一次。
真係粒聲都無。
「敏敏，你ok嘛？」我嘗試敲門問咗一句。
「嗯……」廁所入面有反應，不過聲音非常之咁微弱。
呢次，似乎真係要上演一幕英雄救美喇。
我後退幾步，準備好破門而入。
但係諗多一諗，咪住，酒店啲門其實都幾貴下。
於是，我收翻隻腳，打算睇下有咩方法可以開到呢道趟門。
點知，我只係輕輕一拉，趟門就已經俾我打開咗。
原來，趟門根本就無鎖。
當呢道門打開咗之後，我望到一個匪夷所思嘅畫面。
首先，敏敏面向座廁咁跪咗喺地下。
然後，我望到佢隻左手放喺嘴邊，而手上面同嘴邊都充滿咗泥黃色嘅物體。
而佢隻右手，直情伸咗入座廁入面。
當我未明白到底自己睇到啲乜嘢嘅時候，廁所入面嘅氣味話咗答案俾我知。
因為，呢一刻，成個廁所都係一陣強烈嘅屎味！
我嘅大腦好努力咁將眼前呢一個畫面邏輯化咁話我知到底而家我睇到啲乜嘢。
但係，我覺得已經唔需要喇。
因為，事實擺在眼前，而呢個事實，絕對超出咗我大腦可以思考嘅空間。
事實只得一個。
我女朋友，佢食緊屎。