呢刻嘅酒店房,除咗默默繼續循環播緊嘅「Sweet and romantic moments」playlist之外,粒聲都無。
我同敏敏兩個各自坐喺床上面,大家都無出聲。
呢個狀態,維持咗兩個鐘頭。
 
兩個鐘前,我打開廁所門見到敏敏喺度食屎。
「啊!!!!!!」佢發出咗近乎俾人謀殺緊嘅尖叫聲。
「啊!!!!!!」我用叫聲去代表咗大腦裡面難以用文字去表達嘅震驚。
 
我哋兩個就好似唱山歌咁對嗌咗幾聲之後,敏敏終於叫出咗一句完整嘅句子:「閂!門!啊!」
一聽到佢嘅指示,我即刻就「嘭」一聲將趟門拉埋咗。


當門拉上咗之後,我發現自己不斷喘氣。
我個心好亂,無限嘅問題不斷湧入我個心度。
 
我到底睇到啲乜嘢。
點解我女朋友會喺度食屎?
到底佢係從幾時開始食屎?
到底屎係咩味?(OK,我知呢個唔應該喺呢刻諗嘅問題。)
 
無論如何,我當務之急,應該首先諗咗一陣當敏敏出嚟廁所嘅時候點樣面對佢。
敏敏係一個個樣有七八成似「試當真」嘅Yanny,性格低調樂觀而斯文有禮嘅女仔。


同佢拍拖咁耐,佢從來都無咩事需要我擔心,而且亦都好識得照顧人,可以稱得上係一個一百分女朋友。
喺我哋之間,從來都無經歷過咩大吵大鬧或者要生要死嘅分手,可以話,我哋一路走來都係平淡而幸福嘅。
所以今次我目睹佢食屎,絕對算係我哋感情之中有史以來最大嘅挑戰。
我相信,佢食屎一定有佢嘅原因,正如我所講「真愛,係可以包容一切」,我要點樣先可以令佢放心話我知佢發生咩事,而唔係驚或者尷尬到即刻走咗去呢?
 
同佢講:「其實我都好鍾意食屎㗎!」
唔得,一陣佢邀請我一齊食咁點算。
扮哂無所謂咁講:「食屎啫,有咩所謂?我細個都食鼻屎啦!」
唔得,頭先我個震驚樣已經出賣哂我。
 


就喺我仲諗緊對白嘅時候,我聽到廁所門嘅聲音。
大獲,敏敏要出嚟喇!
到底我應該講咩好?
 
廁所趟門打開。
敏敏掩面望咗我一眼,搖住頭咁講:「你而家咩都唔好講,俾我靜一靜先。」
然後,佢就走咗上床坐喺度。
 
唔洗講嘢,都係一件好事嚟嘅。
於是我就跟住佢走埋上床,諗住等佢靜一靜之後再同我分享發生咩事。
點知一等,就係兩個鐘頭。
 
坐咗兩個鐘嘅我,開始坐到有啲腰酸背痛。
正當我準備起身伸展下筋骨嘅時候,敏敏終於出聲。
「五歲,我喺五歲嗰年,第一次食屎。」


透過呢一句開場白,敏敏開始講佢食屎嘅故事。
 
「我好記得,嗰日係幼稚園嘅生日會,一次過為哂所有三至四月生日嘅小朋友慶祝生日。而嗰一日,我啱啱好係正日生日,所以老師仲特別安排咗我企正中間影相。
 
當大家戴好生日帽,一齊唱生日歌嘅時候,一切都仲係好開心。但係當生日蛋糕出現嘅時候,意外就發生咗。
已有 0 人追稿