而我望向敏敏,佢已經花容失色,用手掩定個口同個鼻。
呢一刻我阿爸距離敏敏其實都仲有七步距離,但走埋呢七步,只要啲朱古力味一接近敏敏,敏敏就會創造出媲美曹植七步成詩嘅「七步食屎」,成為一個千古奇談。
所以為免悲劇發生,作為男朋友,我決定喺呢一刻挺身而出。
 
就喺我阿爸走到距離敏敏五步之外嘅位置嘅時候,我一個箭步衝向個蛋糕,然後有如餓狗搶屎一樣瘋狂咁用手將個蛋糕塞入自己個口度。
五秒之內,我就將成個蛋糕鯨吞咗落肚。
我阿爸同阿媽兩個望住我呢個咁瘋狂嘅行徑,不約而同咁樣呆咗望住我。
「點解啊?」我阿爸擘大個口好驚訝咁問我。
「我肚餓,頭先食唔飽。」我努力咁吞埋口入面一半嘅蛋糕,然後答。
「肚餓,都唔洗食埋蠟燭掛?」今次到我阿媽問。


「係喎,唔好意思。」我從牙罅度抽翻支蠟燭出嚟交到阿媽手上,然後補多一句,「連蠟燭都食埋,咁你哋知我有幾肚餓啦。」
 
「唔緊要啦,肚餓,而家食翻飽咪得囉。」聽完我嘅解釋,我阿媽竟然毫無懷疑咁接受咗,所以話,我阿爸阿媽開通嘅程度真係好得人驚,我甚至相信有一日我同佢哋講我即將要同一個外星人結婚,佢哋都會接受到。
「係囉,唔緊要,咁而家我哋進入送禮物環節啦!」我阿爸亦都完全唔介意精心準備嘅蛋糕俾我一啖食咗,極速就已經轉換好心情,笑住去攞自己準備好嘅禮物。
「唔該哂你救我一命啊。」敏敏亦喺呢個時候同我去攞禮物,順便低聲多謝我。
「一聲多謝點夠啊,起碼都要以身相許啦。」我笑住講下無聊嘢,其實內心對頭先險過剃頭嘅情況都仲係未驚完。
 
嚟到送禮環節,我同敏敏首先送上我哋精心揀選嘅禮物,就係一部頸部按摩機。
對於近年條頸麻麻地嘅阿媽嚟講,呢部「阿嬸牌」按摩機絕對係最佳禮物,所以收到嘅佢亦都笑得好開心,睇嚟好滿意。
「嘩,你哋竟然咁重手出按摩機!好彩,今年我都唔差!」我阿爸呢個時候將一個大禮物盒一嘢轟咗上枱面。


就咁睇個盒,似乎真係有啲料到。
 
「各位觀眾,我今年嘅禮物係……雕塑!」
我阿爸一下撕開咗禮物紙,入面竟然係一個雕塑,仲要係跟住阿爸同阿媽幅結婚相嚟整嘅,又真係整得幾迫真。
只不過,我發現咗一件奇怪嘅事。
點解,呢個雕塑係啡色嘅呢?
 
我將內心嘅問題問咗出嚟,我阿爸笑咗一笑就答:「哦……因為呢個雕塑係我叫我老友整嘅,佢玩開朱古力藝術品,所以咪用朱古力幫我整咗呢座雕塑囉。食得又睇得,幾開心㗎!唔信你哋聞下吖,係真朱古力嚟㗎!」
「嘩雕……塑,都真係幾特別喎。」我將一個差啲脫口而出嘅粗口修正翻,心裡面忍唔住懷疑我阿爸到底係咪同可可豆有仇,如果唔係做咩今年送極都係朱古力。
 


呢個時候,我阿媽已經聞咗個雕塑一下:「嘩,真係朱古力味喎,好得意啊,你哋都聞下啦!」
講完呢句,個雕塑推咗嚟我前面。
我作狀聞咗一下之後,望到身邊嘅敏敏個樣已經有少少驚。
「不如唔好再聞喇,聞聞下就會融喇。」我伸手將雕塑推翻俾阿媽。
「唔得,大家都聞咗,你點可以咁自私唔俾敏敏聞埋㗎!」我阿媽嘅好客之道又喺呢個時候發作,只不過好明顯而家係錯嘅時候。
雕塑,再次推翻向敏敏。
「我,今日鼻塞,唔太聞到嘢㗎。」敏敏不失禮貌嘅一笑,將蛋糕推向我爸爸。
「咁就啱喇,呢個雕塑係用薄荷朱古力做,你聞下可能通到鼻塞添啊!」我阿爸再次好熱情咁將個雕塑推向敏敏。
 
到底點解我阿爸會覺得個雕塑用薄荷做就可以通鼻塞呢?
唔通佢以為啲薄荷朱古力係用「慢瘦倫敦」做嘅?
Ok anyways,呢個唔係重點。
重點係,朱古力雕塑已經迫在眉睫。
而敏敏,只可以靠搖後啲將櫈,低調咁同個雕塑保持距離。
但係,朱古力雕塑依然不近人情咁慢慢接近,而敏敏亦都只可以繼續將櫈向後搖。


 
就係咁,阿媽推兩下,我又推翻三下,阿爸推一下,敏敏又推三下,我哋成家就好似金庸小說一班武俠高手比拼內力一樣,將個雕塑推來扭推去。
但係無奈地,喺阿爸阿媽熱情嘅攻勢之下,個雕塑亦都愈來愈接近敏敏。
而敏敏只可以用盡小學雞嘅搖櫈技術,將自己個身盡力拉後。
 
可惜,物極必反,櫈都係一樣。
「嘭」!
唔知到底係好事定係壞事,敏敏因為將櫈搖得太後,突然成個人向後反咗落去。
「啊……」敏敏個樣好可憐咁㩒住自己後腦,睇嚟真係幾痛。
我見有機可乘,第一時間去佢身邊扶住咗佢,講:「嘩,呢啲撞親可大可少啊,睇嚟都係唔好食飯住啦,嗱嗱聲去醫院檢查下先啦,如果唔係撞到腦出血變咗白痴仔就好大件事㗎啦……」
我一邊扶,一邊拉住敏敏走向門口,然後順手出埋去,算係借啲依逃過一劫。
 
「好!痛!啊!」
翻到屋企之後,我細細力用隻熟雞蛋幫敏敏碌下受傷嘅地方,一唔覺意大力少少,敏敏就已經大嗌咗出嚟。
「算啦,今次咪當係小傷擋災囉。如果唔係呢下撞親,你可能已經出咗事,喺我阿爸阿媽面前食緊屎喇。」我笑住咁收細力道,敏敏先忍住咗唔再叫。


「都唔知以後點算啊!」敏敏一臉慘情,睇嚟今次嘅意外俾到好大嘅陰影佢。
「放心啦,下次一定會無事嘅,希望在明天吖嘛!等我幫你食埋隻蛋,送走哂啲衰氣!」我見敏敏嘅瘀傷已經減退翻啲,而隻蛋又開始變凍,作為一個廚師我係最珍惜食品嘅,所以就好自然咁打開隻蛋嚟食啦。
 
點知當我一打開隻蛋嘅一角,奇怪嘅事情就出現喇。
隻蛋入面,竟然係黑色嘅。
我帶住好奇嘅心繼續剝落去,點知,全隻雞蛋竟然有九成都係黑色。
無錯,係黑到好似油上去嘅黑色。
 
我望向敏敏,但佢同樣都用緊一副驚訝嘅目光望住我手中嘅呢隻黑蛋。
我唔知點解有一種直覺,呢隻黑蛋背後嘅事情一啲都唔簡單。
已有 0 人追稿