《求婚嗰日，我發現我女朋友鍾意食屎》: 三

因為三至四月生日嘅小朋友有好多，所以當日老師預備嘅係一個超大嘅朱古力黑森林蛋糕。當時企喺中間，望到個蛋糕實一實嘅我，理所當然咁俾老師分到第一件蛋糕。望住蛋糕上面勁濃郁嘅朱古力，作為小朋友嘅我又邊可能會唔鍾意呢？所以當老師未話可以食嘅時候，我就已經拎住份蛋糕係咁聞。
 
一路聞蛋糕，我覺得自己心跳有啲加速，身體入面有一種反應出現，好似驅使緊我去搵一啲嘢，但係我又唔知自己到底需要搵咩。就喺我出現緊呢一種奇怪嘅反應嘅時候，老師就話可以開始食蛋糕，所以我就大大啖咬咗落去個蛋糕度。
 
點知，當我咬咗第一啖蛋糕之後，我腦海變得異常清醒。我出現咗一種原始嘅慾望，我好想食屎。呢種慾望，就好似人喺沙漠見到水就會撲過去，或者缺氧嘅時候會就不惜一切衝去吸哂有剩嘅空氣咁，我會形容為，真係一種本能反應。
 
所以，當時我咩都唔講就衝咗出班房，直接跑去廁所。一到廁所，我就即刻去咗痾屎，然後就……自給自足啦。但因為我平時係一個聽話嘅好學生，好少可會無啦啦自己跑走，所以班主任當時有追住我跑咗出嚟。亦都因為咁樣，佢成為咗第一個親眼目睹我食屎嘅人。
 
嗰一日，我副主任打電話叫咗我爸爸媽媽嚟提早接我放學。點解係副班主任？因為正班主任見到我食屎之後連續嘔咗好多次，嘔到連黃膽水都出埋，所以最後仲早退過我。
 


我好記得，爸爸媽媽聽到我嘅情況之後，爸爸同媽媽嘅反應都比我想像中冷靜，佢哋只係翻屋企之後提我，以後唔可以再咁貪玩。但係估唔到，無耐之後又到四月嘅復活節，相信你都估到啦，復活節老師一派朱古力蛋俾我，結果又再出事。
 
今次，爸爸媽媽反應同上次有啲唔同。爸爸嘆氣同流咗啲眼淚，而媽媽就好溫柔咁幫我消毒個嘴，同埋用憐惜嘅眼神望住我。之後佢哋帶咗我去睇心理醫生，醫生話，我呢個情況係叫做「異食癖」，通常呢類病人都會將一啲奇怪嘢放入口度去滿足一啲心理需要，例如有人食毛髮、食紙、甚至係食釘。心理醫生話，呢啲病唯有去見下輔導先有機會好翻，否則就唯有避開引發病症嘅誘因，即係朱古力。
 
就係由五歲開始，我再無食過任何一粒朱古力。隨年紀長大，我呢個食屎嘅徵狀其實有嚴重咗，我慢慢變到唔需要食，只要聞到或者見到，都可以引發到我食屎嘅原始衝動，然後就要盡快去滿足自己嘅慾望，否則成個人都會神不守舍，愈來愈失控。所以，呢個病最麻煩嘅地方，係我每次去一個新地方，都要搵定廁所，方便我一病發，都可以即刻有地方俾我靜靜雞食屎。而我亦都要隨身帶備消毒液同漱口水，方便我自己清潔。
 
所以，好對唔住，我一直都同你講咩食朱古力會打乞嚏，其實只係一個想保護我自己嘅大話。頭先，我本來以為可以靜靜雞出貓扮食嗰半粒朱古力，照計都無咩事，就算有事，都可以死都盡力忍住。點知，到最後我只係去到聞到朱古力味，我就已經完全控制唔到自己……好對唔住，呃咗你咁耐。」
 
講到最後，敏敏已經忍唔住喊。
聽住自己愛咗七年嘅人竟然有咁鮮為人知嘅背景，我既驚訝，亦都為敏敏感到難過。


一時間，我亦都明白多咗好多嘢。
例如點解呢七年嚟佢都唔願意同我同居、又例如我每次食完朱古力或者飲完朱奶都唔肯錫我。
原來，她一直以嚟都獨自背負住一個咁大嘅秘密。
 
就喺呢個時候，敏敏慢慢抬起咗頭，用佢一對被淚水浸滿咗嘅雙眼望住我，問咗我一句：「你知道我有呢個會食屎嘅怪病之後，你仲想唔想同我結婚啊？」