《求婚嗰日，我發現我女朋友鍾意食屎》: 八

當我仲未俾到反應呢隻黑蛋嘅時候，敏敏就「啊」一聲叫咗出嚟：「我知道點解喇！」
我睇佢呢刻好似柯南破案咁嘅樣，所以就靜靜地等佢繼續講落去。
「呢隻蛋之所以會變到咁黑嘅原因只有一個，因為......其實佢係一隻皮蛋嚟嘅！」敏敏懶係睿智咁指住咗呢隻蛋。
「唔會啦，你望下啲蛋殼，明明就係肉色嘅雞蛋殼，仲有你望下我碗餐蛋麵隻蛋，白雪雪㗎！呢兩隻蛋係一齊買嘅，邊有可能一隻係白一隻係黑呢？」我搖住頭否定咗敏敏嘅猜測。

「咁又真係幾奇怪喎......咦！不如我哋試下打開埋隻蛋嚟睇吓！」敏敏又再次忽發奇想。
只不過今次佢呢個想法又幾合理，所以我就嘗試慢慢搣走呢隻蛋嘅黑色表皮。
雖然隻蛋表皮變咗色，但係手感同一般雞蛋又無咩分別。
亦都因為咁，令我對呢隻蛋點解會變成黑色更加好奇。



我慢慢，搣走咗黑蛋嘅一半表層，直到見到蛋黃。
「咦！」我同敏敏同時發出咗驚訝嘅叫聲。
我哋之所以驚訝，係因為我哋見到兩樣好奇怪嘅嘢。
第一，蛋黃，非常正常，所以當佢出現喺一隻黑蛋入面，反而顯得奇怪。
第二，我哋發現，原來呢隻蛋唔係全黑，接近蛋黃嘅內層部份，依然係日常所見嘅蛋白。
從雞蛋嘅橫切面去睇，我發現，啲黑色其實係好似墨水一樣從外而內滲透入去隻雞蛋度嘅。

「唔通啲黑色係我啲瘀血？」敏敏疑惑咁摸下自己額頭，又唔見有咩黑色血流出嚟。
「呢個時候，都係搵Google大神啦。」我攞出手機，喺Google輸入咗「碌雞蛋 雞蛋變黑」。



下一秒，Google版面顯示咗一堆資訊。
我睇咗一大堆咩「雞蛋變黑反映你身體的三大警號！」、「醫生提醒你雞蛋變黑切勿鬆懈的七大原因！」content farm內容，大致都係話雞蛋變黑係因為吸咗身體入面嘅濕毒。
但問題係，呢啲文章形容隻雞蛋最多都係變成淡黑色，但而家我眼前呢隻蛋係黑過美源髮彩咁黑喎！
所以，我決定繼續睇下其他文章。

搵下搵下，我終於搵到一個寧舍唔同嘅標題。
「當熟雞蛋滾過身體後變黑，這可能是你已經中蠱的徵兆。」
「呢個咩字嚟㗎？」敏敏指住個「蠱」字。
「呢個字讀『古』，好似都係啲神神怪怪嘢。」我見過呢個字，一來係因為《笑傲江湖》入面嘅「五毒教」教主藍鳳凰就係一個用蠱高手，二來就因為衛斯理有本小說叫做《蠱惑》，入面都講咗唔少關於「蠱」呢樣嘢嘅資料。
但其實我對「蠱」呢樣嘢都無咩特別印象，所以就帶住半信半疑嘅心態㩒咗入去個網頁睇。



按照網頁所講，當你攞一隻熟雞蛋喺一個人嘅身上碌咗一輪，如果蛋白變成深黑色，就代表呢一個人已經中蠱。
聽落，情況同敏敏頭先發生嘅嘢非常相似。
於是，我嘗試再碌落去，望一望關於「中蠱」嘅資料。