《求婚嗰日，我發現我女朋友鍾意食屎》: 十一

八仙果師父向我哋招一招手，帶咗我哋入去佢間房。
一入佢間房，我同敏敏都情不自禁咁發出咗「嘩」一聲。
因為佢間房，簡直就係一個千奇百趣博物館。
霎眼望落去，佢間房擺咗羅庚、八卦陣、通勝、塔羅牌、星座位置圖、水晶球、桃木劍、關公像、十字架、就連Anson Lo海報都有張，似乎所有同神佛有關嘅嘢佢都應有盡有。
 
而最特別嘅，係佢間房嘅一角放咗好多罐好似罐頭嘅物體。
八仙果師父留意到我嘅眼光，即刻一輪嘴咁講：「靚仔你識貨喇，呢啲係我八仙果師父獨家出品嘅『辟邪八仙果』。每罐都經過我親自加持過，有邪驅邪，無邪亦都生津解渴。你哋好彩喇，呢期我新推出咗幾隻新味，有宇治抹茶、紫薯、海鹽、黑糖珍珠、芫茜同咸蛋黃味，買齊六隻味仲會有八八折添。」
聽住佢咁樣hard sell，仲要迎合潮流用啲八仙果整埋哂啲奇怪味，我對眼前呢個大嬸嘅信心再次跌翻落谷底，無奈咁同佢講：「不如你都係入翻正題，幫翻我女朋友吧啦。」
 
八仙果師父對於我打斷佢推銷亦無咩唔滿意，點一點頭，就望翻住敏敏。


「我叫八仙果，源自於法力可比『八仙』之高，同時亦想提醒自己多作善因得善果，所以先會得名『八仙果』。憑我嘅法力，我睇得出同聞得出，妹妹你身上嘅問題，似乎同『蠱』有關喎。」
八仙果師父此言一出，我同敏敏立即對望一眼，互相點頭，心裡面同樣諗到：「呢個女人，又唔係完全無料喎。」
 
八仙果師父望一望掛喺牆上嘅鐘，然後雙手十指頻頻來回彈動，似乎係計緊啲數。
過咗一陣，八仙果師父突然拍枱企咗起身：「仲有唔到半個時辰就係午時三刻，亦係一日陽氣最旺嘅時候，如果可以及時將你體內嘅毒蟲趕出，你體內嘅蠱毒就可以解開喇！而家，跟我嚟！」
睇住八仙果師父一臉緊張咁拎起側邊書櫃嘅一個file同幾罐佢自己啲八仙果，然後勁快就跑咗出屋外，我同敏敏都唔敢怠慢，即刻跟實佢一齊跑。
 
轉眼之間，我哋上咗唐樓天台。
八仙果師父唔知幾時換咗件道袍，然後叫敏敏坐咗喺天台中間。
「一陣，我會用趁住午時三刻嘅時候，用我嘅八仙果幫你引出你體內嘅毒蟲。今次作法起碼要用五罐八仙果，睇情況再加，放心，所有費用最後會計哂落你張單度㗎喇。」八仙果師父一邊圍住敏敏行，一邊拎住五罐八仙果灑落佢個身度。


而企喺側邊嘅我，簡直就好似睇緊電視入面嗰啲風水命理節目咁，完全唔明白到底發生緊咩事。
 
八仙果師父以敏敏為圓心，喺天台地下灑滿一地八仙果之後，從衫袋度拎出咗一塊樹葉遞俾敏敏：「合埋眼含住佢，一半口外，一半口內。」
「吓？」敏敏對呢個指令唔太明白。
「蟲天性鍾意食葉，而呢一塊係經過我加持嘅新界有機菜葉，你含住一半，將氣味留喺體內引毒蟲進入你個口，另一半留喺口外，吸引陽光化作陽氣，到時我另有用途。」八仙果師父似模似樣咁解釋。
到底含樹葉有冇用我真係唔知，但係我睇住敏敏而家個樣，我淨係聯想到嗰隻含住樹葉嘅「唔L係掛」樹熊。
 
正當我打算影低敏敏而家呢個滑稽樣將來笑下佢嘅時候，八仙果師父突然大叫一聲：「午時三刻已到，『破蠱大法』速速運行。」
只見佢左右手同時伸出食指中指，然後兩手交叉形成一個十字，口中念念有詞。
我本來仲想行近少少佢聽下佢講咩，點知佢突然又大喝一聲：「『蟲』不喜歡孤單一個！」


我俾佢呢下大嗌嚇咗一嚇，口就好自然咁擘大咗。
點知隨住佢呢聲叫喊，佢兩隻手突然擲出十幾廿粒八仙果，搞到我個口當堂吸咗幾粒。
 
「萬事俱備，如無意外，條蟲應該準備會從佢個鼻爬出嚟！」八仙果師父用兩指指住敏敏個鼻。
「咩啊？乜都無喎！」我睇咗一輪，感覺呢個八仙果師父都係似神棍多啲，所以都係對佢講嘅嘢充滿質疑。
「你望清楚啲！」八仙果師父大喝一聲，一手將我個頭推近敏敏個鼻。
 
估唔到，呢一下，我真係睇到。
一條疑似係尾巴嘅嘢，呢刻就喺敏敏個鼻孔度蠢蠢欲動。

= = =
作者IG：Ｗindblowssilently
如果想加速追故，連登講故台及Penana正領先連載中!